西環街坊同甜品控又有新據點喇！位於石塘咀山道嘅型格洗衣店內，最近開咗間全新乳酪概念店Chill Hill，由毗鄰人氣Cafe「廿一由八」主理人兼藍帶廚師Shena親自打造，主打將等待洗衫嘅時間，變做品嚐乳酪嘅 Chill 爆時刻！
圖片來源：官方圖片｜撰文：Sharon
以為洗衫一定好無聊？今次Shena將浪漫同美味帶落西環！身為人氣Cafe「廿一由八」嘅主理人兼法國藍帶廚師，Shena一直好想將對烹飪嘅熱愛延伸至社區。今次佢特意將「Chill Hill」嵌入型格洗衣店入面，等大家喺等待洗衣嘅過程，可以好好放慢腳步，享受一杯用心製作嘅高質感乳酪。
拒絕傳統軟雪糕機！獨家自家調配乳酪磚
Chill Hill唔用傳統依賴打入空氣/乳化劑嘅雪糕機，而係特別採用100%澳洲純乳酪同法國忌廉，自家調配成高密度乳酪磚，即場用高扭力機器製作！質地極致順滑，而且零人造植物油、零反式脂肪，食得出Real Froyo嘅純粹天然風味！
Clean Label 零罪惡感！低糖健康之選
減緊肥或者健身人士都唔使驚！全店全面棄用白糖同高果糖漿，改用成本較高嘅天然海藻糖，甜度只有傳統白糖嘅45%！唔單止可以有效減低血糖波動，仲完全唔會甜膩，真係食多兩口都冇罪惡感！
特色口味同自由搭配
– Curated Creations系列（$50起）： 推薦有雜莓、蜂蜜配雲呢拿嘅「Very Berries」，同埋充滿中東風情、結合意大利黑醋、開心果碎同椰棗嘅「Medi Delight」！Soft Opening 期間會先提供4款選擇，全系列共有 8 款！
– DIY 自主搭配（$40起）： 自選NomNom、Happy或Burrrp杯，隨心match各款blends、toppings同醬料！由經典嘅Lotus脆餅碎、Brownies，到特色嘅玄米脆脆、開心果，甚至牛油果、無花果等原型食物應有盡有！
品牌仲有兩個超萌吉祥物！「Chill」係一團柔軟嘅乳酪小精靈，而「Hill」就係個害羞嘅禿頭男生。每當Chill坐喺Hill頭頂，就變成最完美嘅「頭髮」！可愛又充滿玩味～做完運動想獎勵自己、做完野想放空，定係等緊洗衫？快啲約埋朋友去西環Chill下啦！
【INFO】
《Chill Hill》
地址：石塘咀街山道31-37號A舖 (香港大學港鐵站B出口)
營業時間：中午12:30至晚上9:30（星期一休息）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
