無論你係鐘意酒店酒吧嗰種高貴典雅，抑或復古風嘅懷舊情調，又或者係被時尚裝修吸引，香港總有一間特色打卡酒吧適合你同朋友、情侶去度過一個難忘嘅夜晚。今次我哋就為大家精選咗10間香港必去打卡酒吧，款款各有特色，等你喺呢座不夜城搵到屬於自己嘅小天地。
圖片來源：Dragonfly、REFLECT Rooftop Bar and Restaurant、Staro、Arcadia、OZONE、ARGO、Library Restaurant and Bar、Maggie Choo’s、Top Town、Woobar官方圖片 | 撰文：Ginger
打卡酒吧推介｜1. Dragonfly
年輕人最愛嘅打卡熱點，莫過於大館呢間Dragonfly蜻蜓酒吧啦！由著名設計師Ashley Sutton親自設計，以19世紀歐洲新藝術風格為靈感，裝潢華麗到好似入咗博物館咁。最吸睛係綠松石玻璃燈飾，配上閃亮嘅金色蜻蜓裝飾，令人目不轉睛，再加上馬賽克拼貼地板同青銅雕塑，有童話世界吧感覺。唔止環境靚，Cocktail 同精緻小食都係一絕。無論係放工 Happy Hour 定朋友聚會，呢度都係一個 Chill 到爆嘅好選擇，難怪會被選為Time Out「香港50間最佳酒吧」。
【INFO】
《Dragonfly》
地址: 中環荷李活道10號大館10座地舖
營業時間: 星期一至四 17:00 - 01:00，星期五至六 17:00 - 02:00，星期日 17:00 - 01:00
打卡酒吧推介｜2. REFLECT Rooftop Bar and Restaurant
旺角REFLECT Restaurant & Bar 位於城市中心12樓，呢間餐廳主打墨西哥手工fusion菜式，由擁有十年墨西哥菜經驗嘅大廚掌舵，味道正宗之餘，亦加咗啲港式風味，照顧到本地食客嘅喜好。 一入餐廳，首先會被入口嘅深淵鏡吸引住目光，從唔同角度望過去，好似時光隧道咁，帶出「reflection」嘅主題。餐廳內部設計豪華亮麗，自然光充足，仲有一個細緻嘅酒吧空間，抬頭仲見到用鏡面倒影砌成嘅餐廳logo，充滿心思。
【INFO】
《REFLECT Rooftop Bar and Restaurant》
地址: 旺角西洋菜南街74-84號旺角城市中心12樓餐廳
營業時間: 星期一至日 12:00 - 02:00
打卡酒吧推介｜3. Staro
位於尖沙咀諾士佛臺嘅樓上酒吧餐廳 Staro，以星空為主題嘅浪漫裝潢，配搭星球燈飾、紫色月亮同星空天幕，氣氛唯美得嚟又有層次感，無論情侶約會定朋友聚餐都非常適合。餐廳主打歐陸菜，菜式精緻且充滿創意，當中包括西西里紅蝦手工幼蛋麵、意式燒乳豬配焦糖蘋果芥末籽蓉，以及焗法國黃油雞等招牌菜。
【INFO】
《Staro》
地址: 尖沙咀諾士佛臺1號9樓
營業時間: 星期一至日 15:00 - 00:00
打卡酒吧推介｜4. Arcadia
位於銅鑼灣頂層嘅Arcadia，係一間以藍白色調為主嘅天台酒吧，加埋熱氣球造型嘅卡位設計，營造出一種清新夢幻嘅氛圍，無論同朋友定情侶過嚟都可以影到靚相。夜晚燈光一開，氣氛浪漫到不得了。Arcadia唔單止裝修靚，連Cocktail都好有特色，每一杯都係調酒師 Mick 精心設計。配合今個聖誕節全新嘅節日佈置，更加浪漫閃爍，係閨密、朋友或者情侶過聖誕嘅好去處。
【INFO】
《Arcadia》
地址: 銅鑼灣登龍街1-29號金朝陽中心二期 - Midtown 30樓
營業時間: 星期一至四 15:00 - 03:00，星期五至六 15:00 - 04:00，星期日 15:00 - 03:00
打卡酒吧推介｜5. OZONE
位於香港麗思卡爾頓酒店118樓嘅Ozone，係名副其實全球最高嘅天台酒吧，將香港天際線嘅壯麗景色一覽無遺。Ozone嘅室內設計型格前衛，窗邊沙發位一向係人氣之選，坐喺度俯瞰香港夜景。戶外露台更係醉人亮點，氣氛一流。呢度唔單止係睇景好地方，仲有各國風味小吃同創意Cocktail，特別推介佢哋嘅「Five Elements」雞尾酒系列，每一杯都將元素概念融入味道之中，帶嚟味蕾嘅驚喜。
【INFO】
《OZONE》
地址: 尖沙咀柯士甸道西1號環球貿易廣場(ICC)香港麗思卡爾頓酒店118樓
營業時間: 星期一至六 16:00 - 01:00，星期日 12:00 - 00:00
打卡酒吧推介｜6. ARGO
位於香港四季酒店嘅 Argo，係一個將神話與現代完美結合嘅精緻酒吧。酒吧名字靈感來自伊阿宋王子嘅傳奇故事，象徵探索與發現，呢個理念亦融入咗酒吧嘅設計同酒單之中。以溫室為靈感嘅裝潢設計，加入自然元素同落地玻璃窗，令呢度成為欣賞維港景色嘅完美地點，無論日夜都充滿獨特氣氛。每款雞尾酒都係調酒師以心思精心創作，充滿驚喜。
【INFO】
《ARGO》
地址: 中環金融街8號香港四季酒店大堂
營業時間: 星期一至四 07:00 - 10:30，12:00 - 14:30，17:00 - 00:00，星期五至六 07:00 - 10:30 12:00 - 14:30，17:00 - 02:00，星期日 07:00 - 10:30，12:00 - 14:30
打卡酒吧推介｜7. Library Restaurant and Bar
位於尖沙咀嘅Library Restaurant and Bar，係一間充滿異國情調嘅主題餐廳。一踏入餐廳，就會被佈置精緻嘅花花走廊吸引，少女心即刻爆發。餐廳內部以墨綠色為主調，搭配金屬元素，同昏黃燈光營造出摩登時尚嘅氛圍，每個角落都係影相打卡嘅好地方。餐廳仲有一個開放式室外座位區，充滿假日感。
【INFO】 《Library Restaurant and Bar》 地址: 尖沙咀彌敦道74-78號文遜大廈3樓 營業時間: 星期一至日 12:00 - 02:00
打卡酒吧推介｜8. Maggie Choo’s
中環嘅Maggie Choo’s唔係普通酒吧，而係一個充滿虛構故事嘅時光隧道。推開古董店背後嘅門，映入眼簾係柔和吊燈嘅光，皮革、柚木同銅藝混搭出嚟嘅復古氣息，好似置身舊時代嘅夜上海。旋轉樓梯、仿古金庫門，再加埋翠綠色天鵝絨梳化，呢個場景，隨手影張相都夠晒有電影感。至於cocktail方面，Delusion係唔少人嘅首選，酸甜味道啱晒鐘意清新口感嘅你。喺昏黃燈光同歌舞表演中，手執一杯精緻雞尾酒，呢度唔單止係酒吧，更係一場穿越時空嘅體驗。
【INFO】 《Maggie Choo’s》 地址: 中環荷里活道1-13號華懋荷里活中心下1號舖 營業時間: 18:00 - 02:00
打卡酒吧推介｜9. Top Town
位於士丹利街28號頂樓嘅TopTown，係一個將曼克頓精緻氛圍帶到中環嘅天台酒吧，同時融入咗美國《大亨小傳》嗰種華麗社交場景嘅靈感。如果你係想chill住飲杯嘢，呢度都絕對夠晒氣派。室內外空間設計走裝飾藝術風，天台景觀一覽中環嘅繁華光景，喺晚風中乾杯，感覺一流。
【INFO】 《Top Town》 地址: 中環士丹利街28號31樓 營業時間: 星期一至四 15:00 - 00:00，星期五至六 15:00 - 02:00，星期日 全日休息
打卡酒吧推介｜10. WOOBAR
位於香港W酒店6樓嘅WOOBAR係一間充滿時尚氣息嘅西式酒吧，以型格裝潢同高樓底設計，打造出一個輕鬆又充滿活力嘅空間，無論係傾偈飲酒，定係靜靜享受下午茶，呢度都啱晒。講到氣氛，日落時分嚟WOOBAR，透過落地玻璃望住天邊嘅餘暉，杯酒在手，感覺寫意！
【INFO】 《Woobar》 地址: 尖沙咀柯士甸道西1號港鐵九龍站香港W酒店6樓 營業時間: 星期一至六 12:00 - 00:00， 星期日 12:00 - 22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
