1962年入伙嘅彩虹邨以七彩繽紛、整齊有序嘅樓宇外牆為名，成為一大香港屋邨地標，甚至吸引Seventeen、本月少女等韓國偶像團體取景拍MV！而房委會近日宣布計劃重建有超過60年歷史嘅彩虹邨，引起社會關注，雖然未知具體詳情，但趁住重建之前，小編就帶大家瓹窿瓹罅，發掘多間彩虹邨周邊特色小店啦！
圖片來源：Mirror《Rumours》MV、Facebook @上海華麗理髮公司、Openrice @pforhappyfood、Facebook @丁爸食府、Openrice @JCSM688、Openrice @pinocchio芑芑、Openrice @h0410232、Openrice @man_sze_c、Openrice @6pm、Openrice @魚堅日記、Openrice @DAITODUM、Openrice @amyamy1012、Openrice @Pleplev3v、Facebook @漫畫世界、wiki_Steven Wei｜撰文：Icy
彩虹邨周邊特色小店 | 1. 上海華麗理髮公司
呢間「上海華麗理髮公司」，就咁聽個名都覺得好有霸氣，其實佢已開業超過60年，喺香港碩果僅存嘅舊式理髮店。一行入店內彷彿令人穿越時空，返到五六十年代，綠白相間嘅格仔地磚加上黑色油壓飛髮椅，充滿懷舊韻味，就連Mirror都曾經喺度拍攝MV！
店內嘅理髮師傅喺行內打滾幾十年，資歷有保證，佢哋使用嘅理髮工具，例如電剪以及鋁鐵風筒，雖然佈滿時間痕跡，但仍然好耐用。呢度主打男士剃鬚修面及飛髮服務，不論鏟青、平頭、韓仔頭等等都冇難度，而且價錢合理，男士們不妨去嘗試下老師傅們嘅手勢啦！
【INFO】 上海華麗理髮公司 地址：九龍彩虹邨青楊路金碧樓33號地舖 營業時間：星期一至日 08:00-19:00
彩虹邨周邊特色小店 | 2. 丁爸食府
位於彩虹牛池灣巷弄中嘅「丁爸食府」由台灣人丁爸主理，主打古早台式美食，例如蚵仔煎、手工鍋貼、麵線、滷肉飯、鹽酥雞等等。雖然餐廳外觀平平無奇，只有少許堂食座位，但食物味道同水準高超，更曾經打入米芝蓮「必比登推介」食肆名單！
店內出品大部份採用台灣進口嘅食材同調味料，保留地道台灣美食原汁原味，價錢亦相當便宜。當中蚵仔麵線，用上以新鮮雞骨熬製嘅湯底，麵條煮到好腍身，而且索晒啲湯汁，滑溜惹味！
【INFO】 丁爸食府 地址：彩虹牛池灣貴池徑2號地下C號舖 營業時間：星期一至日 11:00-22:30
彩虹邨周邊特色小店 | 3. 愛群快餐店
「愛群快餐店」由80年代起開始屹立係彩虹邨內，一直保留住舊式香港快餐店嘅裝修格局，例如奪目嘅紅黃色收銀處以及一張張長枱膠凳，懷舊又不失整潔，對於年輕一輩嚟講真係充滿新鮮感！
講起港式快餐，一定唔少得炸雞髀薯條，呢度嘅生炸雞髀外皮金黃香脆，唔會有厚厚嘅粉漿，切開之後啖啖肉，肉質鮮嫩多汁。再配上一杯冰凍嘅紅豆冰或者菠蘿冰，令人搵返童年嘅回憶～
【INFO】 愛群快餐店 地址：彩虹綠柳路8號彩虹邨金碧樓地下11號舖 營業時間：星期一至日 06:30-21:30
彩虹邨周邊特色小店 | 4. 鑽石冰室
彩虹邨內另一間港式食店「鑽石冰室」開業逾四十年，雖然曾進行大翻新，但仍保留亮眼嘅金漆招牌以及黑白凳仔，散發陣陣老冰室情懷。室內企理乾淨，設有多個廣闊嘅卡位，令食客坐得舒適。
大部份下午茶連凍飲都係盛惠$30左右，價錢相當平民。當中招牌菠蘿油同奶油脆豬，香甜脆身，配上港式香濃檸茶，非常受街坊歡迎～
【INFO】 鑽石冰室 地址：彩虹青楊路11號彩虹邨金漢樓37號地舖 營業時間：星期一至日 07:00-21:00
彩虹邨周邊特色小店 | 5. 楓林軒
想必大部份人讀書時期，每日都期待放學後，約埋同學一齊去小賣店買小食做下午茶。「楓林軒」就係彩虹邨內嘅平價小食店，開業已有20多年，售賣蒜香撈麵、燒賣、魚蛋、腸粉、炒麵等街頭小食。每逢放學時間都有好多學生哥堆滿門面，係一個充滿本土情懷嘅畫面。
多年來「楓林軒」嘅物價都係經濟又實惠，約$20就有大大兜魚蛋燒賣撈麵，香口又飽肚，簡直係學生哥同街坊們嘅美食天堂！
【INFO】 楓林軒 地址：彩虹彩虹邨商場 4 號地下 營業時間：星期一至六 10:00-20:00
彩虹邨周邊特色小店 | 6. 漫畫世界
好多人童年時未有太多娛樂，放學後都會與同學去漫畫舖打躉，沈醉係漫畫世界入面。時至今日香港舊式漫畫店已經買少見少，但彩虹邨內嘅「漫畫世界」10多年來依舊風雨不改，為街坊提供廉價嘅漫畫租借服務。店內有多本懷舊日本動漫、武俠小說、甚至BL同人漫畫，滿足唔同讀者嘅喜好。雖然現時人流鋭減，漫畫業未及90年代咁輝煌，但老闆為咗一班熟客，租書價仍然保持係$6左右，可謂非常有良心～
【INFO】 漫畫世界 地址：彩虹邨金碧樓29號地下 營業時間：星期一至六 12:00-20:00
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
