偽映畫預告 | MIRROR副隊長江𤒹生（AK）將會喺7月29至7月30日，一連2日喺亞博舉行個唱。而Anson Kong早前亦推出新歌《偽映畫預告》，更同300位生粉一齊喺戲院睇首播，AK接受SAUCE專訪更表示演唱會有驚喜？下一首歌風格又會係點呢？
圖片來源：Instagram@jayfungmusic、_kisang_ | 撰文：Hedy
Anson Kong早前推出新歌《偽映畫預告》，一首描寫愛情嘅歌曲，更搵嚟馮允謙(Jay Fung)一齊作曲，由Oscar填詞！AK表示呢首歌係講述：「相信大家拍拖前都會幻想所有情節都會好似一個預告一樣咁美好，但當開始咗呢段關係之後就會發覺係一套爛片。」唔知大家聽完之後又感唔感受到當中嘅悲傷呢？
與Jay Fung合作作曲
繼2016年《不才》後再次作曲，當時仲係讀書時期交嘅學生功課，AK就指自己當時嘅作品唔成熟。反而今次有幸同Jay Fung呢位前輩合作，相當開心可以一齊創作，同時亦喺佢身上面學到點樣創作音樂。由於《偽映畫預告》呢首歌嘅音域相對較高，AK用咗好多時間去處理高音嘅部分，就連錄音嘅時候都有Jay Fung以及唱歌老師Guddy一齊幫手，相信大家絕對可以聽得出老闆嘅努力！
拍攝期間最深刻嘅係？
唔知各位生粉又搵唔搵到MV入面引用咗邊8大經典電影場景串連埋一齊呢？除咗有《La La Land》、《教父》、《花樣年華》、《無痛失戀》、《少年Pi的奇幻漂流》等之外，亦穿插咗唔同電影嘅劇情同服飾，MV入面有好多Details等大家再發掘～而AK拍攝期間對《教父》嘅電影場景最為深刻，當中係因為：「因為嗰個Set喺窗簾後面打落嚟個燈，我覺得好靚！」講到拍攝MV嘅時候，AK覺得自己開頭有少少尷尬，因為MV拍法通常都喺大頭啲同咪嘴，慶幸大家都睇得好開心。
AK透露愛情觀、歌曲風格同演唱會嘉賓！
而講到自己嘅戀愛價值觀，AK則表示：「其實我比較相信一見鍾情多過日久生情，因為日久嘅話通常個啲都會變成朋友。」今次出慢歌相信都令大家感到驚喜，就連老闆自己都揀唔到鍾意慢歌定快歌多啲，「如果做快歌我可以跳舞，喺舞台上可以表達嘅能量一定係大好多，但情歌嘅話係單純地去訴說內心自己一啲故事同感受。我都好鍾意呢兩種呈現方法，所以好難比較到究竟鍾意邊一個多啲。」無論係慢歌定快歌，相信一班生粉都會繼續支持老闆，AK更透露下一首歌嘅風格將會喺串得嚟又壞壞地嘅型格風？對於演唱會將會喺月尾舉行，AK希望一切可以順利，仲自爆嘉賓要搭飛機過嚟，好期待呀！
Make Up : Giann Cheung @Annie G. Chan Makeup Centre
Hair : Lorraine Lam@HairCulture
Wardrobe : I.T，Tassels
場地：梁煙號 @leungyanho.lounge
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
