深水埗美食 | 深水埗呢個舊區近年愈嚟愈有活力，唔單止有懷舊香港餐廳，仲有新派餐廳同埋文青Cafe進駐，令成個社區充滿活力。講起深水埗，相信「文記車仔麵」絕對係深水埗街頭小食代表，湯底濃郁，配料多樣，啱晒鍾意自由配搭嘅你！仲有最近Threads熱爆性價比超高嘅意粉店「Chickee’s」隱藏喺西九龍中心food court，由酒店大廚主理，$42就食到溫泉蛋卡邦尼意粉，性價比超高，啱晒鍾意探索美食嘅你！
圖片來源：Openrice @ohlaimanki、@bellofood、@lcagnes、 @ foooodrabbi、@EatwithBee、@丨Aa丨、@ VincitaYeung、@janicechowbb、@blackfdz、@chefyau1980、@肥龍B、@inthemood.hhk、@fannywu423、@Kwaiowo、@estherltt | 撰文：Ginger
深水埗美食推介 | 1. Chickee’s
最近一間意粉小店「Chickee’s」意外喺Threads爆紅，成為網民熱捧嘅高性價比之選。呢間小店隱藏喺西九龍中心food court，由兩位曾經喺酒店做大廚嘅老闆主理，2021年疫情期間決定創業，希望用親民價錢帶嚟高質西式意粉，結果一炮而紅。餐牌上有7款意粉選擇，其中最受歡迎嘅就係$42溫泉蛋卡邦尼意粉，另外仲有海膽忌廉、辣肉腸番茄醬等選擇，份量足夠，一碟已經夠飽肚。嚟Chickee’s記得預留時間，因為繁忙時段隨時要等成個鐘！
【INFO】
《Chickee's》
地址: 深水埗欽州街37K號西九龍中心8樓63-64號舖
營業時間: 星期一至日 11:00 - 16:00，18:00 - 21:00
深水埗美食推介 | 2. M.Y Majesty
深水埗「M.Y Majesty」係打工仔同學生哥嘅窮人恩物，主打超巨型「意粉山」，份量非常多！香蒜白酒蜆肉意粉蜆肉唔少仲蒜香十足，CP值爆燈。食肉獸必試經典卡邦尼，濃厚忌廉醬掛滿煙肉同麵條，加埋芝士同黑椒，啱哂重口味人士！
【INFO】
《M.Y Majesty》
地址: 深水埗福華街15號地舖
營業時間: 星期一至日 11:30 - 22:30
深水埗美食推介 | 3. Poke Go
深水埗大南街嘅「Poke Go」係一間主打健康輕食嘅夏威夷蓋飯專門店，文青風裝修吸引唔少人嚟打卡！佢哋嘅Poke Bowl可以自選配料，廿幾款選擇由三文魚、吞拿魚到八爪魚都有，仲有糙米、麻醬豆腐等特別配搭，新鮮又足料。最正係每碗大概500卡，健身人士都啱食，仲可以自己DIY。
【INFO】
《Poke Go》
地址: 深水埗大南街211號地舖
營業時間: 星期一至日 12:00 - 22:00
深水埗美食推介 | 4. 沛
深水埗嘅「沛」係一間由港韓夫婦主理嘅韓式小食店，主打正宗韓國家庭料理，裝修走文青風，牛奶色系配薄荷綠磚牆，成個環境溫馨又清新，好啱打卡影相。呢度嘅招牌菜「芝士煎蛋捲」絕對係必試，蛋捲外皮煎到金黃香脆，入面嘅芝士拉絲效果超澎湃，仲會用茄汁寫上韓文「謝謝」，夠晒窩心。
【INFO】
《沛》
地址: 深水埗福華街178A號地舖
營業時間: 星期一至日 12:00 - 22:00
深水埗美食推介 | 5. Loop Kulture
Loop Kulture門口擺滿綠色植物，一入去就似走入咗個小森林。餐廳主打健康輕食，好似焦糖香蕉法式多士同埋牛油果無花果酸種麵包，賣相非常靚。飲品方面，招牌咖啡「Loop」用椰子水同椰漿做基調，飲落有驚喜，仲有創意特調「Cucumble Bomb」，青瓜梳打加濃縮咖啡，清新得嚟又夠特別。
【INFO】
《Loop Kulture》
地址: 深水埗鴨寮街90號地舖
營業時間: 星期一至日 10:00 - 18:00
深水埗美食推介 | 6. Jen Cafe
Jen Cafe由網店起家，主打低油低糖低卡皇牌卷蛋，選用日本同台灣優質食材，，輕盈又富層次感。最受歡迎嘅京都焙茶芝士奶蓋卷，蛋糕濕潤鬆軟，茶香同芝士奶蓋完美交織，入口即化。簡約日系木系裝潢，溫暖舒適，連毛孩都可以一齊chill住歎返個悠閒下午。呢度唔單止有甜點，更有充滿創意嘅鹹食。
【INFO】
《Jen Cafe》
地址：深水埗深水埗基隆街102號地舖
營業時間︰星期一至日10:00 - 18:30
深水埗美食推介 | 7. 文記車仔麵
講到深水埗嘅街頭美食，點少得「文記車仔麵」！呢間曾經榮獲米芝蓮推介嘅小店，喺福榮街連開四間地舖，日日都大排長龍。唔單止係多達60款嘅餸菜選擇，仲有佢哋夠晒創意嘅高速列車送餐服務。麵底方面選擇多樣化，由油麵、粗麵到番薯粉應有盡有，啱晒唔同口味嘅你。至於配料方面，瑞士雞中翼、清甜蘿蔔、爆餡餃子都係熱賣之選，每款配料都係十蚊八塊，夠晒抵食。
【INFO】
《文記車仔麵》
地址: 九龍深水埗區福榮街123號地舖
營業時間：星期一至日 11:00 - 04:00
深水埗美食推介 | 8. 公和荳品廠
「公和荳品廠」由1893年開業，係深水埗百年老字號，唔靠花巧宣傳，用傳統工藝製作出最純正嘅豆味，佢哋嘅招牌豆腐花，入口即化，豆香濃郁，連米芝蓮都推薦。除咗豆腐花，煎釀豆腐、豆卜同黃金魚腐都係人氣之選。
【INFO】
《公和荳品廠》
地址: 深水埗北河街118號地舖
營業時間: 星期一至日 07:00 - 21:00
深水埗美食推介 | 9. GYU TOWN 牛舌專門店
Gyu Town 牛舌專門店係一間專攻全牛舌料理嘅餐廳，將牛舌三大部位玩出層次，每款都充滿驚喜。人氣之選「三重牛舌御重盒」一次過試勻牛舌芯、牛舌尖同牛舌筋，感受由嫩滑到煙韌再到濃郁嘅變化，滿足感爆棚！
【INFO】
《GYU TOWN 牛舌專門店》
地址: 深水埗桂林街46B號地舖
營業時間: 星期一至日 12:00 - 15:30，17:30 - 22:30
深水埗美食推介 | 10. 合益泰小食
合益泰小食嘅腸粉每日賣出超過5,000條，滑溜得嚟帶有米香，加埋秘製嘅麻醬、甜醬同芝麻，每一啖都係童年回憶嘅味道。除咗腸粉，佢哋嘅蘿蔔同豬皮都係必試之選，腍甜入味，價錢親民，十幾蚊就食到飽，難怪連米芝蓮都推薦。
【INFO】
《合益泰小食》
地址: 深水埗桂林街121號地舖
營業時間: 星期一至日 06:30 - 20:30
深水埗美食推介 | 11. 迷你毛
迷你毛係一間文青風滿滿嘅咖啡店，裝修簡約得嚟又有打卡位，坐低飲杯咖啡真係chill到唔想走。佢哋嘅甜品同主食都充滿創意，好似「原隻蘋果配酥盒」，賣相夢幻得嚟味道層次豐富，蘋果酸甜配上酥脆千層，真係令人驚喜。另外，佢哋嘅意粉同窩夫都係人氣之選，尤其係安格斯牛肉眼，肉汁豐富。
【INFO】
《迷你毛》
地址: 深水埗鴨寮街121-123號地舖
營業時間: 星期一至日 12:00 - 18:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
