台式美食 | 相信好多香港人去台灣旅行時，就算要一大早起身，都一定會食台灣早餐，款式多元化又飽肚。雖然香港飛台灣好方便，但有時口痕起上嚟，都會想即刻品嚐到地道台灣早餐。今次小編就整合咗9大香港台灣早餐店，等大家過吓口癮！
圖片來源：Openrice @hk.happyeat、Openrice @kath_hooooo、Openrice @celias C、Openrice @Eugene F、Openrice @Jhcc09、Instagram @deer.all、Openrice @caca.ate.too.much、Instagram @toastmanhk、Openrice @Irismayy、Openrice @nomsinhk、Openrice @happyfriday88、Openrice @檸檬_米奇、Openrice @楚辰Magnolia、Openrice @Floracyy | 撰文：Icy
台式美食推薦 | 1. 黑布小巷
位於荔枝角工廈嘅黑布小巷，主打台灣小食、便當及甜品，當中招牌慢烤雞腿芝士蛋吐司，肉嫩多汁，多士經過烤烘後外脆內軟，而流心拉絲芝士配上秘製醬汁，簡直令人留晒口水～另外亦供應蛋餅、滷肉飯、烤香腸、桂圓芋圓等多款地道台式食物，味道正宗，吸引唔少街坊捧場！
【INFO】 黑布小巷 地址：荔枝角長沙灣道883號億利工業中心4樓405室 營業時間：星期一至日 11:30-21:30
台式美食推薦 | 2. 老厝邊
位於荃灣嘅老厝邊，主打多款台灣美食，例如滷肉便當、粉麵等。當中蛋餅較爲出名，即叫即煎，款式選擇有玉米、芋泥、香蔥牛肉、薯餅及肉鬆。煎蛋餅皮一啲都唔厚粉，煎到金黃焦脆，充滿蔥油香，配上秘製醬汁及流心芝士，令人食過返尋味！
【INFO】 老厝邊 地址：荃灣大壩街25號地舖 營業時間：星期一至日 11:30-22:00
台式美食推薦 | 3. 羅東肉焿番
位於元朗嘅羅東肉焿番來自台灣宜蘭，喺香港首間正宗台灣肉焿店，而店內嘅芋泥產品亦非常出名～當中包括招牌芋泥肉鬆蛋餅、芋泥肉鬆吐司、芋泥西多士、芋泥紅豆甜煎餅等，芋泥唔會過份甜膩，厚厚一層夾喺蛋餅或麵包入面，口感綿密鬆軟，食落幾清新！
【INFO】 羅東肉焿番 地址：元朗鳳翔路69號建輝大廈地下5號舖 營業時間：星期一至日 11:00-21:00
台式美食推薦 | 4. 麋鹿小孩
位於天后嘅麋鹿小孩喺街邊嘅台灣早餐外賣店，由居港台灣人主理，雖然食物種類唔多，但仍然吸引唔少街坊排隊幫襯。食材由台灣直送，即叫即做，招牌美食包括黑胡椒鐵板麵、蛋餅、翅包飯、吐司、奶茶，當中蛋餅最平$35，夾住玉米及芝士等餡料，鹹甜適中好惹味！
【INFO】 麋鹿小孩 地址：天后水星街27號地下S號舖 營業時間：星期一至五 08:00-14:00 / 星期六至日 09:30-15:00
台式美食推薦 | 5. 大吃大喝
位於油麻地鬧市嘅大吃大喝亦都係台灣早餐小食店，主打厚切爆餡吐司，餡料選擇十分豐富，例如有安格斯牛肉、芝士鹹牛肉、鐵板豚肉、仲有混合香港特色嘅沙嗲牛肉等等，款款都足料飽肚。而蛋餅最平亦只售$34，煎得好酥脆，加上拉絲芝士，口感好有層次感！
【INFO】 大吃大喝 地址：油麻地彌敦道525-543號寶寜大廈地下525B號舖 營業時間：星期一至六 07:15-20:30 / 星期日 10:30-20:30
台式美食推薦 | 6. 吐司男
位於鰂魚涌嘅吐司男，顧名思義主打台式吐司，另外亦有供應台式酥炸蛋餅、雞扒、奶酥等小食。蛋餅大大份好足料，可自選餡料，例如肉鬆、玉米、培根、牛肉、里肌肉等等，仲可以加配古早味紅茶或冬瓜茶等台式飲料，夠晒飽肚～
【INFO】 吐司男 地址：鰂魚涌海光街7-9號龍景大廈地下5A號舖 營業時間：星期一至五、星期日 11:00-19:30
台式美食推薦 | 7. 小巷弄
位於北角嘅小巷弄主打正宗台灣料理及茶飲，當中台式早餐小食亦十分出色，例如有起司蛋手抓捲餅、肉鬆蛋手抓捲餅、雞肉餡餅等等。雞肉餡餅蔥香撲鼻，外脆內軟，包住充滿肉汁嘅雞肉，一口一個好有咬口！
【INFO】 小巷弄 地址：北角渣華道123號北角匯二期地下G01號舖 營業時間：星期一至日 11:00-21:30
台式美食推薦 | 8. 木玥巷
位於屯門嘅木玥巷，裝潢偏日式風格，除咗供應日式料理，亦會製作台灣早餐美食，例如海苔肉鬆起司蛋餅、紫薯起司蛋餅、鹹蛋黃芝士煙肉蛋餅，款式配搭比較特別。蛋餅外皮煎得香脆，入口充滿濃郁蛋香味，配上特調醬汁，味道更豐富。
【INFO】 木玥巷 地址：屯門井財街7號力生大廈地下4-5號舖 營業時間：星期一至日 12:00-15:00、17:30-22:00
台式美食推薦 | 9. 阿元來了
阿元來了喺由台灣人主理嘅台式小店，裝潢以台灣老街為主題。除咗主食例如滷肉飯、鹽酥雞、麵線等等，起司蛋餅亦非常出色。店舖選用台灣直送食材，充滿古早味，蛋餅嘅餅皮唔厚粉，咬落煙煙韌韌，薄薄一層蛋皮加上肉鬆同辣醬，味道更豐富～
【INFO】 阿元來了 地址： 香港觀塘鴻圖道28號 營業時間：星期一至日 11:00-21:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
