香港機場美食2026｜每次去機場等上機或者接機唔知食咩好？無論係禁區內定係非禁區，香港國際機場都有各式美食選擇！即刻幫大家精選11間人氣餐廳，咁下次去機場就知有咩美食選擇喇！
圖片來源：Openrice @TUEN TUEN、@Hello Nolo、@ML Law、@lazyszeman、@Maggie and Kitty、@蕙食貓、@食之無味2022318、@apjrxhym8jm7、@Deedeelau、@clarasy、@bichon cool cool、@老鬼頭、pangpangpang2029、官方圖片 | 撰文：Ginger
【非禁區餐廳】
機場美食推薦｜1. 牧羊少年咖啡館
牧羊少年咖啡館位於接機大堂，摒棄了傳統機場餐廳嘅現代感，反而改用「香港電車綠」為主調，並融入咗唔少香港傳統文化嘅復古裝飾與地道風情，超啱大家慢落嚟享受All Day Breakfast！當中仲有5款機場店限定嘅丹麥厚吐司系列，包括牛奶炒蛋牛柳片 蓋 丹麥厚吐司、三重芝士火腿 焗 丹麥厚吐司、藍莓蜜糖希臘乳酪焗丹麥厚吐司、焦糖蘋果肉桂焗丹麥厚吐司以及草莓山丘焗丹麥厚吐司。鍾意飲咖啡嘅你仲要試埋機場店限定嘅創意咖啡系列，包括紅豆沙沙、合桃物語、芝麻開門以及楊枝甘露，將傳統糖水加入咖啡之中。
【INFO】
《牧羊少年咖啡館》
營業時間：星期一至星期日 06:00至00:00
地址：赤鱲角暢達路1號香港國際機場機場一號客運大樓(非禁區)抵港層5樓5T150號舖
機場美食推薦｜2. 何洪記
何洪記係米芝蓮一星老字號，招牌正斗鮮蝦雲吞麵用全鴨蛋竹昇麵，爽口彈牙仲有淡淡蛋香，雲吞包住原隻鮮蝦，咬落爽脆。柱侯牛筋腩炆到淋滑入味，撈埋辣椒油食更加惹味。此外，餐廳亦有點心選擇如流汁叉燒包、蟹子棉花雞等。
【INFO】
《何洪記》
地址：赤鱲角香港國際機場一號客運大樓5樓抵港層接機大堂5T161號舖(非禁區)
營業時間: 星期一至日 07:00 - 23:00
機場美食推薦｜3. FINEPRINT
想嘆咖啡同輕食嘅你絕對唔可以錯過FINEPRINT！FINEPRINT嘅咖啡豆嚟自世界各地，仲會每個禮拜日喺柴灣新鮮烘焙！絕對要試埋用酸種麵包製作名嘅Ricotta Toast，酸種麵包烤得金黃酥脆，再加埋藍莓、蜂蜜以及厚乳酪，啖啖滿足～
【INFO】 《FINEPRINT》 營業時間：星期一至星期日 06:00至23:00 地址：赤鱲角暢達路1號香港國際機場機場一號客運大樓(非禁區)抵港層接機大堂5樓
機場美食推薦｜4. 青悅越泰料理
青悅越泰料理主打生牛肉河粉，湯底用牛骨加香料煲製而成，牛肉片用熱湯淋到半生熟，非常嫩滑。另有炭燒類、咖喱、地道小菜及地道飲品選擇，定價大約$100至200。
【INFO】
《青悅越泰料理》
地址：香港國際機場機場一號客運大樓 (非禁區) 8樓離港層8T011-012號舖
營業時間: 星期一至日 06:00 - 23:45
機場美食推薦｜5. can‧teen
Can‧teen定價親民，每款食物$50左右有交易。例如有常餐、迷你魚湯粉、特色熱狗、燒味、出前一丁即製西多士等選擇，想上機前食多餐香港嘅地道嘢食，嚟呢度就啱哂啦！
【INFO】
《can‧teen》
地址：赤鱲角香港國際機場一號客運大樓離港層大堂7樓7T090號舖 (非禁區)
營業時間: 星期一至日 06:00 - 22:00
機場美食推薦｜6. 翡翠拉麵小籠包
開放式廚房見到師傅即拉麵條，小籠包即蒸熱辣辣上枱。招牌「翡翠小籠包」皮薄湯多，咬開爆汁，配埋鎮江醋食更提鮮。重口味必試紅油牛肉拉麵，牛𦟌炆到淋滑入味。環境光猛闊落，一家大細食飯都坐得舒服，人均$100左右。
【INFO】 《翡翠拉麵小籠包》 地址：赤鱲角香港國際機場1號客運大樓5樓5T161號舖（非禁區） 營業時間: 星期一至日 07:00 - 23:00
【禁區餐廳】
機場美食推薦｜7. Emmer Pizza, Bar & Café
Emmer Pizza, Bar & Café 為大家呈獻香港唯一以有機古穀 Emmer 製作嘅特色Pizza，融合穀物純粹風味，經由人工研磨並發酵足足兩天，再放入特製嘅旋轉鋼窯中高溫烘烤，打造外酥內韌嘅獨特口感！餐廳更全天候供應匠心披薩、精緻糕點及特色雞尾酒！
【INFO】 《Emmer Pizza, Bar & Café 》 營業時間：07:00至01:30 地址：赤鱲角暢達路1號香港國際機場機場客運大樓(禁區)7樓離港層7E124號舖
機場美食推薦｜8. 鏞記
想喺離港之前一嘆地道粵菜就一定要嚟鏞記試試，除咗以祖傳秘方及傳統烹調技巧炮製炭燒燒鵝之外，更有蜜汁叉燒、豉油雞、麵包蟹以及皮蛋酸薑等馳名菜式，一解大家離港前嘅港式燒味癮！
【INFO】 《鏞記》 營業時間：星期一至日 12:00至22:00 地址：赤鱲角香港國際機場一號客運大樓禁區6樓離港層近40至80號登機閘口美食廣場
機場美食推薦｜9. 霸嗎拉麵
霸嗎拉麵以豬骨湯底聞名，湯底用豬頭骨熬十幾個鐘，非常濃郁。招牌炙燒豚肉拉麵有兩塊非常厚嘅叉燒，表面燒到微焦帶炭香，肉質軟嫩。麵條可以自選軟硬度，掛湯力一流，食到尾都唔會變淋，上機都可以享受一番！
【INFO】
《霸嗎拉麵》
地址：赤鱲角暢達路1號香港國際機場機場一號客運大樓 (禁區)東大堂7樓7E162號舖
營業時間: 星期一至日 08:30 - 21:00
機場美食推薦｜10. 莆田
新加坡米芝蓮一星福建菜進駐機場！莆田主打地道風味，招牌福建海鮮滷麵用蝦湯做底，加入蠔仔、蜆肉同白菜仔，湯頭鮮甜，麵條吸盡精華超入味。另有提供廈門沙茶麵、興化炒米粉及農家芥菜粥配油條等選擇。
【INFO】
《莆田》
地址：赤鱲角香港國際機場一號客運大樓離港層東大堂7樓7E181號舖
營業時間: 星期一至日 07:00 - 20:00
機場美食推薦｜11. 都爹利會館
呢間中環高級中菜館將藝術館同餐廳合體，而禁區分店繼續保持格調，喺機場都可以體驗貴氣茶記。機場分店提供點心拼盤套餐、素粉果湯麵套餐、點心、燒味及甜品等選擇，種類繁多。
【INFO】
《都爹利會館》
地址：赤鱲角香港國際機場一號客運大樓離港層東大堂7樓7E161號舖
營業時間: 星期一至日 06:00 - 23:30
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
