單身即地獄4 | Netflix實境戀愛真人秀《單身即地獄》絕對係韓國人氣節目，自播出以來都大受歡迎！之前有追開嘅大家，就絕對唔好錯過《單身即地獄4》啦！小編已經幫大家整合咗11位成員嘅Instagram，除咗有Produce 48練習生之外、仲有同Twice Sana勁似樣嘅成員、韓國海軍陸戰隊UDT等！ 即刻入內文睇詳情啦！
圖片來源：Instagram@youseeany、kimtaehwan.kimmtae、youjini1225、donghokook、kimminseoll、6dory、bxxyon、07_27___、tachyonproject、arinin_dd、justsoo_it | 撰文：Hedy
《單身即地獄4》搵嚟眾多單身嘅男女成員，喺地獄島入面大家都唔可以公開自己嘅年齡同職業，但大家都可以透過唔同嘅小遊戲去爭取同心儀嘅對象去天堂島相處！天堂島除咗有舒適嘅住所之外，亦有美食、游泳池等等，等大家都可以透過咁放鬆嘅環境下認識對方！主持人除咗原班人馬韓海、洪真慶、李多熙、曹圭賢外，第2季人氣成員金珍映Dex亦再度加入主持。今季除咗係首次喺街頭徵選之外，製作人更大爆將會有「女版李官熙」出現，本季更是史上最火熱嘅一季！
單身即地獄4成員介紹 | 1. 李時安 / 李詩安 이시안 （Instagram: youseeany)
如果有睇開韓國節目嘅，就絕對唔會對呢位成員感到陌生～李時安曾經參加過《idol school 》以及《Produce 48》等選手節目，雖然未能成功組團出道，但當時已經留低咗超亮眼嘅表現！26歲嘅李時安現時為模特兒，拍攝唔同化妝品以及服裝品牌廣告。而係節目上佢亦表示自己想談一場轟轟烈烈嘅愛情，唔知最後結果又會係點呢？
單身即地獄4成員介紹 | 2. 金泰焕 김태환（Instagram: kimtaehwan.kimmtae)
32歲嘅金泰煥為模特兒以及演員，一出場嘅時候相當有自信，更指：「我從一出生就知道自己長得帥，就算吵架，對方只要看到我的臉就氣消了。」
單身即地獄4成員介紹 | 3. 鄭裕陳 / 鄭宥真 정유진 (Instagram: youjini1225）
28嘅鄭宥真畢業於梨花女子大學舞蹈系，依家係一名專業舞蹈家，無論係現代舞定係韓國傳統舞蹈都相當之在行～而平時得閒嘅時候都鍾意玩自由潛水～而佢亦都係節目入面表示，如果對男仔有好感，會慣性撥頭髮，某啲角度睇仲有啲似第三季嘅廈情！
單身即地獄4成員介紹 | 4. 鞠同鎬 국동호（Instagram: donghokook)
鞠同鎬外表睇落比較高冷，不過個性溫和又多愁善感，面對愛情更會主動向對方進攻，期待佢喺節目上面嘅表現！
單身即地獄4成員介紹 | 5. 金珉楔 / 金敏雪 김민설 (Instagram: kimminseoll）
金珉楔 / 金敏雪曾經係LG Twins棒球隊嘅啦啦隊隊員，隨後亦曾於全國春香小姐選拔大會中奪得冠軍，亦曾經出演過電視劇《美男堂》！現時就為一名體育主播，報導唔同嘅賽事～
單身即地獄4成員介紹 | 6. 陸俊諝 / 陸俊諝 육준서 (Instagram: 6dory）
陸俊諝曾服役於韓國海軍特戰隊（UDT），為節目入面唯一嘅長髮男，竟意外地受人歡迎？佢其後亦有參與唔同嘅影視作品，包括《Sweet Home》、SBS《共生的法則》以及MBC《全知干預視角》等！而佢嘅職業就係一位畫家，經常都會繪畫唔同嘅作品同參展！
單身即地獄4成員介紹 | 7. 裴智妍 배지연 (Instagram: bxxyon)
熱愛運動嘅裴智姸對於自己嘅身材相當有信心，平時嘅興趣就係騎馬，其外貌更被主持指與Twice Sana撞樣！裴智姸現時嘅職業為模特兒，更係韓國知名化妝品品牌「Angels Liquid」嘅形象大使！
單身即地獄4成員介紹 | 8. 金慧真 김혜진 (Instagram: 07_27___)
25歲嘅金慧珍依家係模特兒，睇落有少少似朴信惠！當佢對對方有好感嘅時候，就會一直望住對方嘅眼睛，而對方通常都會因為咁而鍾意佢～唔知呢招對節目入面嘅男成員work唔work呢～
單身即地獄4成員介紹 | 9. 張泰晤 / 張泰旿 장태오（Instagram: tachyonproject)
張泰晤為韓國演員，曾參與多部作品包括《秘密的男人》以及《太宗李芳遠》，而佢亦希望自己可以喺海外發展！高冷嘅外表背後原來對愛情十分之認真？一旦認定一個人就只會專注喺佢身上！
單身即地獄4成員介紹 | 10. 金我璘 (Instagram: arinin_dd）
由細到大金我璘成日都聽到人哋讚佢靚，甚至認為佢有反差嘅魅力，而佢上節目都希望可以搵到一個內外都有魅力嘅人～
單身即地獄4成員介紹 | 11. 金淨洙 김정수 (Instagram: justsoo_it）
33歲嘅金淨洙有著低沉嘅聲音，自認為係自己嘅魅力所在～金淨洙目前為咖啡廳老闆，同時亦有做員工、設備等管理。喺節目上對每位女生都相當貼心，究竟呢個會係加分定扣分位呢？
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
