黑芝麻甜品 | 黑芝麻，呢種充滿魅力嘅食材，喺香港嘅甜品界一直都係不敗嘅經典！由傳統嘅芝麻糊、流心湯圓，到近年興起嘅黑芝麻Tiramisu、忌廉卷，甚至連雪糕同咖啡都加入咗呢股「黑旋風」，將濃郁嘅芝麻香氣帶到味覺嘅各個層次。今次小編為大家搜羅咗全港多間黑芝麻甜品熱點，有米芝蓮推介嘅老字號、玩轉巴斯克蛋糕嘅新派烘焙店，仲有超值嘅港式奶昔，總有一款可以滿足你對芝麻香嘅所有幻想！
圖片來源：Openrice@siusinggg 、 @alicekyh 、@fung0715 、@Jacki19830529 、@Chloechancc 、@ arellawzw、@wingni_1024 | 撰文：Ginger
黑芝麻甜品香港 | 1. 暖心芝作
「暖心芝作」呢間小店憑藉對黑芝麻嘅堅持，成功榮登米芝蓮必比登小食推介2025，佢哋嘅黑芝麻採用古法「九蒸九曬」方式處理，再用石磨即場研磨成糊，確保芝麻香氣達到最濃郁嘅狀態。呢種傳統工藝製作出嘅芝麻糊、雪糕同黑芝麻豆漿等甜品，味道醇厚。特別推薦佢哋嘅黑芝麻雪糕，上面額外淋咗一層黑芝麻醬，連個雪糕筒都係黑芝麻味，真係不得了！另一款招牌黑芝麻菲林卷，口感軟燸Q彈，層次感豐富。
【INFO】 《暖心芝作》 地址：太子汝州街23號 營業時間：星期一至日 10:00 - 22:00 地址：天后電氣道13-41號凱旋大廈地下15&17號舖 營業時間：星期一至日 10:00 - 23:00
黑芝麻甜品香港 | 2. La Viña Bakery
人氣巴斯克芝士蛋糕店La Viña Bakery推出全新黑芝麻「暗黑」甜品系列，除咗有黑芝麻蛋糕，仲有超濃郁黑芝麻Latte、黑芝麻麻糬巴斯克蛋糕同黑芝麻麻糬吉士撻等，選擇非常多元化。佢哋嘅黑芝麻Latte非常濃厚，入口時可以感受到醇厚嘅黑芝麻香氣，配上牛奶嘅絲滑同淡淡苦澀嘅咖啡味，口感非常獨特。黑芝麻麻糬巴斯克蛋糕將濃郁嘅芝士味同香甜煙韌嘅麻糬完美融合，令綿密嘅巴斯克蛋糕口感更為豐富。
【INFO】
《La Viña Bakery》
地址: 銅鑼灣告士打道280號世貿中心地下G-09號舖
營業時間:星期一至日 10:30 - 19:30
黑芝麻甜品香港 | 3. Shake Shack
估唔到美式漢堡店Shake Shack都會靜雞雞加入黑芝麻熱潮！佢哋Menu上嘅一杯「Open Sesame」軟雪糕，係一個邪惡又足料嘅甜品。呢款軟雪糕用自家製雲呢拿軟香乳凍做底，配上濃郁嘅黑芝麻醬、Hakawa黑朱古力塊、黑芝麻金寶、糯米丸子同白芝麻粒，配料非常豐富。雪糕芝麻味香濃，口感滑順，而糯米丸子煙韌唔黐牙，食落好有咬口。最重要嘅係甜度拿捏得啱啱好，唔會過甜。
【INFO】
《Shake Shack》
地址: 全港Shake Shack分店
營業時間: 星期一至四 10:00 - 22:00；星期五至六 10:00 - 22:30；星期日 10:00 - 22:00
黑芝麻甜品香港 | 4. 陳茶館
芋圓控必食嘅「陳茶館芋圓甜品專門店」，原來喺啟德都開咗分店！呢間店除咗有大受歡迎嘅開心果西米露之外，佢哋嘅黑芝麻甜品都係深藏不露嘅寶藏！陳茶館嘅黑芝麻系列有雪燕西米露、豆乳及豆乳大滿貫3款甜品選擇。佢哋嘅甜品用料豐富，夠晒飽肚，而且仲特別加入芝麻仙草，令成碗甜品充滿濃郁嘅黑芝麻香氣。
【INFO】
《陳茶館》
地址: 啟德體育園啟德零售館1期G樓M1-011號舖
營業時間: 星期一至四 13:00 - 22:30，星期五至六 13:30 - 23:00，星期日 13:00 - 22:30
黑芝麻甜品香港 | 5. +bread
如果你追求健康、低負擔嘅烘焙甜品，咁+bread呢間主打低糖低油低脂嘅麵包店就一定啱你！佢哋堅信低糖油配方更能突出食材嘅本味，並堅持每天新鮮出爐，絕無添加劑、防腐劑。喺眾多烘焙產品中，佢哋嘅黑芝麻豆腐切件蛋糕絕對係黑芝麻迷嘅驚喜之作！蛋糕一切開，黑芝麻香氣瞬間瀰漫。豆腐慕斯如絲綢般滑過舌尖，黑芝麻粒喺唇齒間溫柔碾碎，尾調係淡淡嘅豆香回甘，層次豐富，食落完全唔甜膩，非常健康！
【INFO】
《+bread》
太子門店
地址: 旺角太子道西157號10號店
營業時間: 星期一至日 09:30 - 21:00
油麻地門店
地址: 油麻地窩打老道3B
營業時間: 星期一至日 08:00 - 22:00
黑芝麻甜品香港 | 6. 福元湯圓
講到最經典、最地道嘅中式黑芝麻甜品，又點少得屹立北角多年嘅老字號福元湯圓！呢間小店曾經榮獲米芝蓮街頭小食推介，保留舊式木紋枱凳，裝潢簡樸懷舊，充滿人情味。福元湯圓最馳名嘅就係佢哋每天手工搓揉嘅流心湯圓，提供黑芝麻、花生等口味。湯圓皮薄且滑，咬開之後有流沙，黑芝麻餡濃郁香甜。除咗堂食，店內仲提供生湯圓俾大家買番屋企自煮。
【INFO】
《福元湯圓》
地址: 北角炮台山福元街7號利都樓地下I-1號舖
營業時間: 星期一至日 16:00 - 00:00
黑芝麻甜品香港 | 7. shake!T
shake!T主打奶昔，並會不定期推出新口味，港式黑芝麻奶昔就係其中一個人氣之選。佢哋嘅港式黑芝麻奶昔（$45-$50）打得非常幼細，口感濃厚順滑，超足料！黑芝麻味濃到就好似喺食緊芝麻糊咁，麻香四溢，甜度適中，非常美味。每杯奶昔都用新鮮牛奶製作，口感介於冰淇淋同沙冰之間，滑順Creamy。你仲可以選擇自己鍾意嘅免費配料Toppings，令口感更豐富。
【INFO】
《shake!T》
地址: 旺角豉油街25-31號地下4A號舖
營業時間: 星期一至四 13:00 - 23:00；星期五至六 13:00 - 23:30；星期日 13:00 - 23:00
黑芝麻甜品香港 | 8. 蘇三甜蜜
銅鑼灣呢間新開嘅中式fusion甜品店「蘇三甜蜜」，以70年代港式懷舊復古風做主題，非常適合打卡！而佢哋嘅黑芝麻芒果冰蘇，就係將黑芝麻玩出新意嘅代表作，充滿創意。刨冰上面鋪咗一球豆腐雪糕球，中間夾住嘅黑芝麻醬超濃郁，一切開就會滿瀉出嚟，夠晒邪惡！底部仲有大量芒果粒，夠晒大份、足料又唔會太甜。
【INFO】
《蘇三甜蜜》
地址: 銅鑼灣加路連山道15號地舖
營業時間：星期一至日 14:00 - 23:00
黑芝麻甜品香港 | 9. 嘉多娜餅屋
人氣手工麵包店「嘉多娜餅屋」，憑藉出品嘅法式布甸包成功引嚟一股熱潮，而佢哋亦冇停過，不斷研發新口味！竹炭芝麻黑白布甸法包（$23），單係聽個名已經覺得非常吸引！法包餡料係燉蛋白同黑芝麻布甸，外層則係竹炭法包。最正嘅係，如果將佢加熱再食，布甸餡會流心得非常澎湃！法包一如既往地外脆內軟，而餡料甜度亦拿捏得啱啱好，芝麻味超級香濃！
【INFO】
《嘉多娜餅屋》
地址: 何文田窩打老道69號地下C2號舖
營業時間: 星期一至日 07:00 - 21:00
黑芝麻甜品香港 | 10. espresso alchemy
如果你係精品咖啡愛好者，同時又想試吓健康嘅甜品，咁本地精品咖啡烘焙品牌開設嘅 espresso alchemy 就啱晒你！呢間Cafe除咗有優質嘅咖啡豆，仲有供應多款輕食、主食同甜品。佢哋特別推出嘅生酮竹炭黑芝麻忌廉卷（$61），係一個非常適合關注健康嘅客人嘅選擇。呢款甜品係無麩質製作，竹炭蛋糕捲住黑芝麻忌廉。海綿蛋糕口感軟綿，中間嘅忌廉打得非常柔滑，充滿芝麻香氣。喺嘆住高質咖啡嘅同時，仲可以食到健康又美味嘅黑芝麻忌廉卷，非常寫意。
【INFO】
《espresso alchemy》
地址: 尖沙咀廣東道3-27號海港城港威商場地下G104號舖
營業時間: 星期一至五 08:00 - 20:30；星期六至日 10:00 - 20:30
黑芝麻甜品香港 | 11. 民豐麵粉行
如果你想食到最地道、最古早味嘅黑芝麻甜品，咁喺荃灣開業超過60年嘅老字號民豐麵粉行，就一定係你嘅目標！呢間店主打賣糯米糍同韭菜煎餅，係唔少荃灣人嘅集體回憶。佢哋嘅黑芝麻糯米糍絕對係必食！糯米糍上粉好足，唔會黏成一糰，外觀吸引。糯米皮皮薄餡多，口感軟熟而有咬口。最重要嘅係，芝麻餡煎香後更添層次，$7一粒嘅價錢，真係真心抵食！呢度嘅糯米糍，每一啖都充滿住濃郁嘅芝麻香同軟糯嘅口感，係一個非常滿足嘅甜品。
【INFO】
《民豐麵粉行》
地址: 荃灣街市街35號地舖
營業時間: 星期一至日 08:30 - 22:00
黑芝麻甜品香港 | 12. 豆公館
對於豆品愛好者嚟講，旺角呢間豆公館絕對係一個不能錯過嘅地方！店舖以落地大玻璃同開放式廚房示人，空間感十足，裝潢以大地色調配木系枱櫈為主，感覺非常舒服。豆公館嘅豆品都使用加拿大生產嘅黃豆，每日喺店內研磨煮成豆漿，再撞入木桶內凝固成豆腐花，確保豆腐花凝固出最佳效果。除咗最受歡迎嘅原味豆腐花，佢哋亦有黑芝麻豆腐花等9款甜食選擇，糖水方面仲有椰汁、花奶、黑糯米等口味。
【INFO】
《豆公館》
地址: 旺角登打士街43號地舖
營業時間: 星期一至日 08:00 - 23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
