成日覺得唔夠血氣想Keep住暖啲?遇上最低溫嘅嗰幾日,手手腳腳都凍到冇感覺咁濟?有冇諗過種種成因,其實都係日常生活上一啲嘅壞習慣所引起呢?如果唔好好調理身體,嚴重嘅話仲可能會衍生成婦女病!想知可以點調理就記得碌埋落去睇喇!

圖片來源:網絡圖片 | 撰文: Debbie

點解會成日手腳冰冷?

手腳冰冷主要係因為體內血液循環唔好,造成四肢冰冷。尤其冬天嘅時候血管會收縮以防體溫散失,所以手腳冰冷嘅症狀會更加明顯〜除咗血管會自然調節之外,手腳冰冷亦同壓力過大以及個人體力相關!呢啲都會導致血液流速降低或者血量下降,引發冰冷狀況!另外就係大部分女仔都鍾意飲凍飲呀手搖飲品,飲得多都會令身體增添寒氣容易四肢變冷!

三款調理身體保暖湯水(1):大棗紅糖生薑湯

紅棗同紅糖對身體有補血作用,女人氣血虛嘅時候就可以飲多啲紅棗紅糖水,放入薑仲驅寒嘅效果添!不過記得經期期間要避免飲用,以免血量過多。平時適當地服用都有保健強身、益氣作用,係一款既廉價又實用嘅女性保健佳品!

材料:

生薑-四片

紅棗-三個

紅糖-一勺

做法:

1.)將紅糖、無核金絲棗、薑片放入燉煮的容器中。

2.)注入適量清水並蓋上蓋子

3.)燉煮半個小時即可飲用。

圖片來源:網上圖片

三款調理身體保暖湯水(2):赤小豆粉葛豬骨湯

粉葛有去濕抗衰老嘅功效,仲可以清熱、去骨火!赤小豆健脾祛濕、利尿消腫,而蜜棗可以補氣同止咳潤肺。粉葛赤小豆扁豆豬骨湯煲出嚟又甜又香,屋企大人細路都啱飲㗎!

材料:

粉葛- 1/2至1個

赤小豆- 40g

扁豆- 40g

紅蘿蔔- 1-2條

豬骨-2-3件

蜜棗-3粒

果皮 -1/4片

水-3L

做法:

1.)將豬骨汆水備用

2.)紅蘿蔔及粉葛去皮切件備用

3.)赤小豆、扁豆、蜜棗洗淨略浸備用

4.)果皮浸軟去囊

5.)將所有材料放入高壓煲煲20分鐘,於喝前再大滾一下便OK。

圖片來源:網絡圖片

三款調理身體保暖湯水(3):紅薯紅棗湯

紅薯紅棗湯本身就係一種養生湯。紅薯含有一定膳食纖維,可以促進腸胃消化亦都可以溶解脂肪!超啱女仔飲㗎〜紅棗亦補血嘅好處,對人體皮膚都有一定養護作用,所以喺日常生活中就要多食用紅薯銀耳紅棗湯喇!

材料:

銀耳、紅薯、紅棗、冰糖

做法:

1.)將銀耳用水泡散,撕成小塊。

2.)將紅薯洗乾淨並去皮,然後切成小塊,另外將紅棗洗乾淨。

3.)準備好一個鍋,將各種食材放入其中,加入適量的清水,開火熬煮30分鐘

4.)然後放入冰糖,再次熬煮10分鐘。等到冰糖融化之後,冷卻即可食用。

圖片來源:網上圖片

——————————————————
Follow 我地睇更多最新情報!
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/