香港迪士尼樂園又有新嘢玩啦！美國加州剛舉行完嘅D23全球粉絲大會，終於揭曉咗香港迪士尼樂園嘅最新擴建藍圖。今次亮點集中喺「反斗奇兵大本營」同「Marvel 主題園區」，無論係一家大細定係超級英雄迷都有福啦！
圖片來源：官方圖片｜撰文：Sharon
反斗奇兵大本營：全新大劇場
先睇下「反斗奇兵大本營」，園區預計喺 2027 年上半年會起好一座全新嘅大劇場，呈獻 Pixar 主題嘅無邊實境劇場匯演。故事主角係全新原創嘅毛絨玩具「Poppy」，講佢跟住主人Aria從香港搬到安仔（Andy）屋企隔壁，一班《反斗奇兵》舊友仲會出動幫佢適應新環境！匯演仲特別收錄咗兩首由港美團隊跨國合作創作嘅原創歌曲。最吸引嘅係全新後院遊樂空間加入咗超多香港特色童年元素，例如中國象棋、搖鼓同地道蛋撻，本土味濃郁！
Marvel主題園區：蜘蛛俠同場作戰＋昆式戰鬥機停機坪
至於 Marvel 粉絲就更加唔可以錯過！園區將會增設全新嘅昆式戰鬥機停機坪，仲有一座帶有復仇者聯盟標誌嘅高樓展館，作為「復仇者聯盟科技研究實驗室」，直接刷新明日世界嘅天際線。大家仲可以玩到以蜘蛛俠為主角嘅新遊樂設施，同蜘蛛俠並肩作戰之餘，仲可以聯同其他超級英雄一齊穿梭瓦干達同聖域界去打怪獸！
呢兩個全新園區項目真係令人超級期待，快啲約埋平時一齊去迪士尼玩嘅朋友，準備好到時去最新地標打卡啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
