話咁快就到年尾，相信部份打工仔拎完Bonus之後，就會計劃轉職，如果想留個好印象俾舊同事，體體面面咁離職，小編就向大家推介10間高質散水餅店啦！當中有獨立包裝、有低糖手工甜品、有印上港式潮語嘅鬼馬包裝茶包，全部都平靚正，最平$5一份，有啲即日落單都得！想知有咩高質散水餅店，就睇埋落去啦！
圖片來源：捌拾玖號、The Classic Bakery、香港茶鄉、Bae.Bae.Bagel、nebuhk、Creamycream、Crazypie、Bubble Bu Cakery、慢慢布丁燒、Half Sweet絆糖 | 撰文：Icy
實惠獨立包裝系列 | 1 – 捌拾玖號
Last day未必個個同事都返齊工，所以送獨立包裝散水餅就最方便喇！捌拾玖號專做手工曲奇，採用法國製牛油同日本製麵粉，加入減糖配方，健康又好味、最平都係$15一包咋！一包曲奇有多款口味，例如韓國柚子、英式伯爵茶、即磨黑芝麻、朱古力杏仁等，仲可以加錢配埋心聲字條或者花茶包添～
【INFO】
捌拾玖號
主推產品：手工曲奇
最遲下單日：最少5個工作天前
價錢範圍：$15-$26
訂購網址：89 Hong Kong 捌拾玖號
實惠獨立包裝系列 | 2 – The Classic Bakery
The Classic Bakery嘅獨立包裝甜品即日香港新鮮製造，使用紐西蘭金筒牛油，加入低糖無添加配方。當中最實惠嘅散水餅自由配套裝，最平一包兩塊手工曲奇只需$18，味道選擇有咖啡、紅茶、芝士、焙茶、伯爵茶、抹茶等等，仲可以加錢搭配雪花酥、瑪德琳或者迷你麻糬曲奇，口感煙煙韌韌唔痴牙，相信個個同事都鍾意食～
【INFO】 The Classic Bakery 主推產品：手工曲奇 最遲下單日：最少3個工作天前 價錢範圍：$18-$36 訂購網址：The Classic Bakery
實惠獨立包裝系列 | 3 – 香港茶鄉
如果你嘅同事們比較養生，送茶包俾佢哋隨時沖嚟飲就萬無一失。香港茶鄉嘅花茶包純天然無添加，只需大約$15一包，超過20多款口味選擇，各有唔同功效。而且仲推出鬼馬港式潮語包裝，例如「走先啦係咁先啦」、「我真係好鍾意返工」、「雙糧花紅，我全都要」、「知我咩料啦」等等，各位香港打工仔見到一定會心微笑！
【INFO】 香港茶鄉 主推產品：花茶包 最遲下單日：最少10個工作天前 價錢範圍：$15-$60 門市地址：新界葵芳葵豐街1-15號盈業大廈A座12樓24及26室 營業時間：星期二至五 13:30-19:00、星期六 13:30-17:00 訂購網址：香港茶鄉
實惠獨立包裝系列 | 4 – Bae.Bae.Bagel
Bae.Bae.Bagel嘅貝果全手工製作，低糖無油無添加，又健康又好味。獨立包裝嘅散水貝果最平都係大約$22一個，有咖啡味、朱古力oreo、黑芝麻燕麥等等，仲好貼心咁係包裝上貼有加熱方法，送俾同事做早餐一定無問題啦！
【INFO】 Bae.Bae.Bagel 主推產品：貝果 最遲下單日：最少10個工作天前 價錢範圍：$22-$34 訂購網址：Bae.Bae.Bagel
實惠獨立包裝系列 | 5 – nebuhk雪花酥
nebuhk雪花酥每日新鮮純手工製造，使用健康低糖配方，香甜鳥結糖加上小圓餅，口感鬆軟酥脆，煙韌唔痴牙。雪花酥有多種味道，例如草莓牛乳、芝士伯爵茶、拿鐵、鹹蛋肉鬆、班蘭椰子等等，切合香港人口味。而且粒粒獨立包裝，禮盒套裝最平只需平均$5一粒，最啱送俾同事做零食過下口癮！
【INFO】 nebuhk 主推產品：雪花酥 最遲下單日：最少3個工作天前 價錢範圍：$15-$110 門市地址：香港葵涌大連排道宏達工業中心5樓9室 訂購網址：nebuhk
實惠獨立包裝系列 | 6 – Creamycream
Creamycream主打微甜不膩嘅手工小蛋糕，當中法式常溫低糖瑪德蓮系列，每件獨立包裝，只需$18一件，有傳統雲尼拿、特濃焙茶、英式伯爵茶等口味。如果要送俾多位同事，更加可以訂購24件Set，價錢平均只需約$15一件，賣相精緻得體，性價比好高！
【INFO】 Creamycream 主推產品：瑪德蓮 最遲下單日：最少3個工作天前 價錢範圍：$18-$368 訂購網址：Creamycream
大方得體即食系列 | 7 – Crazy Pie
如果預算鬆動啲，就可以選擇以下介紹嘅大方得體即食推介～Crazypie主打各款口味嘅麻糬甜品撻，大約$33一個，有成8.5cm咁大個！店舖每個月都會推出新款甜品撻，例如最新就有牛油果厚椰乳燕麥蛋糕、紫米紅豆麻糬、開心果生朱古力、玄米抹茶麻糬等等，聽到個名已經令人流晒口水啦！Crazypie設有觀塘門市，放有新鮮製作嘅現貨，如果買唔切散水餅，都可以即日上去買現貨㗎！
【INFO】 Crazypie 主推產品：麻糬甜品撻 最遲下單日：即日 價錢範圍：$33起 門市地址：香港觀塘開源道60號駱駝漆大廈3座8樓U1室 營業時間：星期二至日 12:00-19:00 訂購網址：Crazypie
大方得體即食系列 | 8 – Bubble Bu Cakery
Bubble Bu Cakery專賣各款精緻嘅手工芝士撻，以減糖配方製作，無添加防腐劑、香料及人造色素，曲奇撻皮更採用法國高級牛油同杏仁粉，充滿牛油同蛋香。大家可以自選唔同味道，例如特濃開心果、檸檬柚子、三重朱古力脆脆麻糬、士多啤梨抹茶等等，最平大約$29一件，撻面鋪滿水果或者餅碎裝飾，賣相靚到個個同事一定爭住打卡！
【INFO】 Bubble Bu Cakery 主推產品：手工芝士撻 最遲下單日：最少3個工作天前 價錢範圍：$29-$33 門市地址：荃灣橫龍街32-40號興盛工業大廈23樓B室 營業時間：星期一至日 11:00-12:00，13:30-17:00 訂購網址：Bubble Bu Cakery
大方得體即食系列 | 9 – 慢慢布丁燒
慢慢布丁燒結合咗滑嫩焦糖布丁同鬆軟芝士蛋糕，入口即融，味道香甜醇厚。布丁燒共有3款口味，包括雲呢拿焦糖、髒髒巧克力同特濃宇治抹茶，大約$30一個，上面仲印有可愛貓貓圖案，送俾同事做散水餅一啲都唔失禮，仲一定會俘虜唔少同事嘅心！
【INFO】 慢慢布丁燒 主推產品：布丁燒 最遲下單日：最少3個工作天前 價錢範圍：$30 自取點地址：旺角中心2樓立食區SK1A店 營業時間：星期一至日 13:00-20:00 訂購網址：慢慢布丁燒
大方得體即食系列 | 10 – Half Sweet絆糖
Half Sweet絆糖由本地年輕人主理，出品嘅牛角包窩夫大約$25一個，口感外脆內軟，加入唔同味道嘅吉士醬，再鋪上咸蛋肉鬆、烤芝士布甸、焦糖脆餅、提拉米蘇、果粒藍莓、香蕉朱古力等配料，賣相好igable。如果訂得越多，價錢仲會越抵㗎！
【INFO】 Half Sweet絆糖 主推產品：牛角包窩夫 最遲下單日：最少2個工作天前 價錢範圍：$25 門市地址：葵芳葵富路11號葵涌廣場2樓C97A號舖 營業時間：星期一至日 13:00-22:00 訂購網址：Half Sweet絆糖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
