月餅 | 12大人氣星級月餅推介，創新聯乘禮盒/特濃版流心貓山王榴槤

月餅 | 中秋節就快到，又係時候揀月餅送禮同一家人團聚。今年各大品牌繼續推出琳瑯滿目嘅中秋禮盒，由本地老字號、人氣手工品牌，到星級酒店及國際品牌都各有特色。除咗經典雙黃白蓮蓉、流心奶黃，今年仲有開心果、榴槤、抹茶、黑芝麻等創新口味，甚至加入低糖配方、燕窩等元素，照顧唔同人士需要。除咗餡料越玩越有創意，今年唔少品牌亦喺禮盒設計花盡心思，有可重用環保便當盒、限定聯乘角色禮盒、收藏級包裝等，無論送禮定自己收藏都相當有心思。加上現時大部分品牌已推出限時早鳥優惠，想買得抵就記得趁早入手！以下精選 12 個人氣月餅品牌，等大家輕鬆揀到心水中秋禮盒。

圖片來源：官方圖片 ｜ 撰文：Ginger

月餅2026 | 1. Häagen-Dazs™️ 月餅

雪糕月餅一直係唔少大人小朋友嘅中秋摯愛。今年 Häagen-Dazs™️ 繼續為大家帶嚟驚喜，除咗經典嘅皇牌雪糕月餅，更重磅推出極具話題性嘅Toy Story 雪糕月餅，隨盒仲會隨機附送限量版中秋毛絨公仔一款 (總共四款，隨機一款)，粉絲見到一定心動。口味方面一盒有4件指定口味雪糕月餅：呍呢嗱(1件)、焦糖脆餅(1件)、比利時朱古力(1件)、士多啤梨 (1件)。

【INFO】
《Häagen-Dazs™️》
地址：全線 Häagen-Dazs™️ 分店

月餅2026 | 2. 聖安娜月餅

今年聖安娜以「聚好．有你」為主題，聯乘代言人 MC 張天賦推出全新中秋系列。經典四黃白蓮蓉月餅繼續保留傳統風味，選用幼滑白蓮蓉配上四顆金黃鹹蛋黃，滿滿節日儀式感。 流心系列亦加入多款新口味，包括茗茶流心、黑芝麻流心及比利時朱古力脆皮棒棒冰皮月餅，為傳統月餅帶來更多新鮮感。

【INFO】
《聖安娜餅屋》
地址：全港聖安娜餅屋分店

月餅2026 | 3. 望月月餅

望月今年繼續推出多款人氣流心月餅，當中招牌流心奶黃月餅（8件裝）推出早鳥優惠，優惠價 HK$288（原價 HK$378）。除咗經典奶黃外，仲有開心果、抹茶、黑芝麻及榴槤等口味選擇。今年更推出布甸狗及 Opanchu Usagi 褲褲兔聯乘限定禮盒，可愛度滿分，送禮特別吸睛。

 【INFO】
《望月》
地址：全港望月分店

月餅2026 | 4. 研香

本地手作甜品品牌「研香」今年中秋更首度聯乘老字號「奇華餅家」推出「港式甜品麻糬月餅禮盒」$218，堅果與甜品控絕對要試！佢哋將特濃開心果同石磨黑芝麻等招牌風味融入月餅餡料之中，並加入煙韌軟糯嘅麻糬夾心。

【INFO】
《研香》
地址：全港 6 間分店（銅鑼灣、尖沙咀、寶琳、馬鞍山、沙田、青衣）及網店

月餅2026 | 5. 奇華月餅

本地老字號「奇華餅家」嘅至尊月餅系列一直堅持百分百香港製造，除咗為大家帶嚟最經典嘅雙黃純白蓮蓉、金華火腿五仁同埋迷你余仁生陳皮豆沙等傳統口味之外，更推出多款極具話題性嘅創新聯乘禮盒！重點推介包括與本地甜品品牌「研香」強強聯手嘅港式甜品麻糬月餅、NOC 咖啡月餅精選禮盒、LINE FRIENDS 旋轉音樂禮盒，完美糅合傳統與現代口味。

【INFO】
《奇華餅家》
地址：全線奇華餅家分店

月餅2026 | 6. 香港皇玥月餅

由半島奶黃月餅始創人葉永華師傅帶領嘅米芝蓮團隊主理，香港皇玥嘅月餅絕對係每年中秋嘅品質保證。今年主打「一分鐘室溫流心」技術，招牌流心奶黃月餅切開後無需加熱，金黃流心即可緩緩流動，入口如絲緞般柔滑。口味方面，除咗經典奶黃同陳皮紅豆沙，仲有全新升級嘅特濃版流心貓山王榴槤同軟心開心果月餅。品牌亦貼心照顧健康一族，推出單件含糖量低至 1.1 克嘅低糖系列，食得輕盈無負擔。

【INFO】
《香港皇玥》
地址：全港多間皇玥分店

月餅2026 | 7. Starbucks月餅

今年中秋，星巴克 Starbucks 以月夜星空為靈感嘅全新月餅禮盒，經典美人魚於月下舉杯嘅包裝設計充滿浪漫節日氣氛。一盒可以試齊三款精心研發嘅口味：包括鹹甜交織嘅「流心奶黃月餅」、口感層次豐富嘅「流心榛子咖啡月餅」，仲有細滑煙韌嘅「黑芝麻麻糬月餅」。作為咖啡迷嘅首選，禮盒更貼心跟配兩包派克市場綜合濾掛咖啡及一張中杯裝手調飲品券，一邊歎月餅一邊飲咖啡，完美解膩！由即日起至2026年8月31日，於網上商店購買電子券更可享早鳥優惠價 HK$331（原價 HK$368），買滿 HK$350 即可享免運費，絕對係中秋送禮自奉嘅時尚之選。

【INFO】
《Starbucks》
地址：全港星巴克分店 (指定分店除外)

月餅2026 | 8. 香港半島酒店嘉麟樓月餅

作為迷你奶黃月餅嘅始祖，香港半島酒店嘉麟樓每年推出嘅月餅絕對係備受追捧嘅矜貴之選。今年除咗極具人氣嘅「經典迷你奶黃月餅」（每盒 HK$688），更特別呈獻精緻嘅「限量心盈迷你奶黃月餅」，心形造型寓意愛與團圓，加上以嘉麟樓流金歲月彩繪玻璃窗為靈感嘅典雅禮盒，送禮別具心思。另外仲有全新四川風味及潮式手工辣椒醬，同埋極盡奢華嘅中秋豪華禮品籃可供選擇。

【INFO】
《嘉麟樓》
地址：九龍尖沙咀中間道18號半島酒店1樓

月餅2026 | 9. 香港麗思卡爾頓酒店月餅

今年中秋，香港麗思卡爾頓酒店為大家帶嚟一系列極具氣派嘅月餅禮盒同中秋精選禮物籃，絕對係尊貴送禮嘅首選。今年嘅主打推介有「映。月」迷你低糖流心奶黃月餅禮盒（8個裝），迎合現代人健康訴求嘅低糖配方加上濃郁流心，食得輕盈又滿足。另外仲有米芝蓮星級食府天龍軒限量推出嘅「自家製迷你奶黃月餅及精選特級紅茶禮盒」，配搭一絕。為方便佳節送禮，酒店更貼心準備咗包含南非8頭鮑魚、Barons de Rothschild 香檳等矜貴食材嘅中秋禮物籃。

【INFO】
《香港麗思卡爾頓酒店》
地址：西九龍柯士甸道西1號環球貿易廣場酒店9樓大堂

月餅2026 | 10. 香港置地文華東方酒店月餅

香港置地文華東方酒店嘅月餅向來以充滿藝術感嘅前衛設計見稱。今年精心呈獻嘅「光影流螢月餅禮盒」將紫羅蘭、瓊花同土沉香嘅印花與壓線細緻呈現，展現出低調奢華嘅時尚魅力。最特別之處在於禮盒內附燈泡及電池，搖身一變即可成為柔光燈籠、優雅嘅裝飾燈盒，甚至係精緻小巧嘅珠寶盒，創意與實用性兼備。盒內藏有六個按照酒店獨家食譜製作嘅迷你奶黃月餅，香濃幼滑，小巧玲瓏嘅尺寸啱啱好。

【INFO】
《香港置地文華東方酒店》
地址：中環皇后大道中15號置地廣場

月餅2026 | 11. 香港逸東酒店逸東軒月餅

連續十年蟬聯米芝蓮一星嘅星級食府「逸東軒」，今年中秋繼續由星級大廚譚棟帶領團隊匠心打造月餅禮盒，主打兩款極具人氣嘅口味，包括人見人愛嘅「逸月流金」禮盒（一盒六個）同埋「逸月薈萃」禮盒（一盒六個）。禮盒設計高貴典雅，盡顯米芝蓮星級氣派，無論係與家人共享抑或商務贈禮都非常合適。

【INFO】
《逸東軒》
地址：九龍彌敦道380號香港逸東酒店B2樓層

月餅2026 | 12. 香港半島酒店咖啡廳月餅

半島精品店與咖啡廳出品嘅經典月餅同樣係每年中秋嘅搶手貨，如招牌「迷你奶黃月餅」（8個裝 HK$488）、「迷你奶黃及白蓮蓉月餅」（8個裝 HK$498）以及氣派十足嘅「七星伴月」禮盒（HK$748）。

【INFO】
《半島精品店與咖啡廳》
地址：九龍尖沙咀梳士巴利道半島酒店商場地庫BL1號鋪

——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk