聖誕餐廳2025 | 聖誕約齊三五知己或摯愛親朋，喺一個充滿浪漫氣氛嘅地方食餐好，絕對係一年中最期待嘅小確幸！喺香港，聖誕聚會餐廳嘅選擇琳瑯滿目，無論你想搵一間可以飽覽維港夜景嘅高級餐廳、充滿異國情調嘅歐式小木屋，定係可以喺湖畔享受BBQ自助餐嘅世外桃源，呢篇文都為你精心搜羅咗多個絕佳選擇。準備好喺呢個充滿佳餚、美酒同浪漫氣氛嘅節日，為你嘅聖誕聚會鎖定最完美嘅地點啦！
圖片來源：Openrice @joyceclt、@deliciousdiary.HK、@foooodrabbit、@foodxgoodwest_hk、@lamchelin、@chuu417、@vanessafoodiary、Bochord、Morton’s of Chicago官方圖片 | 撰文：Ginger
2025聖誕餐廳推薦 | 1. Jean-Pierre
Jean-Pierre 係 Blacksheep Restaurants 旗下喺中環新開嘅復古浪漫法式酒館，充滿格調，非常適合慶祝！餐廳環境浪漫復古，係慶祝嘅一流地點。食物方面維持 BlackSheep 一貫嘅高質保證，服務亦非常體貼又 friendly。牛肉他他係必點菜式，水準毋庸置疑！如果人多，可以一試烤三黃雞，份量多而且肉質嫩滑，幾抵食。甜品方面非常高質，朱古力醬泡芙中間夾住 Messina 嘅雲呢拿gelato雪糕，拿破崙超巨型又酥脆。
【INFO】 《Jean-Pierre》 地址: 中環必列者士街9號地舖 營業時間: 星期一至日 18:00 - 23:00
2025聖誕餐廳推薦 | 2. Bochord
位於銅鑼灣世貿中心高層嘅 Bochord係一間充滿復古英倫風圖書館主題嘅浪漫餐廳。一入門就可以聞到木香與咖啡味混合嘅氣息，深色胡桃木書架、皮革座椅，配上暖黃小檯燈，整間店好似一間隱身喺城市裡嘅舊時圖書館。坐喺靠窗位置更係一種享受，因為可以望到銅鑼灣一帶嘅海景，午間陽光透過玻璃灑落，充滿浪漫氛圍。餐廳嘅菜式水準亦非常高，前菜如蘇格蘭煙燻三文魚拼魷魚卷香氣細緻，海膽蟹肉豆腐質地細膩。主菜方面尤其出色，紅木炭燒西班牙章魚腳外層微焦，筋肉之間保留彈性；紅木炭燒美國頂級牛柳配羊肚菌，牛柳中心柔嫩多汁，配搭奶油煮羊肚菌，香氣濃郁。
【INFO】 《Bochord》 地址: 銅鑼灣告士打道280號世貿中心11樓1101號舖 營業時間: 星期一至日 12:00 - 23:00
2025聖誕餐廳推薦 | 3. Le 188° Restaurant & Lounge
位於北角港島海逸君綽酒店41樓嘅 Le 188° Restaurant & Lounge有靚維港夜景同Live Music，氣氛恰到好處。Le 188° 嘅餐前小食慢煮鮑魚豉油汁啫喱冷盤已經令人回味無窮，鮑魚爽口彈牙，醬汁甜而不膩。前菜方面有海鮮幕絲脆餅同松露鴨肝凍批，鴨肝質感滑順，松露香氣濃郁，令人一試難忘。主菜選擇多元，意大利羊奶芝士燴飯飯粒煮到 al dente，羊奶芝士醬汁 creamy 得來無奶騷味，味道層次豐富；香烤美國和牛牛腩扒烤到啱啱好，肉質軟嫩，配紅酒燒汁，非常惹味。
【INFO】 《Le 188° Restaurant & Lounge》 地址:北角油街23號港島海逸君綽酒店41樓 營業時間: 星期一至四 07:00 - 22:30；星期五至六 07:00 - 00:00；星期日 07:00 - 22:30
2025聖誕餐廳推薦 | 4. Morton’s of Chicago
Morton’s of Chicago 位於尖沙咀喜來登酒店內，提供來自美國嘅上乘熟成穀飼牛扒，並可飽覽維港景色。Morton’s 最出名嘅就係佢哋嘅儀式感！無論係慶祝生日定節日，服務員都會喺你嘅枱上面做足佈置，生日Menu會寫明日子同人客名稱，仲有即影即有生日卡，令你嘅聚會充滿美好回憶。嚟到呢度當然要試佢哋嘅牛扒，Porterhouse Steak 份量十足，牛扒煮得好香，好有肉味，肉質軟嫩。頭盤龍蝦湯夠濃，甜品platter 亦整得好靚又好味，為一餐飯畫上完美句號。
【INFO】 《Morton's of Chicago》 地址: 尖沙咀彌敦道20號香港喜來登酒店4樓 營業時間: 星期一至五 17:00 - 00:00；星期六至日 11:30 - 15:30, 17:00 - 00:00
2025聖誕餐廳推薦 | 5. La Taverna
尖沙咀呢間 La Taverna 係一間充滿歷史同情調嘅打卡意大利菜餐廳！佢喺1969年開業，至今已有55年歷史，係香港現存歷史最悠久嘅意大利餐廳，連梅艷芳、麥當娜等名人都曾到訪，武打明星李小龍更喺餐廳取景拍電影！餐廳特設意式矮拱門，天花板垂吊著數百個酒瓶，懷舊歐陸風別有情調。La Taverna嘅聖誕大餐，包括黑松露牛肉他他、海膽手工意粉、栗子Tiramisu等。必試每日即製嘅手工意大利粉，例如海膽自家製幼蛋麵，口感彈牙。
【INFO】 《La Taverna》 地址: 尖沙咀亞士厘道36-38號地舖 營業時間: 星期一至四 11:30 - 15:00，17:30 - 22:00；星期五至日 11:30 - 23:00
2025聖誕餐廳推薦 | 6. Chesa
位於香港半島酒店1樓嘅Chesa（瑞樵閣）充滿雅緻又浪漫嘅氣氛。Chesa 係可雷特（Raclette）芝士同芝士火鍋（Fondue）愛好者嘅天堂，喺冬天食火鍋簡直係暖笠笠又充滿節日氣氛。此外，菜單仲有一系列經典瑞士美食，例如蘇黎世特色牛仔肉、手工香腸配馬鈴薯絲煎餅、德國雞蛋麵等。呢度嘅招牌菜，例如牛仔片配鮮菌忌廉汁、芝士配新薯、酸瓜及洋葱都令菜單生色不少。
【INFO】 《Chesa》 地址: 尖沙咀梳士巴利道22號香港半島酒店1樓 營業時間: 星期一至日 12:00 - 15:00 ，8:00 - 23:00
2025聖誕餐廳推薦 | 7. MoA Dining
位於尖沙咀香港藝術館1樓嘅 MoA Dining，餐廳環境開揚，可以飽覽維港景色。MoA Dining 最吸引人嘅特色之一，係佢哋嘅All-you-can-eat 自家製麵包車！一共有4款高質麵包任食，包括鬆軟甜香嘅Brioche、外脆內鬆軟嘅Cheese Scone、充滿酸香嘅Sourdough同油潤彈牙嘅Focaccia，配埋曼徹格芝士牛油或地中海橄欖油。主菜方面，烤本地三黃雞雞皮烤到金黃香脆，肉質嫩滑唔柴；法式海鮮湯（Bouillabaisse）食材豐富，包括四指馬鮫魚、紅蝦、魷魚、蜆等，湯頭帶少少茴香香氣。
【INFO】 《MoA Dining》 地址: 尖沙咀梳士巴利道10號香港藝術館1樓 營業時間: 星期一至六 11:30 - 23:00；星期日 11:30 - 22:00
2025聖誕餐廳推薦 | 8. G’Day
西環石塘咀嘅G’Day呢間寵物友善餐廳由人氣法國餐廳前主廚創立，主打一系列澳洲料理、生酮食物同非乳製品，非常特別。G’Day 嘅煎和牛臀扒真係抵讚！五成熟出嚟，肉質粉嫩多汁，牛味濃郁，焦香同油脂混埋一齊食好滿足！配埋青醬辣牛油，清新開胃，厚切得啱啱好，食落有種高質享受！另外，佢哋嘅燒盲曹魚配菁檸香橙白醋醬都非常出色，魚皮脆肉嫩，魚肉鮮甜。
【INFO】 《G'Day》 地址: 西環石塘咀山道48-52號南昌大廈地下A號舖 營業時間: 星期一至五 12:00 - 22:00；星期六至日 11:00 - 22:00
2025聖誕餐廳推薦 | 9. TABIÀ
位於中環堅道嘅 TABIÀ主打意大利北部菜色，源自Dolomites山區，一入到去感覺好溫暖同Cozy，有種山莊小屋嘅氣氛。TABIÀ 嘅Fegato di Pollo Pare（雞肝醬），味道濃郁得嚟特別加咗牛奶混合，口感更加柔滑，配上黑莓醬嘅酸甜點綴，味道好平衡。Cozze con N’Duja e Vino Bianco（蜆肉）飽滿鮮甜，高湯用咗白酒配上意大利特色嘅N’Duja辣香腸，酒香配上絲絲嘅鹹鮮味道好出色。當然唔少得配返杯餐前酒，Negroni係經典嘅國民Cocktail，Hugo Spritz 就比較輕盈。
【INFO】 《TABIÀ》 地址: 中環堅道55號地舖 營業時間: 星期二至六 12:00 - 22:00 (星期一、日休息)
2025聖誕餐廳推薦 | 10. Nisugu
Nisugu位於九龍城啟德嘅雙子匯，設有indoor & outdoor位置，Outdoor位置入秋時分非常舒服，仲可以飽覽啟德夜景。Nisugu 主打西班牙菜，菜式充滿特色。紅蝦牛油果他他（Red PRAWN Avocado Tartare），綿滑嘅牛油果蓉鋪上厚厚一層鮮甜紅蝦肉，海鮮鮮味與牛油果嘅香滑完美融合，入口即化，令人回味。主菜方面，西班牙燒乳豬配蘋果蓉（SPANISH SUCKLING PIG）皮薄如紙、脆得出聲，肥瘦比例恰到好處，配上微甜蘋果蓉，完美平衡油脂感。甜品嘅栗子蒙布朗紅茶巴斯克蛋糕（CHESTNUT MONT BLANC）外型吸引，栗子蓉絲絲掛在蛋糕上，入口濃郁，紅茶味清新突出。
【INFO】 《Nisugu》 地址: 九龍城啟德協調道12號雙子匯1期崇光啟德店食匯堂14樓1402號舖 營業時間: 星期一至五 12:00 - 22:00；星期六至日 11:30 - 22:00
2025聖誕餐廳推薦 | 11. Lake House
想過一個遠離城市煩囂、充滿浪漫童話氛圍嘅聖誕節？大埔嘅 Lake House 絕對係一個好選擇！呢度坐擁白鷺湖嘅優美湖景，喺聖誕期間更會佈置成一個歐式聖誕村，充滿節日氣氛。Lake House 喺聖誕期間，戶外會有10米浪漫閃爍聖誕樹、飄雪場景浪漫雪屋等，係絕佳嘅打卡位！白屋之內有中餐廳 Le Vow (金鷺湖) 同主打西式料理嘅 BILLOW。特別喺聖誕期間，Billow 除咗供應節日限定聖誕套餐之外，戶外用餐區更會推出午市及晚市「聖誕BBQ自助餐」！無論中午或晚間，都可以飽嘗美國安格斯肉眼牛扒、意大利豬肉卷、虎蝦、羊架等即燒美食，仲有煙三文魚等冷盤及自家製蛋糕甜品。喺湖畔美景下，享受一邊欣賞湖景一邊嘆BBQ自助餐，真係非常寫意。
【INFO】 《Lake House》 地址: 大埔紅林路2號地舖 營業時間: 星期一至日 11:30 - 22:00
2025聖誕餐廳推薦 | 12. Mano
Mano 係一間位於銅鑼灣The L. Square樓上嘅高質有水準意大利餐廳，中午幾乎全場爆滿，喺銅鑼灣核心地帶嚟講，佢哋嘅價錢唔算貴，性價比非常高！呢間 modern Italian 餐廳嘅薄餅同雞尾酒都非常出色。意式香辣腸薄餅($88) 加咗勁多芝士，切出嚟仲可以拉到絲！香辣燒春雞($108)都幾大隻，雞肉肉質幾嫩滑，辣度適中。最後嘅甜品 Tiramisu 亦做得好好，唔會太濕又唔會太苦又唔會太甜。
【INFO】
《Mano》
地址: 銅鑼灣駱克道459-461號The L. Square 5樓
營業時間: 星期一至日 12:00 - 15:00, 17:30 - 22:00
2025聖誕餐廳推薦 | 13. CulinArt 1862
想食西餐就唔好錯過呢間餐廳喇！城中知名法國餐廳 CulinArt 1862 特別推出一系列節慶餐飲體驗，並於12月24日至26日聖誕節期間，以及12月31日除夕夜，推出豐盛節慶晚宴。六道菜節慶晚宴每位港幣$1,188；精緻的四道菜晚宴每位港幣$788，性價比極高！晚宴前菜以巧手經典菜式「法式傳統酥皮肉派」揭開序幕，菜式製作工序繁複，以野鴨、鴿肉和榛果製成的餡料，配以香脆酥皮，精緻巧手，風味優雅濃郁。另一款前菜「帶子芭菲」極亮眼，以海膽牛油、雅枝竹及日式高湯，鮮味交織。主菜方面，有肉質細嫩，口感細膩的「格陵蘭比目魚柳」，以及油花均勻甘香嘅「M9和牛西冷」，配上冬季黑松露，每一啖都是極致享受。同樣亦有節慶午市套餐選擇，賓客可選擇三道菜（每位港幣$398）或四道菜（每位港幣$488），以及指定日子供應的節慶早午餐（每位港幣$488/四道菜），以親民嘅價格享受富有儀式感嘅午餐。
【INFO】 《CulinArt 1862》 營業時間： 星期一至日 12:00pm-4:00pm, 6:00pm-11:00pm 星期六、日及公眾假期下午茶：3:00pm-5:00pm 地址：香港銅鑼灣禮頓道 29 號華懋禮頓廣場地下及1樓
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
