【 片皮鴨推介 】相信冇乜人可以抗拒到片皮鴨嘅魅力！餅皮包裹住肥美可口嘅片皮鴨，再配以香甜嘅醬汁，真係令人食指大動啊！但香港有唔同餐廳都有供應片皮鴨，數量眾多，邊一間先值得一試呢？小編為大家搜羅7大必食片皮鴨，每間都係由香港片皮鴨關注組推薦，想知道有邊幾間就繼續碌落內文睇啦！
圖片來源：SAUCE編輯部、openrice@justforshan、openrice@Purple Rabbit 、openrice@天天食好野、openrice@花喱花碌、openrice@cyriz、openrice@Ssssssssabrinnna、openrice@XYTX、openrice@amberllh、openrice@eatwithcherii 、openrice@ElvisLee513、openrice@Yan~*、openrice@lailaifood、openrice@ZitherGardenopenrice@dreamjimjim、openrice@Food and Crits、openrice@ioniee、openrice@ET、openrice@glutton.egg、openrice@fibee3b、openrice@happyjoejoe123 、openrice@leunwing、openrice@laam_k、openrice@ ctt35、openrice@Foodie_candyui 、openrice@achong13、openrice@chuchu_hkfoodie、openrice@eatwithcherii、openrice@Karen CYF、openrice@pisceslovefood 、openrice@astriddd、Facebook香港片皮鴨關注組@Tracy Yim、openrice@tracyman、openrice@buniscat、openrice@Yanbowong329、openrice@nikixx｜撰文：Sharon
| （廣告時間） |
1. 京滬佳餚
京滬佳餚以烤鴨為主打，喺將軍澳同銅鑼灣都設有分店，餐廳裝潢以簡約宮廷風為主題，呢度嘅招牌片皮鴨更加係必食之選！片皮鴨皮脆肉嫩，配料有多達9款，包括砂糖、填鴨醬、青瓜、哈蜜瓜、京蔥、蒜茸等。片皮鴨肉質細嫩，唔會太肥，鴨皮亦烤得非常香脆可口，配上薄身嘅餅皮，卷住一齊食口感極為豐富啊！小編最推薦大家鴨皮點砂糖進食，唔會過膩，反而入口即化，值得一試！
【INFO】 《京滬佳餚 - 銅鑼灣分店》 地址：銅鑼灣加寧街13-15號Fashion Walk地下A,C-D號舖 營業時間：11:30 - 22:00 電話：2817 7737
2. 古琴雅苑
古琴雅苑主打古木炭火烤製嘅北京烤鴨，配上3款配料包括青瓜、京蔥、哈蜜瓜。另外，醬料方面，除咗傳統京醬同烤鴨醬，仲有製蜂蜜黃梅醬，非常特別，加上自家製嘅薄餅皮一齊食用，味道更佳！而師傅更會喺客人面前即席將鴨片皮，皮鴨切得大小相若，有得睇又有得食！最特別係呢度食片皮鴨套餐，仲會奉送「鴨皮一口酥」，將鴨皮沾上砂糖食用，更滋味可口！
比起普通嘅片皮鴨，如果大家有興趣仲可以試「古琴酒糟北京填鴨」，入面嘅片皮鴨酒香味好香濃，因為師傅將酒糟放進鴨身，令鴨皮入口香脆！不過呢間嘅片皮鴨切得較為厚身，想食薄身片皮鴨嘅朋友就要注意了～
【INFO】 《古琴雅苑 - 太子分店》 地址：尖沙咀北京道12A號太子集團中心15樓 營業時間：11:45 - 15:00 及 17:45 - 22:00 電話：6993 2195
3. 新榮記
位於灣仔嘅新榮記主打台州菜，但呢度嘅片皮鴨同樣十分出色！烤鴨前會將鴨風乾12小時，餐廳會等客人到達後先烤鴨，需時大約1個鐘。師傅會根據香脆程度逐部位切割，首先會切一小碟鴨皮，鴨皮燒得非常香脆，點埋砂糖一齊食，入口即溶！鴨肉方面，肥而不膩，肉嫩細膩，配搭北京六必居嘅鴨醬、台灣小菜心同山楂條食，更加惹味！不過記得預訂咗先好嚟食片皮鴨啊！
【INFO】 《新榮記》 地址：駱克道138號中國海外大廈地下及一樓 營業時間：12:00 - 15:00 及 18:00 - 23:00 電話：3462 3516
4. 尚座
片皮鴨關注組討論極高！！！位於銅鑼灣嘅尚座以經典填鴨聞名，唔少食客試過都表示果然並非浪得虛名！呢度嘅片皮鴨片夠薄，同樣即叫即製，皮身夠香脆而且唔會太肉，鴨肉肉香嫩滑！配料方面，有傳統京醬、砂糖、哈密瓜、京蔥、青瓜同蒜泥，另外仲可以點砂糖食！片皮鴨份量頗多，餅皮大概有10塊，餐廳仲好細心用蒸爐將餅皮保溫，令餅皮唔會好易變硬，就算慢慢食都唔使驚啦！
【INFO】 《尚座》 地址：銅鑼灣新寧道8號中國太平大廈地舖 營業時間：12:00 - 16:00 及 18:00 - 22:00 電話：2116 5519
5. 卅二公館
卅二公館嘅北京片皮鴨以特別方法經過超過四十八小時醃製好，再用蘋果木喺磚爐烤製。每一塊片皮鴨厚薄均勻，食落油脂感唔會太重，肉質好嫩滑多汁，有入口即溶嘅感覺！建議大家食鴨皮時點上砂糖食用，口感會更滋味～配上配料青瓜、京蔥同多款醬料嘅搭配，如海鮮醬，花生醬及芝麻醬，食落更香口！
【INFO】 《卅二公館》 地址：中環德輔道中4-4A號渣打銀行大廈地庫 營業時間：12:00 - 15:00 及 18:00 - 00:00 電話：2885 8688
6. 麗晶軒
同樣備受香港片皮鴨關注組推介嘅麗晶軒，主打香烤片皮鴨，得到唔少網友嘅熱烈推介！麗晶軒擁有米芝蓮星級同黑珍珠鑽級餐廳等美名，被譽為全球最佳粵菜食府之一。片皮鴨鴨皮香脆，餅皮夠晒薄，享用時可以配搭多達9款嘅配料，例如青瓜、紅椒絲、青蔥等，仲有傳統海鮮醬、桂花梅子醬及黑蒜辣椒醬添！如果嫌唔夠喉，仲可以加錢享用片皮鴨三食，分別係「鴨崧生菜包」同「香酥鴨崧卷配甜芥茉汁」。
【INFO】 《麗晶軒》 地址：尖沙咀梳士巴利道18號香港麗晶酒店地下 營業時間：12:00 - 14:30 及 18:00 - 22:00 電話：2313 2313
7. 美中鴨子
片皮鴨係美中鴨子嘅招牌菜之一，皮肉分開呈上，冇多餘嘅脂肪，鴨皮烤到金黃色，非常鬆脆，肉質嫩滑又夠Juicy！加上份量幾好，兩個人食就啱啱好，用埋餅皮包住青瓜等配料一齊享用，將肥膩同清爽融合一齊，層次分別，口感好豐富啊！
【INFO】 《美中鴨子 - 將軍澳店》 地址：將軍澳唐德街9號將軍澳中心商場地下G105-106號舖 營業時間：11:30 - 15:30 及 17:30 - 21:30 電話：2362 9800
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
