儲錢法 | 唔想成為月光族，每個月一出糧就洗晒啲錢，就絕對要學好理財！小編幫大家精選咗7種有效儲錢嘅方法，幫你慢慢養成儲蓄習慣，自然就可以擺脫月光族啦！
圖片來源：網上圖片 | 撰文：Hedy
儲錢法 | 1. 100日儲錢法
講到儲蓄，近日最爆紅嘅方法為「100日儲錢法」，只需要100日就可以輕鬆儲成5000蚊，對啱啱起步嘅大家嚟講絕對係簡單又有效！外國一位網紅Milly喺社交媒體上面分享理財妙法，當中只需要利用一本2R嘅活頁相簿，喺每格透明袋上面寫上1至100嘅數字。每日只需要放入與數字相符嘅金額就可以，見到數字1就放1蚊，見到數字50就放入50蚊。同時你都可以自製一張1至100數字嘅封面頁，咁就可以記錄自己儲錢嘅進度。100日過後，就可以儲成$5,050，等大家每次入錢嘅時候都相當期待！
儲錢法 | 2. 偶像儲錢法
相信無論咩年紀，大家都會追星，而呢個偶像儲錢法就絕對適合大家！首先只要設定一個儲錢目標，例如發布一次限時動態儲$30、發布新帖文儲$50、每開一次live儲$100、開演唱會儲$1000等，咁大家就可以輕鬆無痛咁儲錢，同時又可以記錄同偶像嘅點滴！偶像儲錢法喺日本同韓國都相當流行，更有粉絲實測後，喺短短10日就成功儲到港幣$2,800！
儲錢法 | 3. 365日儲錢法
365日儲錢法同樣都適合理財新手，只需要每日畀前一日入多$1，持續一年時間就完成，簡單得嚟又有成就感！假設大家第一日由$1開始，去到第365日嘅時候，就可以儲蓄$66,795！不過由於呢個儲錢法需要大家持之以恆，大家都可以運用表格輔助，完成之後就可以劃走一格，咁就可以堅持去到第365日。
儲錢法 | 4. 333儲錢法
大家可能最常聽到333儲錢法，簡單嚟講就係將收入分為3個部分，例如係日常開支、儲蓄以及投資等等，亦可因應自己嘅情況去設定。以$30,000月薪嘅打工仔為例，每月都可以儲到$10,000，咁一年就可以儲到$120,000！就算有緊急情況下，都唔怕突然冇應急基金！
儲錢法 | 5. 硬幣存錢法
想成功儲錢嘅大家，平時絕對要以現金付款，避免使用信用卡，咁就唔怕今個月會碌多咗！每日用現金都可能會有硬幣找，如果唔想擺喺身，就相當推薦大家將硬幣儲起，無論係放入錢箱或者錢罌都適合。當大家儲到一定數量嘅時候，就可以留意下金管局轄下嘅收銀車，幾時會駛去屋企附近，可以免費幫你將硬幣換成鈔票或者加落八達通或電子錢包都冇問題。
儲錢法 | 6. 6罐子儲錢法
6罐子儲錢法係由《有錢人想的跟你不一樣》嘅作者T.Harv Eker所提出嘅一種理財法。當每個月出糧後，應該將薪金分為六種罐子或帳戶。當中需要將50%嘅收入放喺日常生活開支嘅罐入面，用嚟應付租金、交通以及三餐等。其餘嘅50%則可各自投放10%喺投資、休閒娛樂、長期儲蓄、教育學習以及給予貢獻，大家都可以因應自己平時嘅洗費去調整。
儲錢法 | 7. 100法則
100法則係指由你嘅年齡去決定每月儲蓄嘅百分比，如果你今年25歲，就要將收入嘅25%儲起，然後其他就可以用作支出，相對較為簡單之餘，每個月儲起一部分錢。以3萬月薪嘅打工仔為例，一年後就可以成功儲90,000！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
