動物森友會手機版 | 相信大家如果有買Switch嘅話都一定有玩過動物森友會，仲記唔記得當時疫情嘅時候同朋友日日玩嘅快樂時光呢！依家終於都可以用手機玩新版《動物森友會口袋露營廣場集合版》，仲支援離線遊玩，即刻睇睇遊戲詳情啦！
圖片來源：官方網站 | 撰文：Hedy
大家又有冇玩過《動物森友會》呢？手機版《動物森友會口袋露營廣場》將會喺11月28日結束服務，相信有唔少粉絲都相當唔捨得！最近任天堂官方宣布將會推出《動物森友會口袋露營廣場集合版》，延續舊版遊戲嘅玩法同內容，甚至可以保留返舊有遊戲嘅進度以及遊戲中所收集嘅物品例如家具以及服裝等。大家又期唔期待呢？
動物森友會手機版 | 遊戲支援離線遊玩
新版《動物森友會口袋露營廣場集合版》唔使大家不斷課金，只要付費下載遊戲之後，就可以盡情咁玩遊戲～喺遊戲入面你將會成為露營場嘅管理員，打造出一個熱鬧歡樂嘅動物露營場，可以喺度釣魚以及捕蟲等，唔少可愛嘅動物更會登場同你傾計！而且每個月都會舉辦唔同嘅活動例如「花園活動」同「釣魚大會」等。每逢節日例如萬聖節、聖誕節、復活節同夏日祭典等活動中，都可以收集到充滿節日氣息嘅物品！遊戲更支援離線遊玩，啱晒大家冇嘢做嘅時候玩～
動物森友會手機版 | 全新3大元素
-
露營者個人卡片
遊戲入面將會加入露營者個人卡片，大家都可以透過更改背景、姿勢、顏色，去打造屬於自己嘅卡片。當整好之後就會有專屬嘅QR Code，只要讀取其他玩家嘅QR Code就可以登錄至「露營者個人卡片」。
-
口哨嶺
口哨嶺為全新嘅休閒區，透過「露營者個人卡片」中登錄嘅玩家有機會過嚟遊玩。大家有機會可以喺招待嘅玩家手中獲得土產，亦可以請招待嘅玩家協助前往岩石礦山！仲有機會機會見到K.K.舉辦演唱會。
-
完美集合票券
只要喺活動入面努力表現，就可以獲得「完美集合票券」，用嚟兌換曾經錯過嘅期間限定物品或者係幸運餅乾！
動物森友會手機版 | 12月3日正式推出！
只要曾經玩過《動物森友會口袋露營廣場》，大家都可以繼承過往嘅儲存資料，當中包括過去收集嘅家具、服裝、鈴錢以及動物友好度等等都可以繼續使用！《動物森友會口袋露營廣場集合版》將會喺今年12月3日正式推出，依家已經可以分別喺Apple Store同Google Play開始預先註冊。只要去到下年1月31日之前，都可以用港幣$58優惠價格購買。過咗之後就要畀港幣$118下載，大家記得把握機會提早購買遊戲啦～
【INFO】 《動物森友會口袋露營廣場》 價錢：港幣$58（早期優惠價格） / $118 下載連結：Apple Store 或 Google Play
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
