太安樓美食 | 講起掃街，除咗旺中、葵廣等熱門地方，西灣河太安樓都係其中一個掃街熱點，有唔少平價小食！今次為大家推介8間比較新嘅性價比高小店，例如有Cafe Whale、台灣正宗地瓜球「老兄苔」、日式生燒雞類串燒千鳥屋台及台南過江龍手搖飲品店大諾亞飲品，絕對值得一試！立即收藏，下次同朋友出街唔使煩惱食咩啦！
圖片來源：Openrice@CAROLCHUNG430、@lap.yip.37、@Net net、@iamarollingball、@creamfun、@happy.foodie.life、@frostiewithfood、@follow.m.y.eatlog、@Belle、 @ilovekumabb、@icesum97、@mochibb｜撰文：Ginger
太安樓美食合集 | 1. Cafe Whale——必食支竹羊腩煲漢堡
Cafe Whale店主兼大廚Nick係甜品廚出身，有六年經驗。店裡提供9款漢堡，加入特色醬汁，例如「余均益蛋黃醬」、「手打騸牯牛」同埋「飛魚子蛋黃醬」。最特別嘅係佢哋嘅枝竹羊腩煲漢堡，靈感來自港式支竹羊腩煲，用紐西蘭羊卷肉打成嘅羊扒夾著脆身嘅炸支竹，再加埋廖孖記嘅腐乳蛋黃醬，食落羊羶味啱啱好，唔會太濃，又有枝竹同腐乳嘅香氣，真係別有一番風味！
【INFO】 《Cafe Whale》 地址：西灣河筲箕灣道57-87號太安樓第三街A61 A&B號舖 營業時間：星期二至日 12:00 - 21:00（星期一 休息）
太安樓美食合集 | 2. 老兄苔——台灣傳統風味地瓜球
「老兄苔」嘅老闆Ronald係土生土長嘅香港人，而佢嘅太太係台灣人，每次佢太太返嚟香港都好掛住台灣夜市嘅地瓜球，所以老闆就決定開一間以地瓜球為主角嘅小食店，滿足老婆嘅口腹之慾，同時希望可以帶返台灣嘅地瓜球風味比香港人試。「老兄苔」主打6款口味地瓜球，包括原味、梅粉、黑芝麻、美奶滋肉鬆、花生朱古力同椰茸朱古力。地瓜球每粒金黃晶瑩，又大粒又脆又軟，口感Q彈。唔單止有地瓜球，老兄苔仲有好多特色美食，例如滷肉飯、鹽酥雞、酥炸米血糕同埋米苔目刨冰，全部都保留咗台灣傳統風味。老闆特地由台灣訂造壓地瓜球機，經過130度高溫油炸，不停攪拌同壓擠地瓜球，令空氣滲入，做到外脆內軟！
【INFO】 《老兄苔》 地址：西灣河筲箕灣道57-87號太安樓地下A39-A號舖 營業時間：星期一至四 12:00 - 22:00；星期五至日 12:00 - 23:00
太安樓美食合集 | 3. 享多味手抓餅——即叫即製手抓餅
「享多味手抓餅」呢間小店嘅餅皮即叫即製，鬆脆度高！可以揀芝士、吞拿魚、火腿、煙肉、粟米等唔同餡料，揀出唔同嘅配搭，例如雞蛋鹹牛肉、芝士雞蛋蘑菇、雞蛋牛肉漢堡生菜，每份嘅價錢大約係$31起。餅皮可以揀原味或紫薯餅底，食落更香更健康！
【INFO】
《享多味手抓餅》
地址：西灣河筲箕灣道57-87號太安樓地下第一街A94號舖
太安樓美食合集 | 4. 千鳥屋台——串燒以香港本地新鮮雞肉製成
千鳥屋台主打雞類串燒，堅持用日式生燒方法嚟烤每一串串燒。雖然呢個方法費時費工，但佢哋一直都睇重保留食材嘅原味，每串只係$18。串燒全用香港本地新鮮雞肉製成，經過精心烹調，味道絕不輸日本！餐廳更選用最新鮮嘅雞肉製作新鮮手打雞肉棒，手打同用機攪出嚟嘅質感完全唔同，每啖都係充滿鮮嫩同質感，值得一試！
【INFO】 《千鳥屋台》 地址: 西灣河筲箕灣道57-87號太安樓地下A63B號舖
太安樓美食合集 | 5. 大諾亞飲品——台南過江龍手搖
台南過江龍手搖飲品店大諾亞飲品2017年成立，喺2024年終於正式登陸西灣河太安樓！佢哋嘅獨家招牌就係焦糖椪糖奶蓋紅，靈感來自魷魚遊戲，真係創新又特別！椪糖、奶蓋、莉莉絲紅茶同焦糖組合而成，奶蓋唔會太重但又夠濃郁，再加上香濃紅茶底，飲落四重口感層層遞進，所以長期都係榜首位置。
【INFO】 《大諾亞飲品》 地址: 西灣河筲箕灣道57-87號太安樓地下A51B號舖 營業時間: 星期一至日 12:00 - 00:00
太安樓美食合集 | 6. 泰妹麵——平價泰菜美食
泰妹麵提供多款平價泰菜美食，例如$18泰式蒜香撈公仔麵、$32泰式撈凍檬粉、$40船麵及各款特色小食。如果怕唔夠飽，佢地都有提供冬陰公金邊粉珍寶Size，有雞肉 、豬肉、蝦丸等等，甜甜辣辣非常開胃！
【INFO】
《泰妹麵》
地址：西灣河筲箕灣道57-87號太安樓地下A5號舖
營業時間：星期一至日 12:00 - 00:00
太安樓美食合集 | 7. 飯Ee——牛角酥窩夫
掃完街之後，最啱就係食返啲甜品，嚟飯Ee就係你嘅不二之選！佢哋嘅牛角酥窩夫系列，$30兩件起，同埋疏乎厘鬆餅系列，$40兩件起，仲有雪冰系列，$36起，口味多元化，性價比好高！
【INFO】
《飯Ee》
地址：西灣河筲箕灣道57-87號太安樓地下A17A號舖
營業時間：星期一至六 18:00 - 00:00（星期日休息）
太安樓美食合集 | 8. 識食——有燒烤、小食以及窩夫
「識食」呢間小食店性價比高，有好多選擇！有燒烤、小食，最特別係佢哋嘅自創口味窩夫，有士多啤梨乳酪窩夫、粒粒花生醬煉奶窩夫等等，即叫即整，而且份量超足，啖啖香甜花生醬，真係飽足又滿足！特別要提嘅係佢哋嘅蒜蓉燒生蠔，啲生蠔鮮美多汁，再加上蒜蓉嘅香辣味，非常惹味！
【INFO】
《識食》
地址：西灣河筲箕灣道57-87號太安樓地下36B號舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
