天秀路游泳池 | 呢排天氣咁熱，相信有唔少朋友仔都會選擇去游水，除咗可以消暑之外，又可以做運動令自己身體變健康。住天水圍嘅朋友有福啦，最近呢度新開嘅游泳池終於都投入服務，更係元朗區內首個泳池設有按摩池，更被譽為全港最靚嘅游泳池？
圖片來源：官方圖片、Facebook@賴玥均 | 撰文：Hedy
元朗區天秀路游泳池毗鄰香港濕地公園，為同區內康文署轄下第四個游泳池，有一個50米乘25米主池以及25米乘15米訓練池，啱晒大家喺夏天游水！除咗有室內同室外池之外，更設有區內首個按摩池，等市民都可以全天候享受游水嘅樂趣！由於救生員不足嘅關係，暫停開放室外設施，大家暫時都只可以享用室內標準池同按摩池。
天秀路游泳池 | 特設親子更衣室
天秀路游泳池嘅設計相當有日系感覺，入面仲有室內庭院，難怪會被譽為全港最靚嘅泳池！入面亦設有更衣室，當中男士貯物櫃數量為470個，女士貯物櫃數量就有559個。為咗方便父母帶小朋友換衫，更特設9格親子更衣室！
天秀路游泳池 | 隔離就有遊樂場放電
游完水之後仲可以帶埋小朋友去隔離嘅天秀路遊樂場放電，捉緊暑假嘅尾巴！遊樂場以繽紛歷險之旅為主題，設有六米高巨型滑梯及三米高攀石牆，仲有鞦韆、攀爬繩網、戶外健身器材以及可供輪椅使用者享用嘅氹氹轉等。由輕鐵天秀站或濕地公園站步行都只係需要5分鐘，相當方便！
【INFO】 《天秀路游泳池》 開放時間：6:30至12:00、13:00至22:00 地址：天水圍天秀路20號
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
