日本好去處 | 去日本嘅大家又有一個新景點可以去啦！全球第一座沉浸式主題樂園「IMMERSIVE FORT TOKYO」將會喺今個3月1日，喺東京台場正式開幕，當中包括《我推的孩子》、《福爾摩斯》《第五人格》等12個故事主題設施，為大家帶嚟第一身體驗，集恐怖及刺激於一身！

圖片來源：immersivefort | 撰文：Hedy

首座沉浸式主題樂園

即將於今年3月1日開幕嘅「IMMERSIVE FORT TOKYO」，有別於傳統主題樂園，令你由觀眾嘅身分變為當事人，親身體驗由電影、動漫與遊戲故事如《福爾摩斯》、《我推的孩子》、《第五人格》等嘅戲劇化故事，讓你渡過充滿戲劇性嘅一日。樂園原址為Venus Fort購物中心，並保留其歐陸式建築風格，面積達3萬平方米，共設有12個遊樂設施以及6間商店，你可以喺度購買唔同故事嘅紀念品，同時亦設有沉浸式餐廳，就連食飯都帶畀你獨一無二嘅體驗，真係好想去試試！

8大遊樂設施介紹

  • 名偵探福爾摩斯——沉浸式劇場

平時有睇開福爾摩斯嘅粉絲就有福啦，今次你仲可以親身體驗故事，劇場以宏偉規模重現19世紀嘅倫敦街景，並帶嚟大偵探福爾摩斯經手過嘅「神奇案件」。遊客可以戴上入場時派發嘅頭巾遮住臉，以不存在喺現場嘅身分遊走，你可以自由前往犯案現場觀察，亦都可以同福爾摩斯一齊行動破案！過程中你更有機會見到福爾摩斯同華生等48位角色登場，過程中嘅每一步都會影響你，究竟你將會喺案件入面嘅嫌疑者、被害者定係由你嚟破案呢？

體驗時間：90分鐘
體驗人數：最多180人
年齡限制：12歲以下須家長陪同

  • 《我推的孩子》—— 沉浸式拉力

2023年所推出嘅日本人氣動畫《我推的孩子》爆紅，而你亦都可以喺「IMMERSIVE FORT TOKYO」入面一邊同B小町成員互動，一遍解開謎題！身為B小町粉絲嘅你嚟到歐洲睇海外演唱會，但當中竟然要率先解開由超人氣YouTuber啾啾仔設計嘅解謎活動，先可以攞到應援棒參加演唱會？究竟最後可唔可以睇到演唱會呢？

體驗時間：約20至40分鐘

  • 《東京復仇者》——沉浸式逃脫

自2017年起連載嘅超人氣漫畫《東京復仇者》，將會變成沉浸式逃脫遊戲，東京卍會嘅成員們將會「活生生」出現喺你面前。當中竟然有人製造一場火災為毀滅東卍嘅惡勢力，究竟你可唔可以同成員一齊逃出呢？你嘅決定隨時都可以改變東京卍會成員嘅性命！

體驗時間：約105分鐘
體驗人數：最多120人
年齡限制：12歲以下須家長陪同

  • 開膛手傑克——沉浸式恐怖迷宮

當你行入19世紀嘅倫敦巷仔入面，竟然發現自己蕩失路？更因為咁目擊到一場殺人事件，傳說中嘅神秘殺人狂魔「開膛手傑克」，戴住陰森嘅面具、攞住閃爍著銀光嘅巨刀望住你。聽講佢仲會毫不留情咁殺死獵物，究竟你可唔可以逃出魔掌呢？

體驗時間：約10分鐘
年齡限制：15歲或以上

  • 江戶花魁奇譚 —— 沉浸式劇場

大家將會踏入江戶時代嘅煙花之地，更因此將會捲入一場美麗動人而又虛幻無常嘅人性戲劇，讓你透過五感體驗。同時故事情節更多達100種以上，你嘅一舉一動隨時都會講故事導向唔同結果，為大家帶嚟具真實性、刺激度及深刻性嘅世界頂級日本風情沉浸式劇場。

體驗時間：約70分鐘
體驗人數：最多30人
年齡限制：年滿18歲

  • 第五人格 —— 沉浸式追逐

全球擁有3億玩家嘅超人氣遊戲「Identity V（第五人格），將會登場！當你踏入呢個來自第五人格嘅世界，你將會展開一場絕命捉迷藏體驗，步步逼近恐怖嘅獵人將會出現喺你眼前，呢個時候你應該獨自完成任務，定係要將同伴救出嚟先？當中更有令你心跳加速同毛骨悚然嘅事接二連三咁出現！

體驗時間：約12分鐘

  • Spy Action —— 街頭娛樂

你將會踏入歐洲一個城市，當日一切如常，但卻突然迎來一聲槍響。一場黑手黨與特工之間嘅戰鬥，早已喺你身邊一觸即發，普通嘅市民更捲入其中，你又會點樣行動呢？

體驗時間：約20分鐘

  • Party Festa —— 街頭娛樂

喺黃金廣場上面，一場突如其來嘅Party即將開始，每個人都將會喺入面嘅當事者，甚至可能突然會有護花使者嘅出現，帶畀你心動又夢幻嘅體驗！

體驗時間：約20分鐘

見到以上咁多刺激又恐怖嘅遊樂設施，大家又可以點樣買門票呢？目前門票現已開售，更有分為4種唔同嘅通行證，即刻睇下有咩分別：

  • 1日沉浸式通行證·休閒

體驗景點：第五人格 沉浸式追逐、【我推的孩子】沉浸式拉力、Spy Action!、開膛手傑克、Party Festa!、沉浸式故事、卡巴萊
價錢：兒童3000日圓(約159港元）、成人6800日圓 （約360港元）

  • 1日沉浸式通用標準套票 （名偵探福爾摩斯）

體驗景點：名偵探福爾摩斯、第五人格 沉浸式追逐、【我推的孩子】沉浸式拉力、Spy Action!、開膛手傑克、Party Festa!、沉浸式故事、卡巴萊
價錢：兒童6000日圓(約318港元）、成人9800日圓(約519港元）

  • 1日沉浸式通用標準套票（東京復仇者 沉浸式逃脫）

體驗景點：東京復仇者 沉浸式逃脫、第五人格 沉浸式追逐、【我推的孩子】沉浸式拉力、Spy Action!、開膛手傑克、Party Festa!、沉浸式故事、卡巴萊
價錢：兒童6000日圓(約318港元）、成人9800日圓(約519港元）

  • 1日沉浸式通用高級套票

體驗景點：江戸花魁奇譚、第五人格 沉浸式追逐、【我推的孩子】沉浸式拉力、Spy Action!、開膛手傑克、Party Festa!、沉浸式故事、卡巴萊
價錢：成人14800日圓(約784港元）

【INFO】
IMMERSIVE FORT TOKYO
地址：東京都江東區青海1丁目3-15
開業時間：2024年3月1 日
購票網站：https://bit.ly/3Udk7O7

——————————————————

Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk