祛濕湯水｜潮濕天氣會令人出現濕重情況，特別容易感到疲倦、乏力、渴睡，甚至會有水腫、脾胃失調、關節痛嘅問題，所以一定要諗方法祛濕。而煲祛濕湯就係最簡單直接嘅方法！喺湯水中加入健脾材料，仲可以同時清肝、清熱，一舉多得。
圖片來源：Instagram@pamelalo_cooknbake、Instagram@fatmuisoup、Instagram@kiuu922、Instagram@from_miss_to_mrs_2021、Instagram@kiki.is.cooking｜撰文：Tiffany
祛濕湯水｜1. 粉葛土茯苓赤小豆豬骨湯
赤小豆、薏米係最常見嘅祛濕食材，而土茯苓亦係一種較溫和嘅祛濕藥材，除咗可以除濕解毒之外，更有效改善關節痛嘅情況。
材料：粉葛1個、土伏苓2両、赤小豆1両、扁豆1両、生熟薏米1両、紅蘿蔔1條、蜜棗4粒、陳皮1塊、豬骨500克、水2.5公升
做法：
1. 凍水放入豬骨汆水，期間可加入少量米酒辟腥。水滾後幾分鐘盛起豬骨，洗淨備用。
2. 赤小豆、扁豆、蜜棗用水浸泡；陳皮浸軟、刮囊。
3. 土伏苓去皮、切片；粉葛及紅蘿蔔去皮、切件。
4. 煲滾水，放入所有材料。大火煲至滾起後，轉慢火煲2小時。
5. 加入少量鹽作調味，即成。
祛濕湯水｜2. 淮山茨實木瓜雞腳瘦肉湯
茨實有健脾醒胃、除濕、抗疲勞作用，加入補腎健胃嘅眉豆，非常適合袪濕。而木瓜有助消化、健脾胃、解毒消腫、降血壓等等，大大增加湯水嘅營養價值。
材料：木瓜1個、雞腳6隻、瘦肉12両、淮山1両、茨實1両、蓮子1両、眉豆半碗、花生半碗、陳皮1塊、水2.5公升
做法：
1. 淮山、茨實、蓮子、眉豆、花生洗淨浸軟。
2. 雞腳去甲；瘦肉、木瓜切件，備用。
3. 凍水放薑、瘦肉、雞腳汆水。水滾後幾分鐘盛起，洗淨備用。
4. 凍水放陳皮。水滾後放入所有材料。大火煲至滾起後，轉慢火煲2小時。
5. 加入少量鹽作調味，即成。
祛濕湯水｜3. 赤小豆花豆無花果蓮藕排骨湯
赤小豆有助袪濕、利水、解熱毒，加入「豆中之王」花豆，有效去水腫、健脾開胃、壯腎。而蓮藕最適合脾胃虛弱、消化不良嘅人飲，有助補氣養血。
材料：蓮藕1節、赤小豆2両、花豆2両、紅蘿蔔半條、無花果4粒、陳皮1塊、排骨12両、蜜棗4粒、淮山1両、水2.5公升
做法：
1. 赤小豆、花豆、蜜棗洗淨浸軟；陳皮浸軟、刮囊。
2. 紅蘿蔔、蓮藕切件備用。
3. 凍水放薑、排骨汆水。水滾後幾分鐘盛起，洗淨備用。
4. 凍水放陳皮。水滾後放入所有材料。大火煲至滾起後，轉慢火煲2小時。
5. 加入少量鹽作調味，即成。
祛濕湯水｜4. 老黃瓜薏米豬𦟌湯
老黃瓜味甘、性涼，有袪濕清熱、利水消腫、解暑嘅功效，好適合春夏天飲用。而薏米利濕健脾，可除寒濕，配合補氣血嘅豬𦟌煲湯就最啱。仲可以因應個人口味，加入粟米、栗子、紅蘿蔔等溫和食材，為湯水添加一份清甜。
材料：老黃瓜1個、生薏米2両、陳皮1塊、蜜棗4粒、豬𦟌半斤、水2.5公升
做法：
1. 陳皮浸軟、刮囊；生薏米、蜜棗洗淨浸軟。
2. 老黃瓜洗淨後一分為二，刮囊並切件。
3. 凍水放入豬𦟌汆水，期間可加入少量米酒辟腥。水滾後幾分鐘盛起豬𦟌，洗淨備用。
4. 凍水放入所有材料，以大火煲10分鐘後轉中火，煲1.5小時。
5. 加入少量鹽作調味，即成。
祛濕湯水｜5. 粉葛鯪魚湯
鯪魚性平、味甘，有健筋骨、行氣活血、去水除濕嘅作用，配合粉葛、赤小豆等食材一齊煲湯，清熱祛濕、健脾胃一流！而且粉葛仲有抗衰老、降糖、降脂功效，非常健康。
材料：粉葛300克、鯪魚1條、赤小豆1両、扁豆1両、豬肉300克、蜜棗4粒、薑3片、陳皮1塊、水3公升
做法：
1. 粉葛去皮、切件，洗淨後瀝乾備用。
2. 赤小豆、扁豆、蜜棗洗淨浸軟；陳皮浸軟、刮囊。
3. 凍水放薑、豬肉汆水。水滾後幾分鐘盛起，洗淨備用。
4. 將鯪魚劏好、洗凈，用廚房紙擦乾魚身，塗抹少量幼鹽醃大約15分鐘。
5. 燒熱鍋後加少量油，將鯪魚煎至兩邊呈微金黃色，之後放入煲湯魚袋中。
6. 煲滾水，放入所有材料及魚袋。大火煲至滾起後，轉慢火煲3小時。
7. 加入少量鹽作調味，即成。
祛濕湯水｜6. 冬瓜薏米湯
呢款湯水簡單易煲，老少皆宜！利濕清熱、健脾益氣，而且非常清甜，最適合口淡淡嘅時候飲。同時加入生薏米、熟薏米，湯水唔會太寒涼之餘，去水腫嘅功效仲會更加好！
材料：冬瓜800克、豬𦟌350克、生熟薏米1両、茨實1両、蜜棗2粒、元貝適量、陳皮1塊、粟米1條、水2公升
做法：
1. 冬瓜自行選擇去皮與否，然後切件；粟米切件。
2. 生熟薏米、茨實、蜜棗、元貝洗淨浸軟；陳皮浸軟、刮囊。
3. 凍水放入豬𦟌汆水，期間可加入少量薑及米酒辟腥。水滾後幾分鐘盛起豬𦟌，洗淨備用。
4. 凍水放入所有材料，大火滾起後轉中火，煲2小時。
5. 加入少量鹽作調味，即成。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
