香港Cafe2025 | 無論係想放假嘆杯咖啡，食個甜品放鬆下，定係想搵個地方同朋友坐低傾下計，小編都推薦大家試試香港唔同特色嘅Cafe，除咗可以影相打卡，又可以畀你身心都放鬆嘅一個地方，即刻睇睇呢16大香港Cafe啦！
香港打卡Cafe | 1. Ztoryhome
Zstoryhome為大家提供一個療癒空間，等大家可以真正靜落嚟品嚐茶，每款茶名別具特色例如「莫生氣」以及「笑春風」等，又可以幫大家養身。Cafe以木系為設計，樓底高再加上全落地玻璃嘅設計，採光度加上空間感十足，絕對可以令你喺度完全放鬆身心。店鋪更會提供繪本、藝術以及音樂，令大家Relax之餘同時照顧埋自己嘅心靈。Ztoryhome為大家提供輕食以及由社企糕點時光製作嘅甜品，嚟到絕對要試試！
【INFO】 《Zstoryhome》 營業時間：星期三至日 11:00至18:00 （星期一及二休息） 地址：西環西營盤皇后大道西118號地舖
香港打卡Cafe | 2. Bougel Cafe & Bakery
Bougel Cafe & Bakery以田園風為裝潢，室外有露天座位，天氣涼涼地嘅時候坐喺度相當有feel。而室內配搭埋綠色梳化以及啡色，就好似置身於法式小花園入面用餐咁。一入到去玻璃櫃入面就擺滿新鮮出爐嘅麵包，仲有大熱貝果，每款都係由藍帶師傅出產嘅手工麵包！餐廳嘅飲品更會有拉花例如係兔仔以及貓貓等，相當可愛。
【INFO】 《Bougel Cafe & Bakery》 營業時間：星期一至日 10:00至21:00 地址：屯門屯門鄉事會路2A號愛定商場(H.A.N.D.S) A區1樓A-126號舖
香港打卡Cafe | 3. Latter Cafe
Latter Cafe以奶油風為裝潢，再配搭埋門口嘅草藤凳以及可愛嘅熊仔，簡直係打卡able，超適合喺度影翻張靚相！每當節日嘅時候都會推出期間限定嘅甜品同飲品，超有節日氣氛。無論係環境、食物定係甜品都會令你滿意，最適合同一班fd一齊嚟！
【INFO】 《Latter Cafe》 營業時間：星期一至日 08:00至18:00 地址：灣仔謝斐道151-153號金聲大廈地下E號舖
香港打卡Cafe | 4. Tanuki Innovation
由ERROR成員郭嘉駿（193）主理嘅Tanuki Innovation，以精緻咖啡以及西日料理輕食為主，空間寬敞舒適之餘，大家仲可以嚟嘆杯咖啡飽覽維港海景，相當Chill！同場更設有193時裝品牌LILABOC，等大家可以直接將潮流服飾精品帶返屋企～
【INFO】 《Tanuki Innovation》 營業時間：星期一至日 12:00至21:00 地址：尖沙咀梳士巴利道3號星光行誠品生活2樓L201-203號舖
香港打卡Cafe | 5. Pause It
位於元朗新商場YOHO MIX入面嘅Pause It，繼續以純白簡約風為設計，採光度高之餘空間又夠寬敞，絕對適合大家喺度渡過一個美好嘅下午。嚟度絕對必點招牌拉花熱飲，上面隨時都會唔同動物出現例如柴犬、兔仔以及龜等等，睇得又飲得！
【INFO】 《Pause It》 營業時間：星期一至日 10:00至22:00 地址：元朗朗樂路1號元點L1 樓B120號舖
香港打卡Cafe | 6. Days in the sun
店鋪以純白色為主調，再以唔同嘅花做裝飾，帶畀人一種溫暖治癒嘅感覺。當中大家必試主打熱食手作北京餃子set，每一粒都係由店主親手包，更有6種口味例如黑松露三重芝士豬肉、三鮮豬肉以及韭菜豬肉等等。一啖餃子，一啖咖啡，絕對係一種新體驗～
【INFO】 《Days in the sun》 營業時間：星期一至三、星期五至日 11:00至20:00 （星期四休息） 地址：元朗鳳攸北街9A昌威大廈地下28號舖
香港打卡Cafe | 7. Mountain Coffee
MOKO新開張嘅mountain coffee，絕對可以滿足女士們打卡同時食好嘢嘅條件～有齊近期大熱嘅牛角包脆餅、去日本必食嘅蒙布朗，一間鋪頭就食到！店鋪更係寵物友善餐廳，無論係大細狗都相當歡迎，咁大家就可以帶埋毛孩們一齊嚟試試。
【INFO】 《Mountain Coffee》 營業時間：星期一至五 08:30至21:30；星期六至日 09:00至21:30 地址：旺角太子道西193號MOKO新世紀廣場4樓433號舖
香港打卡Cafe | 8. Loop Kulture
深水埗近年都出現唔少文青Cafe，Loop Kulture佔地兩層高，地下以大自然植物為主，想打卡嘅就必定要去2樓欣賞露營風嘅擺設。焦糖繽紛雜果樹頭麵包製作時間雖然要30分鐘，但相當值得，一咬落去外脆內軟，仲聞到相當香嘅蛋味，食啖雪糕更將味道昇華！
【INFO】 《Loop Kulture》 營業時間：星期一至日 10:00至18:00 地址：深水埗鴨寮街90號地舖
香港打卡Cafe | 9. 半路咖啡
咖啡愛好者絕對要嚟半路咖啡試試，無論係堂食定係外賣，都會用中式萬壽無彊杯再配搭上西式咖啡，中西結合相當特別！充滿舊式香港風味之餘又滿足到大家打卡嘅心願。店鋪入邊亦有唔少古董裝飾，夠晒有特色。
【INFO】 《半路咖啡》 營業時間：星期一至日 08:00至18:00 地址：上環摩羅上街26號華冠大廈地舖
香港打卡Cafe | 10. 十常八九
十常八九為日式風格嘅Cafe，可以體驗日式甜品以及榻榻米，由於店鋪空間唔大，大家可能都需要留電話等候。當中嘅招牌一定要試和栗蒙布朗，出面滿佈栗子蓉，而入面就係雪糕同埋蛋白餅，口感豐富，適合同朋友Share一齊食。
【INFO】 《十常八九》 營業時間：星期三至日 12:00至19:00 （星期一至二休息） 地址：深水埗黃竹街2號地舖
香港打卡Cafe | 11. 蟲二
蟲二位於旺角上海街618天台位置，除咗有室內冷氣位之外，亦有室外露天位置，種滿咗花花草草～鋪頭主打一汁三菜套餐，一個餐有齊湯、小食以及主菜等選擇，仲可以任添湯以及飯，相當抵！
【INFO】 《蟲二》 營業時間：星期一至日 12:00至21:30 地址：旺角上海街618號頂樓
香港打卡Cafe | 12. Ask Cafe
嚟Ask Cafe建議大家可以試試2D打印咖啡/朱古力，只要向餐廳提供圖片作打印，就會幫你變成獨一無二嘅咖啡或者朱古力，好可愛～場內亦加入咗唔少花同植物嘅佈置，就好似行入咗花花世界一樣，適合大家去打卡。
【INFO】 《Ask Cafe》 營業時間：星期一至五 08:00至19:00；星期六 10:00至19:00 (星期日休息） 地址：觀塘偉業街223號宏利金融中心B座地下G02號舖
香港打卡Cafe | 13. Boholic
Boholic裝修行波希米亞風，選用白色為主調，令人感覺清新舒適，同場亦有唔少靚靚打卡位，相信一定可以滿足到各位少女～大家仲可以同朋友食精緻嘅High Tea Set，以鳥籠為造型，提供3款鹹點及5款甜點畀大家～餐廳更係寵物友善餐廳，大家可以帶埋毛孩一齊打卡。
【INFO】 《Boholic》 營業時間：星期一至日 11:30至22:00 地址：長沙灣福華街561號君凱豪庭地舖及1樓
香港打卡Cafe | 14. The Hideout
想真正咁遠離市區就可以考慮同朋友入梅窩玩玩，入面仲有一間隱世嘅打卡Cafe，超有渡假Feel，如果好彩更有機會可以坐喺湖邊影相。大家記得要預先預約同埋避開中午嘅時間前往，如果唔係就會不斷出汗。夏天嘅時候記得要搽埋防曬同噴蚊怕水。
【INFO】 《The Hideout》 營業時間：星期一、三至五 09:00至18:00；星期六至日 09:00至19:00 （星期二休息） 預約網站：https://bit.ly/4bYFpVJ 地址：大嶼山梅窩銀礦灣路
香港打卡Cafe | 15. Lab Zerõ
佔地過千呎嘅小清新cafe LAB ZERÕ，門口有落地大玻璃，一入去就已經被仙人掌包圍，天花吊更有雲朵燈超特別，超適合大家打卡～店鋪主打日式刨冰，更係由日本直送嘅冰磚製作，口感份外綿滑，有草莓芝士蛋糕、芋泥芋圓牛乳以及宇治金時等口味選擇。
【INFO】 《Lab Zerõ》 營業時間：星期一至日 12:00至21:00 地址：尖沙咀金巴利道68號地下B號舖
香港打卡Cafe | 16. Lento
九龍城除咗食泰國菜之外，亦可以選擇喺舒服嘅環境下，享受慢活人生～就算開始減磅嘅人士都有唔少相對較為健康嘅選擇例如沙律以及吞拿魚牛油果夏威夷蓋飯等，每款菜式就好似藝術品一樣咁精緻，健康得嚟又可以打卡！
【INFO】 《Lento》 營業時間：星期一至日 07:30至20:00 地址：九龍城太子道西428-430號地舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
