香港拉麵｜香港地雲集各國美食，當中最受歡迎之一莫過於日本菜。除咗有不少日本過江龍連鎖餐廳，亦有多間小本經營嘅拉麵小店，誠意十足，絕對唔輸連鎖店！今次就幫大家揀選12大香港人氣拉麵小店，等你隨時都可以搵到一碗啱你口味嘅靚拉麵！
圖片來源：Openrice @eat4kcal、Openrice @foodilicious.hk、Openrice @JoyfullFoodstagram、Openrice @love_aryu_ling、Openrice @venusvenuscheung、Openrice @msinti、Openrice @waisikmao.、Openrice @Jackie bb、Openrice @混血小妹、Openrice @Sarah.Y、Openrice @bovet、Openrice @Sofoodiaries.hk、Openrice @hxs952094983、Openrice @faihung、Openrice @K_W維、Openrice @eatislove、Openrice @msfood__special、Instagram @kyoku_ramen、Openrice @Tse yip | 撰文：Icy
香港人氣拉麵小店 | 1. 木屋拉麵
開業十年嘅木屋拉麵曾獲Facebook拉麵關注組力推，雖然早前因長康市集關閉而暫停營業，但事隔兩個月終於喺青衣重新開業。店內只售賣慢煮叉燒拉麵、慢煮鴨胸拉麵、油麵、牛肉飯及玉子燒五款食物，當中拉麵只售$55！醬油湯底由店主精心慢煮十多小時，濃郁而不膩；慢煮叉燒肥瘦適中，麵條煙韌掛湯，加上溏心蛋、荀絲、生蔥絲等配料，水準媲美日本拉麵專門店！
【INFO】 木屋拉麵 地址：青衣青康路12號長康邨康泰樓地下4號舖 營業時間：星期一至六 12:00-16:00、18:00-20:00
香港人氣拉麵小店 | 2. 麵心國もと
麵心國もと來自東京葛飾區，由店主Kunimoto先生於2011年創立，以小店模式經營。香港為麵心國海外第一間分店，選用日本直送嘅食材，湯底以原材料熬煮足足六小時，加上四種自家製葱油、蒜油、雞油和貝柱油，錦上添花。再配上口感軟淋嘅厚切半肥瘦叉燒，充滿油香～
【INFO】 麵心國もと 地址：灣仔春園街12號永興樓地下2A號舖 營業時間：星期一至日 11:30-21:00
香港人氣拉麵小店 | 3. 幕多
位於尖沙咀嘅幕多拉麵，以招牌醬油蝦濃湯麵而聞名，湯底以100%鮮蝦熬製，淋上自家提煉嘅蝦油，啖啖都係精華。每隻鮮蝦都由店主親自剝殼，讓客人方便進食。麵條選用日本曲麵，爽口彈牙，增添層次感。客人唔夠飽嘅話，仲可以免費追加麵底，非常貼心～
【INFO】 幕多 地址：尖沙咀漆咸圍1號 營業時間：星期一至三 12:00-15:00、17:00-21:00 / 星期四 17:00-21:00 / 星期五至日 12:00-15:00、17:00-21:00
香港人氣拉麵小店 | 4. 泓一拉麵
位於紅磡嘅泓一拉麵主打自家製濃郁豚骨湯拉麵，湯底經十多小時以上熬製，全麥粒麵條彈牙掛汁。除咗豚骨湯，仲有雞白湯、鰹魚湯、醬油湯等等，配上慢煮雞胸或慢煮叉燒，入味得嚟又唔太膩～
【INFO】 泓一拉麵 地址：紅磡民泰街29號F4號舖 營業時間：星期一至日 12:00-16:00、18:00-21:00
香港人氣拉麵小店 | 5. 大叔拉麵
位於荔枝角嘅大叔拉麵，聽落個名好盞鬼，店舖以懷舊日式風格裝修，擺滿玩具及動漫figure，打卡一流～拉麵湯底可選雞白湯、牛骨湯、地獄辣湯等等，每款湯底都濃郁甘香，配上厚切半肥瘦灸燒黑豚肉，充滿火燒香氣。
【INFO】 大叔拉麵 地址：荔枝角D2 Place二期3樓314號舖15號 營業時間：星期一至日 11:00-21:30
香港人氣拉麵小店 | 6. 和拉麵
位於大埔嘅和拉麵，店主曾跟日籍大廚學藝，將正宗日式味道帶到香港，所以開業以來一直好受街坊歡迎。店主每日以約50公斤豬骨熬製新鮮湯底，味道馥郁芳香。灸燒叉燒亦都由店員自家醃製，充滿濃郁油香，誠意十足。
【INFO】 和拉麵 地址：大埔運頭街20號廣安大廈26地下J號舖 營業時間：星期一至日 12:00-15:00、18:00-22:30
香港人氣拉麵小店 | 7. 一人前拉麵
位於元朗嘅一人前拉麵，店面細細，只有十多個座位，但無阻支持者大排長龍。招牌白前拉麵嘅豚骨湯底呈奶白色，打到起泡，味道濃郁而不鹹，帶有鮮甜味。配上彈牙嘅幼麵條及嫩滑叉燒，令人食過返尋味！
【INFO】 一人前拉麵 地址：元朗建業街7號地舖 營業時間：星期一至五 13:00-15:00、18:00-22:00 / 星期六至日 13:00-16:00、18:00-22:00
香港人氣拉麵小店 | 8. 花丸軒
花丸軒來自日本大阪，2024年底首次進駐香港中環，餐廳裝潢充滿日式木系小店風格。店內最出名就係招牌慢煮豬軟骨拉麵，湯底味道濃郁，而重點就係大大條豬軟骨，經8小時慢煮，肉質非常嫩滑，充滿骨膠原，浸落湯底更加入味～
【INFO】 花丸軒 地址：中環荷李活道地下C舖安樂大廈C號舖 營業時間：星期一至日 11:30-22:00
香港人氣拉麵小店 | 9. 麵山口商店
麵山口商店由北海道大廚主理，招牌魚介豚骨湯拉麵，以豚骨、鯖魚及宗田鰹魚煙燻而成嘅魚乾、沙丁魚、昆布、冬菇等材料熬煮，加上紅蝦乾，味道豐富。大家仲可以追加「貓飯」，以生雞蛋、木魚及辣肉碎調味，配上湯底進食，充滿層次感。
【INFO】 麵山口商店 地址：油麻地廟街56至58號地下C號舖 營業時間：星期二至日 12:00-15:00、18:00-21:00
香港人氣拉麵小店 | 10. マヌル屋
位於牛頭角嘅マヌル屋由日本老闆主理，店面空間唔大，只有12個座位，所以門口經常大排長龍。餐牌上只有3款雞白湯拉麵，湯底煮到呈奶白色，每啖都係精華，而慢煮雞胸口感一啲都唔嚡，加入少量黑椒調味，令味道昇華！
【INFO】 マヌル屋 地址：牛頭角馬蹄徑5號 營業時間：星期二至日 11:30-15:00、18:00-21:00
香港人氣拉麵小店 | 11. 極之拉麵
位於長沙灣嘅極之拉麵雖然店面唔起眼，但出色嘅拉麵湯底令人驚艷。招牌廣島牡蠣濃湯拉麵，奶白嘅湯底味道濃郁，配上啖啖肉嘅廣島蠔同蠔仔，充滿鮮味。店主對湯底嘅質素十分執著，若果當日湯底煮得未如理想，就會索性唔開店，好有原則！
【INFO】 極之拉麵 地址：長沙灣元州街399號2號舖喜漾地下 營業時間：星期二至日 12:00-15:00、18:00-21:30
香港人氣拉麵小店 | 12. 幸屋
位於灣仔嘅幸屋，店面充滿日式街頭小店風格，主打豬骨湯底拉麵及沾麵，客人可自行選擇拉麵嘅粗幼及軟硬度、湯底濃度及辣度等等，DIY自己喜歡嘅口味。除咗叉燒拉麵，仲有比較特別嘅蠔拉麵，配有四大隻蠔，湯底濃郁鮮甜而無腥味，喜歡食海鮮嘅朋友唔好錯過～
【INFO】 幸屋 地址：灣仔機利臣街5-9A號維昌大廈 營業時間：星期一至日 11:00-16:00、17:30-22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
