2024元宵節 | 元宵節為農曆正月十五，大家通常都會喺呢一日賞花燈同猜燈謎，同另一半甚或屋企人一齊過中式情人節，即刻睇睇今年有邊度好去喇！
圖片來源：官方網站 | 撰文：Hedy
2024元宵節好去處| 1. 春節綵燈展——香港文化中心露天廣場
為咗配合2024年市區元宵綵燈會，非物質文化遺產辦事處同本地紮作師傅陳耀華先生合力製作精美花燈，大家可以喺度感受到舞龍以及紮作技藝，呢兩項本地非物質文化遺產嘅項目。當中最吸引嘅就係約1.3米高嘅青龍以及2.5米高嘅大型宮燈，呈現出生氣盎然、花攢錦簇之景象！花燈將以代表春天生機嘅青龍為主要設計元素，喺宮燈同綻放嘅年花之間穿梭。大家都可以一齊嚟感受非物質文化遺產項目嘅活力，同時又可以欣賞師傅精湛嘅紮作技藝。
【INFO】 《春節綵燈展》 日期：即日起至2月25日 時間：晚上6時至11時（亮燈時間） 地點：香港文化中心露天廣場
2024元宵節好去處| 2. 元宵綵燈會
今年嘅元宵綵燈會將分別喺香港文化中心露天廣場、香港單車館公園以及天水圍公園及銀座廣場舉行。香港文化中心露天廣場將會以「迎春接福・祥龍獻瑞」為主題，透過一系列喜慶燈組以及喺年花間穿梭嘅舞龍水池燈組，為大家帶嚟濃厚嘅新春氣氛。香港單車館公園將會佈置成為一個「童趣夢幻樂園」，當中包括生動活潑可愛嘅龍寶寶綵燈以及璀璨奪目嘅走馬燈等等。迎接龍年又點少得主角呢？天水圍公園及銀座廣場將以「『龍』情蜜意慶新歲」為主題，以龍鳳呈祥嘅大型走馬燈迎接市民進入園區。同場更有湖北省演藝集團嘅大型民族歌舞及綜合表演、歌舞演出、即場點歌、舞池及猜燈謎，免費入場之餘又可以玩得盡興！
【INFO】 《元宵綵燈會》 綵燈展示日期：2月20至25日 亮燈時間：晚上6時至11時 綵燈晚會日期：2月23日（香港單車館公園）、2月24日（香港文化中心露天廣場）、2月25日（天水圍公園及銀座廣場） 時間：晚上7時30分至10時
2024元宵節好去處| 3. 嗇色園甲辰龍年元宵晚會
新年除咗要周圍去拜年之外，好多人都會選擇去黃大仙祠參拜祈福。而適逢元宵節，嗇色園將會喺今年2月24日舉行一年一度嘅元宵晚會，當晚更會延長開放時間至晚上10點。除咗有猜燈謎、夜光舞龍表演及燈籠工作坊之外。元宵節當然要參拜月老喇，參拜完仲會送你月老紅線，幫你旺人緣加催桃花，隨時今年就可以識到另一半！
【INFO】 《嗇色園甲辰龍年元宵晚會》 日期：2月24日 晚會時間: 晚上6時至10時 (最後入園時間為晚上9時) 地點：嗇色園黃大仙祠
2024元宵節好去處| 4. 元朗新田元宵廟會
今個元宵節，有百年歷史嘅元朗新田東山古廟將會舉辦元朗新田元宵廟會，呢個天后廟係見證香港由明清期間至今嘅歷史建築。元宵廟會將會揉合中國傳統文化同圍村風味，打造由188個色彩繽紛嘅燈籠所組成嘅花燈長廊，喺古色古香嘅古廟互相映襯下，成為最佳嘅打卡熱點。當中更有全港首創線下實境古代解謎遊戲，同真人NPC互動解謎，沉浸式體驗明代元宵節！就連市集嘅遊戲都有投壺、踢毽子等遊戲選擇，簡直喺充滿古風同埋本土特色！無論係大人定小朋友都可以體驗著上雅緻嘅漢服，參與漢服攝影，一齊過一個歡樂嘅元宵節。
【INFO】 《元朗新田元宵廟會》 日期：2月24日至25日 時間：上午11時至下午8時 地點：元朗新田東山古廟及惇裕學校
2024元宵節好去處| 5. 沙田元宵樂繽紛
沙田元宵樂繽紛將設有多個節慶打卡位，包括10米長嘅閃爍心形隧道以及元宵花燈打卡牆。除咗可以打卡同猜燈謎之外，更邀請咗歌星菊梓喬及譚嘉儀等現場獻唱，更有著名魔術師甄澤權嘅魔術表演。同場更設有傳統手工藝攤位同攤位遊戲，只要喺沙田區商戶消費滿$500，就可以參與抽獎，隨時贏走iPhone15及家庭電器等，新一年要嚟試試運氣啦！
【INFO】 《沙田元宵樂繽紛》 日期：2月24至25日 時間：下午3時至晚上9時 地點：沙田公園
2024元宵節好去處| 6. 沙頭角元宵同樂日
為配合沙頭角禁區開放，元宵節當日將會舉行「沙頭角元宵同樂日」，並增加額外1000個人遊名額，啱晒大家去遊歷打卡！除咗有沙頭角特色傳統文化表演，例如陸上龍舟、魚燈舞及舞麒麟等等，更可以品嚐由沙頭角居民親手製作嘅地道小食，如柴火米通、客家茶粿等。
【INFO】 《沙頭角元宵同樂日》 日期：2月24日(星期六) 時間：下午2時至下午5時 地點 ：沙頭角兒童遊樂場（近沙頭角中心小學）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
