數下手指都已經有兩年幾冇得去日本，冇得食地道日本菜，心思思掛住日本咁耐，今日小編就有好推薦，為大家帶嚟五間日式居酒屋，放工之後又多個地方可以去輕鬆下、食下正宗日本嘢，帶埋三五知己小酌兩杯！一齊去下面睇下邊間居酒屋最啱你心水啦！
圖片來源：Openrice @bearbearman、Instagram @kokon1010、Openrice @foodluckeveryday、Openrice @sasa_Ms、Openrice @diadelicacies、Facebook @磯野水產、Openrice @欀霜、Openrice @PCY、Openrice @dywc、Openrice @mrscolam、Openrice @ ki918、Openrice@sleepbeauty、Openrice @ChuChuChueng、Openrice @Alcyin｜撰文：Aster
1. 古今二 (官塘工業中心)
喺香港坐擁5間分店嘅今古間間都好評如潮，今日小編就為大家介紹其中最旺場、座落於觀塘嘅今古二總店！鋪頭裝修偏工業風，除左影相好style之外，喺入面食嘢仲好有氛圍感，啱晒同朋友一齊嚟chill下~ 嘢食方面，佢嘅沙律同卷物都好出名，燒物亦都好有質素，不容錯過！
必試Menu：柚想蝦你沙律
沙律入面有柚子、鮮蝦、番茄、牛油果同沙律菜，酸甜嘅滋味開胃一流，蝦仲好彈牙爽口，好鮮甜！
必試Menu：今古卷物
今古二招牌嘅特色卷物盤有齊富士山、午夜牛郎、金龍卷同彩虹卷，一次過滿足晒你對日式卷物嘅想像！特別要提到其中幾款卷物：午夜牛郎由炸得金黃香脆嘅外皮包裹住牛油果、芝士同三文魚，外脆內軟嘅口感一試難忘，仲有綿密滑膩嘅牛油果拼芝士，令香滑嘅食感更上一層樓，三文魚嘅脂肪香停留喺口腔久久唔消散；而金龍卷就係用三文魚捲住炸蝦同芝士，作爲不敗嘅食物組合，佢依然有驚喜，炸蝦明顯係即叫即炸，就算比其他食材包裹都保持到好脆口，另外三文魚亦好新鮮，配合沙律醬調味整體酸酸甜甜，好滋味！
【INFO】
古今二
地址：觀塘觀塘道436-446號官塘工業中心4期1樓B室
營業時間：12:00 – 16:00；17:30 – 22:00
聯絡電話：3188 8015
2. 申子居酒屋
申子居酒屋係一間兩層樓高嘅居酒屋，具有日式簡約設計，喺鬧市靜靜佇立，好有神秘感！店內燈光昏暗，座位闊落，畀人感覺好放鬆、好舒服，而且隱私度高～呢間食店主打日本直送嘅清酒、特色小食同刺身，連杜汶澤同梁祖堯都有推薦過！單係食物同個氣氛已經好似帶咗你翻日本咁！
必試Menu：汁燒安格斯肉眼定食
肉眼扒肉質香嫩唔韌，表面燒得恰到好處，帶有淡淡嘅焦香，定食配埋漬物、味噌海帶湯同粒粒飽滿嘅日本米飯，上面仲灑滿飯素，真係好香口，食完個扒都仲想添多碗飯！
必試Menu：蓬鬆玉子
蓬鬆玉子絕對係將日本傳統玉子料理發揮到極致嘅一道菜，菜如其名，蓬鬆玉子使用日本雞蛋製作出豐盈綿密嘅食感，一食落口仲有香濃嘅蛋汁流出，配上鹹香濃郁嘅芝士同大阪燒醬汁，真係雞蛋愛好者嘅天堂！
必試Menu：三重芝士吉列千層豚肉
三重芝士吉列千層豚肉只係睇個賣相已經好吸引！炸到金黃色嘅吉列豚肉包住拉絲芝士夾心，輕輕一咬香濃嘅軟心芝士味已經霸佔成個口腔，十分足料！簡直係cheat day邪惡之選！
【INFO】
申子居酒屋
地址：旺角黑布街74-76號藝興大廈地下1號舖
營業時間：星期一至三及日 12:00 – 22:00；星期四至六 12:00 – 00:00
聯絡電話：5998 9188
3. 磯野水產
磯野水產主打日本海鮮料理，每日都有喺日本空運直送過嚟嘅新鮮海產，配合各種地道嘅日式烹飪手法——浜燒、磯燒、火鍋、刺身、煮物，絕對刷新你對日本水產嘅印象！而且店內可供選擇嘅清酒非常多，除咗可以喺店家收藏入面揀自己鍾意嘅靚靚酒杯飲酒，每日下晝六點後仲有清酒買一送一，好啱同朋友夜晚嚟飲翻兩杯chill下～
必試Menu：帶子三文魚煙肉白汁意粉
煎到表面微焦嘅帶子同三文魚係呢道菜嘅主角，口感香脆之餘真係食到海鮮嘅鮮甜，再加上奶油口味嘅意粉同鹹香嘅煙肉，令食感好豐富，唔會話好膩，而且份量好足，最啱放飯嘅時候嚟醫肚！
必試Menu：松葉蟹肉蟹膏海膽炒飯
唔好睇少呢一個炒飯！佢入面居然有齊蟹膏、蟹籽、啖啖蟹肉同海膽，超級足料，多種海產嘅搭配令成個炒飯充滿蟹香同海膽嘅鮮味，口感冇得彈，可以食到啖啖肉真係超級滿足！
【INFO】
磯野水產
地址：銅鑼灣軒尼詩道525號澳門逸園中心19樓
營業時間：星期一至五 12:00 – 16:30，17:30 – 23:00；星期六至日及公共假期 12:00 – 23:00
聯絡電話：2766 3678
4. 鮨一日本料理
鮨一日本料理提供各式日本刺身同主食，餐廳內部設計還原日式居酒屋嘅格調，佢最特別嘅地方就係吧枱設計令食客可以近距離睇到廚師烹飪嘅過程，客人喺正式享用食物之前已經可以欣賞到師傅抱住匠人精神、一絲不苟咁用心製作每一道料理嘅功架，無論係視覺上定味覺上都令人好享受！
必試Menu：甲羅燒
甲羅燒嘅蟹膏幾乎滿到溢出蟹殼，一啖落去好濃郁嘅甘香滋味即刻充斥住口腔，搭配埋日本生雞蛋口感會更加順滑，值得一試！另外亦可將蟹膏塗喺脆多士上面，口感更有驚喜！
必試Menu：千層海膽飯
千層海膽飯絕對係呢間食店嘅招牌菜，上面覆蓋住滿滿一層海膽同金槍魚，每一啖都係好濃郁嘅海膽香甜味，真係不惜工本，好有誠意！海膽愛好者一定唔可以錯過！！
必試Menu：辣酒煮廣島蠔
肥美嘅廣島蠔肉質嫩滑，而且吸收晒辣酒味嘅風味，令壕嘅鮮甜好突出！
【INFO】
鮨一日本料理
地址：尖沙咀厚福街12號藍馬商業大廈18樓
營業時間：12:00 – 21:00
聯絡電話：3705 9227
5. 南瀛水產
南瀛水產用咗麻繩燈、深木色枱櫈、日式彩繪紙傘打造出地道日本風情，啱晒食客嚟打卡，唔洗出國都體驗到當地居酒屋嘅氣氛～佢嘅魚鮮都係由日本直送，全部好鮮美，保證大家可以食到百分百日本風味！嘢食方面主打刺身壽司，仲有得食磯燒，有多款海產選擇，例如岩蠔、帆立貝、活鮑魚等等，超級吸引！
必試Menu：南瀛卷
南瀛卷內容物超級豐富，有牡丹蝦、海膽、吞拿魚、三文魚子等等嘅新鮮海產，可以一次過享受多種海鮮，口感豐富，食完之後大滿足！
必試Menu：香蒜牛舌
牛舌燒得恰到好處，加上蒜粒同檸檬汁調味，十分惹味！
必試Menu：深海池魚刺身
好考驗師傅刀工嘅超薄切深海池魚刺身每一塊都晶瑩剔透，食落好新鮮，沾埋特製嘅酸汁之後更加突出深海魚本身嘅鮮甜味！
【INFO】
鮨一日本料理
地址：尖沙咀金馬倫道5號太興廣場5樓
營業時間：12:00 – 15:00；18:00 – 23:45
聯絡電話：2368 8086
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
