甜品推介 ｜相信大部分人都會有個甜品胃，而香港近日亦進駐多個人氣海外甜品品牌，滿足鍾意食甜品嘅朋友。今次編輯就為大家介紹6大最新開張嘅過江龍甜品店，包括英國繽紛餅乾脆脆Crumbled.、日本芝士夾心三文治Runny Cheese、台式滿料杯「料杯杯」、台中夜市人氣甜品「八時神仙草」、日本人氣法式千層Gariguette、以及Komeda’s Coffee珈琲店，即睇以下地址同埋詳細介紹啦！
圖片來源：Instagram @crumbled_hk、@runnycheese.291、@boboliaohongkong、@pashih.hk、@mille_feuille.gariguette、@komeda_coffee_official、Openrice @我係為食meowOpenrice、@TOCHARA126｜撰文：Icy
1. Crumbled.
來自英國曼徹斯特嘅Crumbled.，最近登陸大角咀，開設首間海外分店，雖然店面細細，但裝潢以粉紅少女風作主題，十分搶眼。甜品款式亦好特別新穎，主打淋滿醬料同配料嘅餅乾脆脆杯，賣相鮮豔繽紛，醬料更以玩味十足嘅針筒裝住，拎住打卡實在一流！
醬料以針筒裝住，拎住打卡實在一流！（圖片來源：Instagram @crumbled_hk）(圖片來源：Openrice @我係為食meow)
脆脆杯以傳統英式金寶脆脆同吉士醬作基底，每日新鮮製作，大家可以自由配上唔同醬料同配料（$52），或者有選擇困難症嘅朋友，就可以選擇總共有6款嘅預設set（$58）。底層嘅吉士醬保持係60度嘅溫度，確保口感滑溜。配料有水果、粟米片、麻糬粒、朱古力豆、熊仔糖、雪糕等等，最後仲會噴上食用閃粉，口感豐富多層次！
【INFO】 《Crumbled.》 地址：大角咀鐵樹街7號金旺閣地舖 時間：星期一至日 14:30-22:30
2. Runny Cheese
來自日本福井縣嘅Runny Cheese，一向都係香港人嘅日本手信首選。而Runny Cheese最近選址銅鑼灣Sogo開設分店，大家唔使飛到日本都可以品嚐各款芝士夾心三文治喇！
賣相好精緻啊！（圖片來源：Instagram @runnycheese.291）
材料嚴選法國芝士，厚身嘅夾心層加上選用福井老字號「村中甘泉堂」嘅麻糬同新鮮水果等配料，大大啖咬落去，口感綿滑濃郁。大熱口味有流心焦糖布甸、開心果、宇治抹茶、北海道紅豆、草莓、冧酒提子乾等等，口味多元化。建議大家將三文治冷藏後再品嚐，感覺更加透心涼㗎！
【INFO】 《Runny Cheese》 地址：銅鑼灣崇光百貨B2樓層 時間：星期一至日 10:00-22:00
3. 料杯杯
來自台灣嘅鮮芋仙姊妹品牌「料杯杯」首度登陸香港沙田新城市廣場，有別於一般手搖飲品，滿料杯會配上豐富嘅配料，配合牛乳冰沙同香濃奶蓋，令大家每一口咀嚼都感覺幸福療癒！
配料選擇有Q彈嘅芋圓、嫩滑嘅仙草、清甜嘅寒天茶凍、軟糯嘅牛奶麻糬等等，多達15款選擇，每一啖都可以享受多重口感，炎炎夏日品嚐就最好不過。彩色小芋圓更加係由台灣直送，保持地道台灣風味！
（圖片來源：Instagram @boboliaohongkong）
【INFO】 《料杯杯》 地址：沙田新城市廣場一期1樓156號舖 時間：星期一至日 11:00-22:00 電話：3705 2650
4. 八時神仙草
另一間要介紹嘅台灣過江龍甜品店就係位於中環嘅「八時神仙草」，來自台中逢甲夜市小攤檔，陳年仙草經過八小時熬煮，無添加任何鹼粉同凝結劑，味道更加天然正宗，仲有解熱氣嘅功效！
店舖主打手工嫩仙草嘅一系列甜品，依照總店配方製作，例如芋泥燕世雪花冰、芒果仙草雪花冰、仙草凍奶茶等。芋圓以屏東同大甲芋頭製成，粒粒紮實，芋香更濃郁。店家亦會將仙草製成手搖飲品，特別推介健康之選燕麥奶茶，加上白玉珍珠同奶蓋，增添層次感！
清涼微甘嘅仙草係夏日消暑佳品！（圖片來源：Instagram @pashih.hk）
【INFO】 《八時神仙草》 地址：中環歌賦街19號G/F 時間：星期一至日 12:30-22:30 電話：2343 6933
5. Gariguette
源於日本嘅人氣法式千層店Gariguette，將於今年夏天登陸香港，開設首間海外分店。金黃色嘅焦糖酥皮mille presse賣相圓碌碌，造型可愛，相信到時會掀起一股打卡熱潮！酥皮由100%發酵奶油高溫烘烤而成，餡餅中間夾住以北海道牛奶製成嘅吉士醬或鮮果醬，以及滿滿水果餡料，口感香脆鬆化。想朝聖嘅朋友記得留意官方社交網站嘅最新開幕資訊喇！
【INFO】 《Gariguette》 地址：有待公布 時間：有待公布
6. Komeda’s Coffee
來自日本名古屋嘅老牌早餐珈琲店Komeda’s Coffee，自上年進駐香港黃埔後，一直大受香港人歡迎。近日官方就宣布進駐屯門、尖沙咀以及銅鑼灣，於港九新界連開3間分店，滿足一眾熱愛日本嘅朋友！Komeda’s Coffee將傳統名古屋早餐文化帶到香港，室內設計以大地色以及木系作主調，屯門店作為首間新分店，更擁約3000呎佔地面積，用餐位置非常充足。
（圖片來源：Openrice @TOCHARA126）
除咗原有嘅多士、雞蛋沙律等經典菜單，店家亦推出具代表性嘅甜品「冰與火」，以鬆軟嘅丹麥麵包搭配冰凍牛奶雪糕，品嚐雙重口感。而「熊本蜜瓜冰與火」更會配上鮮甜嘅熊本縣蜜瓜果肉，夏天品嚐實在透心涼！
【INFO】
《Komeda’s Coffee》
地址：屯門屯順街1號屯門市廣場1期AEON
時間：星期一至日 08:00-22:00
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
