而家食飯難得約出黎一次，當然要搵D IG-able可以打卡嘅餐廳。唔想次次都係去cafe，又或者你已經飲咖啡飲到悶？小編今日就推介一間超有特色嘅火鍋店比大家，餐廳位於佐敦，以50年代舊香港風為主題，重現昔日華人洋行氛圍，淨係睇相都已經覺得好豪華氣派啦～ 另外呢間餐廳取名為「香江花月」其實暗藏兩個意思，除咗想懷緬舊香港嘅文化之外，最特別係佢哋嘅火鍋都係以鮮花入饌，將繁花盛放嘅主題融入火鍋湯底，借此帶比大家一個新鮮嘅火鍋體驗！想知道餐廳到底有幾靚同有咩好食，而家就即刻一齊睇落去啦～
圖片來源：openrice@or#tm66819304、chefyau1980、車媽媽、Jubaby、A.Big.Bite、LeeLee1627、IG@cin.cc、tjonphotography、findmyrey、ycc0519、velicioussss｜撰文：candice
等候區都化身成打卡位！超夢幻泡泡光影隧道+大量舊香港古董擺設
小編從來無估到火鍋店內都可以有「Team Lab」，「香江花月」以裝修美觀著稱，但如果只係見到以下呢2張相，無論如何都應該唸唔到呢個咁夢幻嘅打卡位竟然係佢哋餐廳內嘅等候區！
淨係一入門口都已經咁有心機，見到呢條時光隧道後真系好難唔心動～不過唔好以為咁就係全部啊，店內其實仲有好多打卡位，例如由多部古董電話組成嘅牆身、藥材舖嘅百子櫃子戥秤、雜貨店嘅滑輪、舊米舖嘅稱陀、當時盛行嘅打字機同留聲機等等，真系全家店都充滿住舊香港情懷㗎！
重點係店舖仲好闊落、乾淨，就算夏天去食都唔洗怕會打邊爐打到一身汗啦～
【相機食先】必試超靚花花主題牛肉拼盤+牛乳玫瑰鍋！主打多款養生美顏火鍋
除左店舖環境，餐廳嘅食物一樣咁有睇頭！餐廳有多款養生美顏火鍋比大家選擇，例如牛乳玫瑰鍋、金泊清酒海鮮鍋、初菊龍井雞鍋等等，樣樣都賣相精緻超岩打卡～
小編大推呢個招牌牛乳玫瑰鍋+香江拼（牛肉拼盤），除左有大量超高質嘅牛肉，包括和牛牛柳粒、安格斯牛、牛胸油、牛𦟌、牛心椗、牛柏葉及牛脷等。最特別係會以原木圓盤奉上，將各款牛肉捲成花嘅樣，超有心機，絕對適合相機食先！
招牌牛乳玫瑰鍋選用日本北海道全脂牛乳配上來自日本嘅玫瑰烹煮，有濃郁牛乳香氣之餘帶有淡淡玫瑰花香，層次感豐富。
另一個金泊清酒海鮮鍋都超級好食！首先以大廚秘方爆炒，配以紐西蘭牛油、洋蔥及蒜頭等令海鮮逼出鮮味，隨後加入清酒湯底一同熬製，有濃郁酒香之外味道仲好鮮甜。最後仲會喺面層灑上奢華金箔，望落都好似聞到陣香味咁啦～
打邊爐當然唔少得加配料，火鍋店提供自家手打墨魚丸，有鹹蛋黃、黑松露及蟹籽口味，口感彈牙。
而三色餃仲會喺收到客人柯打後即包即出，分別有黑松露長腳蟹餃、芝士鮮菌餃及野生松茸餃三個口味，顏色都好吸睛！
店內嘅美食真系多到不能盡錄，如果多人去食，建議大家都可以試埋冬甩墨魚果子、牛羊串串、魚皮、鴨血同金粒豆腐等等！金粒豆腐炸得外脆內軟，令人食到停唔到口～
講到最後，又點少得精美嘅飲品呢～ 餐廳有2杯超收女生歡迎嘅特色造型飲品，「鳳琉香」以自家製菠蘿味糖漿配以干薑水，最頂仲有一個香味波波製成煙霧彌漫效果，打卡一流！
而「瑰洛月」則係以洛神花、玫瑰、蘋果等材料製成糖漿，製成玫瑰型紅色冰花，以確保唔會因冰塊而令飲品味道變淡，仲帶有清新消滯功效添。
有網民試過仲話冰花可以keep到好內都唔會融化，大家可以放心慢慢影到夠～
小編見到d相都已經好想再去食多次啦，大家都快D約埋朋友一次試下啦～
【INFO】
香江花月
地址: 佐敦佐敦道35號百誠大廈2樓
電話：27368368
Whatapps：65657888
星期一至日：12:00 – 14:00｜18:00 – 22:00
——-
FB – https://www.facebook.com/saucemedia.hk/
IG – https://www.instagram.com/sauce.media.hk/
