自從屯馬綫開通之後，大家可以更方便地前往九龍城一帶。唔好睇小土瓜灣呢個小小嘅舊城區，其實蘊藏住好多地道街坊美食，價錢仲好平民㗎！今次編輯就為大家介紹7大性價比超高嘅土瓜灣美食，包括茜麵、日昇小食、囍囍小食部、Come撈、嘉樂冰廳、珍多美、巧興麵食店，等大家bookmark定，下次去土瓜灣「覓食」，即睇以下地址同詳情啦！
圖片來源：Instagram @saimeanboss、@comelo.hk、Openrice @sonson723、@LeungLeung888、@歡歡增肥之旅、@puishan_、@pauline.is.hungry、@源源想養一隻aiba兔、@imbean2、@Carly WongNY、@fatdragonloveu、@战阿豆、@avocuddle、@為食MoJil、@monster.bites、Facebook @嘉樂冰廳、@珍多美 C.domiecakeshop｜撰文：Icy
土瓜灣美食推介1. 茜麵
「茜麵」由兩夫婦主理，店舖格局雖小，但執整得企企理理，提供大概10個堂食位置。
（圖片來源：Instagram @saimeanboss）
「茜麵」主打又平又足料嘅花甲粉，即叫即製，最抵只需$43就可以食到。湯底可選香辣或者蒜香，每碗至少有10幾隻花甲，由老闆每朝到街市拎貨，確保新鮮無沙。粉絲同豆卜都好掛汁，加上芫荽、生菜同金菇等配料，更加惹味！
花甲由老闆每朝到街市拎貨，食落好鮮甜（圖片來源：Instagram @saimeanboss）
雞扒麵亦係呢度嘅招牌菜，可選蒜蓉湯、花雕雞湯或者魔鬼辣湯。雞扒肉質嫩滑，吸晒湯底精華，而且份量同樣足料！
面層鋪滿粒粒雞扒，大大份超飽肚！（圖片來源：Instagram @saimeanboss）
【INFO】 《茜麵》 地址：土瓜灣銀漢街21號地下B號舖 時間：星期一、三至日 11:30-20:30
土瓜灣美食推介2. 日昇小食
「日昇小食」供應多款滋味街頭小食，當中最出名就係大大件嘅爆餡韭菜餅，$20就有三件，價錢相當平民。韭菜餅即叫即煎，新鮮滾熱辣，外皮煎至金黃色，包住滿滿嘅韭菜同半肥瘦豬肉餡料，多汁香口！芫荽關注組嘅朋友就一定要試埋芫荽餅，同樣皮薄餡靚，帶有焦脆嘅口感，但又唔會非常油膩，越食越開胃㗎！
（圖片來源：Openrice @sonson723）
$20就有三件爆餡韭菜餅，每件都咁足料，越食越上癮！（圖片來源：Openrice @LeungLeung888）
【INFO】 《日昇小食》 地址：土瓜灣馬頭圍道428號地下C舖 時間：星期一至日 12:30-00:30
土瓜灣美食推介3. 囍囍小食部
「囍囍小食部」開店已有18年，唔好睇佢店面細細間冇咩特別，其實佢主打嘅巨型多汁炸雞髀，一直深受街坊歡迎，連區外人都會慕名而來！
（圖片來源：Openrice @歡歡增肥之旅）
巨型多汁炸雞髀只需要$22一隻，外皮金黃香脆，粉漿唔會太厚，而且肉質鮮嫩，一咬落去就爆晒啲肉汁出嚟。
（圖片來源：Openrice @歡歡增肥之旅）
雖然雞髀未必係即炸，店員姨姨可能會預先炸好部份雞髀，放係保溫爐入面，但雞髀味道依然保持水準，唔會好乾身，唔怪得備受Facebook群組「香港炸雞髀關注組」嘅推薦啦！
（圖片來源：Openrice @歡歡增肥之旅）
【INFO】 《囍囍小食部》 地址：土瓜灣天光道50號地下 時間：星期一至六 08:00-19:00
土瓜灣美食推介4. Come撈
「Come撈」係一間家庭式經營嘅小店，主打各款足料湯飯以及滷水小食。湯飯嘅名稱非常特別，例如貪靚嘅女士可以試吓「還原妹豬湯」（ $78），有滑雞、姬松茸同花膠，滋補養顏。而「海底奇兵」（$68）有魷魚、蝦、青口等海鮮，湯底清甜，配上冬瓜同肉碎，足料又健康！
（圖片來源：Openrice @puishan_）
老火湯底配上新鮮食材，食咗都唔怕肥！（圖片來源：Openrice @pauline.is.hungry、@源源想養一隻aiba兔）
店家亦會自家秘製麻辣滷水小食，特別推介辣滷蟶子（$68），大大粒嘅蟶子又嫩滑又掛汁，滷水味濃而開胃，送飯一流！
（圖片來源：Instagram @comelo.hk）
【INFO】 《Come撈》 地址：土瓜灣馬頭角道53號地舖 時間：星期一至日 11:30-23:30
土瓜灣美食推介5. 嘉樂冰廳
開業逾40年嘅荃灣老字號「嘉樂冰廳」於上年進駐土瓜灣，秉承一貫「抵食又大件」嘅精神，為街坊提供多款港式美食。當中最廣為人知嘅就係5吋超厚鹹牛蛋治（$37），厚厚嘅滑蛋配上烘底白麵包，大大啖咬落去好有滿足感，做早餐一流！
（圖片來源：Facebook @嘉樂冰廳）
鹹牛蛋治足足有5吋厚，大大啖咬落去好有滿足感！（圖片來源：Facebook @嘉樂冰廳）
不得不試嘅仲有巨大化奄列，每一份都用咗4至5隻雞蛋製作，包住滿滿嘅火腿餡料。
（圖片來源：Openrice @imbean2）
其他出品都會添加新意，令食客有驚喜嘅感覺，例如懷舊香港奶茶加上焦糖脆脆，味道香滑又帶點脆口嘅感覺。
（圖片來源：Openrice @Carly WongNY）
【INFO】 《嘉樂冰廳》 地址：土瓜灣九龍城道68號瑧尚UPLACE地下G02-03號舖 時間：星期一至日 07:00-21:00
土瓜灣美食推介6. 珍多美
「珍多美」係土瓜灣區內嘅平價麵包店，推出多款精緻手工麵包同西式切餅。當中最大賣點就係店家原創嘅開心果味布丁包（$26），選用意大利進口開心果，製成濃郁嘅開心果布丁漿，再以冷凍方式凝固，質感滑捋捋，充滿奶香，仲帶有半流心效果！上面仲會以開心果碎點綴，大家可以品嚐到正宗意大利開心果嘅香脆口感。
（圖片來源：Facebook @珍多美 C.domiecakeshop）
（圖片來源：Openrice @fatdragonloveu、@战阿豆）
而其他鮮果撻亦非常出色，特別推介紫薯撻，好似唧雪糕咁將紫薯蓉放係撻皮上，頂部仲有一粒小麻糬。紫薯撻味道天然唔會太甜，撻皮散發陣陣牛油香，精緻又好味。
（圖片來源：Openrice @avocuddle）
【INFO】 《珍多美》 地址：土瓜灣土瓜灣道283號地舖 時間：星期一至日 06:30-20:30
土瓜灣美食推介7. 巧興麵食店
「巧興麵食店」係土瓜灣佇足三十幾年，門面簡樸低調，但以價錢平民嘅地道北京餃為名，深受街坊喜愛。餃子種類有韮菜餃、白菜餃、牛肉餃、三鮮餃同菜肉雲吞餃，每份大概$40，一份有10粒。
餃子外型好似一個個金元寶，粒粒都好飽滿（圖片來源：Openrice @monster.bites）
【INFO】 《巧興麵食店》 地址：土瓜灣安徽街7號嘉信大廈地下 時間：星期一、三至日 11:00-22:00
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
