醬油蟹香港｜ 唔少人去到韓國，都一定會試當地嘅著名料理醬油蟹！唔想飛到咁遠，但又掛住蟹膏嗰陣香味？其實喺香港都食到正宗韓味！今次編輯就為你介紹香港5間韓國餐廳，佢哋嘅醬油蟹相當出色，絕對可以一解大家對醬油蟹嘅思念。即刻睇吓以下地址及詳細介紹啦！
圖片來源：Openrice@nyankoburger、Openrice@HattyHatty、Openrice@vanessafoodiary、Openrice@foodismylife.hk、Openrice@or#tm66627680、Openrice@ShinyXO、Openrice@andymyf、Openrice@QuinC、Openrice@丫晴美食之旅、Openrice@tlhkitty、Openrice@ssstephaniess、Openrice@EllinorLai｜撰文：Tiffany
醬油蟹餐廳推介｜1. Bingo & Cook
呢間餐廳係韓國人主理，所以口味絕對正宗。無論係食物水準、餐廳環境、用餐氣氛都好好，加上性價比高，所以每逢晚餐時間都會座無虛席。餐廳主打韓式炸雞、醬油蟹，最特別係醬蟹仲會配生蛋黃，梗係要試試佢啦！
醬油蟹套餐總共有兩隻蟹，即叫即開，保證夠晒新鮮！醬油蟹用咗餐廳特製嘅醬油、酒做簡單嘅調味，唔會過鹹，甚至有提鮮嘅作用。等你食到肥美蟹膏嘅鮮甜味之餘，亦唔會覺得腥。跟餐仲會有一碗麻油紫菜飯，配上啖啖蟹膏、生蛋黃，淨係聽都知味道一流，分分鐘要添飯阿！
【INFO】 《Bingo & Cook》 地址：銅鑼灣駱克道487-489號駱克駅2樓 營業時間：星期一至四 12:00 - 22:00／星期五至六 12:00 - 22:30 電話：2455 8766 官方Facebook：https://bit.ly/3KToHeS
醬油蟹餐廳推介｜2. 醬缸韓國料理
呢間韓國餐廳最出名就係生醬系列，醬油醬同醬油蝦都好受歡迎，好多人特登嚟試！生醬海蟹套餐包咗兩隻醬油蟹，隻隻都爆晒膏，而且蟹肉夠晒鮮味。
醬汁調味部份都好出色，唔會搶咗醬蟹嘅鮮甜。配埋生蒜頭、洋蔥一齊食，可以話係前所未有咁夾呀！呢間啲蟹嘅大小就略嫌唔夠大隻，好彩勝在夠多膏。而唔鍾意食蟹嘅朋友仔，就可以揀醬油蝦，一樣食得滿足！
【INFO】 《醬缸韓國料理》 地址：佐敦柯士甸道118號業廣商業大廈1樓 營業時間：星期一至六 11:30 - 14:30、17:30 - 22:30 電話：2375 9805 官方Facebook：https://bit.ly/3OEjl8k
醬油蟹餐廳推介｜3. 石牆道韓國餐廳
呢間餐廳嘅裝修雖然比較陳舊，但絕對係臥虎藏龍，連居港韓國人都推介，點可以唔試吓？除咗味道夠正宗，就連前菜都跟足韓國，有齊十幾碟前菜俾客人任添任食，韓迷必愛呀！
餐廳除咗出名食韓燒，佢哋嘅醬油蟹都享負盛名㗎。醬油蟹斬件上，啲蟹膏流晒出嚟咁勁吸引，食落啖啖鮮味！好多韓國人嚟食完都大讚夠正宗，好貼近韓國食到嘅味道。而其他餐廳通常都係配紫菜飯，但呢度配嘅係紫蘇飯，果然跟足韓國。喺蟹蓋中放入紫蘇飯，加埋蟹膏、麻油、醬油，越食越香，一碗點夠呀！
【INFO】 《石牆道韓國餐廳》 地址：尖沙咀金巴利道27-33號永利大廈地下20及22號舖 營業時間：星期一至日 11:00 - 15:00、17:00 - 22:30 電話：2311 9878／2311 9879 官方Facebook：https://bit.ly/3EcxF2Q
醬油蟹餐廳推介｜4. 元豐園
呢間餐廳喺香港已經經營咗好多年，同樣係韓國人主理，所以有好多韓國傳統嘅食物選擇，而且味道都好正宗。呢間嘅醬油蟹同樣夠晒多蟹膏，而且特別厚肉、肉質鮮甜，食落每一啖都好滋味。
不過呢度個套餐就唔包白飯，大家如果想撈飯嘅話，就記得自己叫多個紫菜飯喇。編輯就覺得食醬油蟹唔配飯簡單係美中不足，所以推介一定要加！值得一提嘅係，呢度嘅前菜選擇都唔少，啱晒鍾意食正宗韓國菜嘅朋友仔。
【INFO】 《元豐園》 地址：尖沙咀寶勒巷22-24號雲龍商業大廈地舖 營業時間：星期一至日 12:00 - 23:30 電話：2721 8730
醬油蟹餐廳推介｜5. 本家韓國料理
要數到香港必食醬油蟹，應該有唔少人會提起本家。呢間餐廳都係韓國人開，亦都有唔少韓國籍嘅員工，而佢哋嘅醬油蟹更標榜由韓國直送，夠晒新鮮、地道。
價錢方面，呢間嘅醬油蟹雖然較其他餐廳貴，但食過就知道值回票價。大大隻、爆晒膏，真係睇見都流晒口水！食醬油蟹又點少得白飯？職員會幫你手吱啲蟹膏落碗白飯到、再撈埋紫菜，然後放返落個蟹蓋到俾客人食，真係每一啖都係精華呀。
【INFO】 《本家韓國料理》 地址：尖沙咀金馬倫道22-24號東麗中心1樓 營業時間：星期一至日 12:00 - 16:00、17:00 - 23:00 電話：2367 1087 官方Facebook：https://bit.ly/3soPCJb
