深圳好去處 | 放假除咗可以留喺香港玩之餘，都可以帶埋小朋友去深圳玩返一晚，吃喝玩樂都相當方便！即睇小編推薦10大深圳好去處，無論係玩水、滑雪定係按摩都一定滿足到你嘅願望，而且價錢超優惠！
圖片來源：klook、小紅書@topstage、Free and enthusiastic | 撰文：Hedy
深圳好去處推薦 | 1. 極速飛車賽車俱樂部
去深圳當然要玩返啲香港冇嘅嘢，無論係大人定小朋友都鍾意玩賽車！小編就推薦大家可以到訪深圳世界之窗嘅極速飛車賽車俱樂部，除咗係全國連鎖有保證之餘，更係國內第一個叢林卡丁車項目，佔地8000平方米。賽道全場500米，有直曲結合嘅賽道，場地模擬山地地形，等大家都可以一齊體驗玩賽車嘅樂趣。想玩單人車就一定要年滿14歲或以上，身高150cm以上，如果小朋友年齡未夠，就想要爸爸媽媽陪伴一齊玩雙人車，身高需要120cm以上。場內已經為大家免費提供頭盔以及頭套等安全裝備，咁就可以玩得安全又放心。價錢都只係$132（每人）以及$208（雙人），可以玩足8分鐘。
【INFO】
《極速飛車賽車俱樂部》
營業時間：星期一至四 10:00至21:00；星期五10:00至22:00；星期六 9:30至22:00；星期日 9:30至21:00
地址：深南大道9037號世界之窗 景區荔枝林雕塑園101號
價錢：港幣$132 / $208
購票連結：https://bit.ly/3AfDEp4
深圳好去處推薦 | 2. HOP-DX潮玩運動街區
天氣咁熱上深圳玩都要揀定啲室內好去處，咁就唔怕落雨或者玩到中暑啦！位於深圳寶安前海 HOP 天地嘅「室內潮玩街區HOP-DX」有成16萬呎空間，等大家可以暢玩100多個項目，當中包括射箭、保齡球、籃球機、碰碰車、桌球、高爾夫球以及麻雀等，無論係大人定小朋友都可以一次過體驗！
【INFO】 《HOP-DX潮玩運動街區》 營業時間：10:00至24:00 地址：深圳市寶安區興華一路19號前海HOP天地B1-22號 價錢：港幣$177起 購票連結：https://bit.ly/4clHgDl
深圳好去處推薦 | 3. 卡魯冰雪世界
炎炎夏日除咗可以玩水之餘，亦都可以帶小朋友上深圳體驗最大嘅滑雪場——卡魯冰雪世界，佔地約1.2萬平方米。場內設有室內滑雪館、滑冰館以及娛雪區等，啱晒初學者喺度學習！場館入面嘅雪地採用模擬造雪技術，雪質接近天然雪，就連喺「娛雪區」都有雪橇以及滑梯等設備，畀小朋友玩樂，大人細路一齊體驗滑雪嘅樂趣。
【INFO】 《卡魯冰雪世界》 營業時間：10:00-22:00 地址：廣東省深圳市龍華區高爾夫大道15號觀瀾湖生態運動公社 價錢：港幣$107.5起 購票連結：https://bit.ly/3SJIRf8
深圳好去處推薦 | 4. WOWO窩窩萌寵樂園
暑假如果想帶小朋友邊玩邊學習嘅話，小編就推薦大家嚟到WOWO窩窩萌寵樂園，入面有近千隻，超過50種唔同嘅動物，包括瑞士瓦萊黑鼻羊以及水豚等。小朋友除咗可以認識唔同動物之外，亦都可以零距離接觸，仲可以親自餵野食畀佢哋，絕對係一個超難忘嘅體驗！
【INFO】 《WOWO窩窩萌寵樂園》 營業時間：10:00至18:30 地址：深圳市南山區沙河街道東方社區深南大道世界之窗停車場內 價錢：港幣$68起 購票連結：https://bit.ly/3WZAdMd
深圳好去處推薦 | 5. 金沙灣水世界
夏天必定要帶小朋友玩水，中信金沙灣水世界設有全進口7大巨型水上玩樂設備，當中包括裂口大喇叭及鋸齒巨碗，帶你由十米高空衝落去，享受強大嘅離心力。仲有4層樓高嘅玄武大滑梯以及為小朋友而設嘅玄武小滑梯，更有佔地 2500米嘅海灣水寨等。帶大家喺度享受最好嘅親子時光！
【INFO】 《金沙灣水世界》 營業時間：10:00至23:00 地址：廣東省深圳市大鵬新區棕櫚大道33號中信金沙灣樂園 價錢：港幣$183起 購票連結：https://bit.ly/3YMaYOR
深圳好去處推薦 | 6. 錕鵬卡丁車
港人去北上玩樂都一定會試試唔同嘅室內卡丁車，深圳嘅錕鵬卡丁車除咗可以畀小朋友玩之餘，就連大人都玩得，而且位置亦鄰近地鐵，相當方便！卡丁車結構仿造F1賽車，底盤穩定安全性高，操控簡單又靈活。就算新手未玩過都唔需要擔心，因為除咗有齊頭盔以及護具等保護裝備之外，仲有專業教練指導，安全又放心！
【INFO】 《錕鵬卡丁車》 營業時間：10:00至22:00 地址：深圳市寶安區新安街道上川社區35區前進一路282號沃爾瑪三樓 價錢：港幣$69起 購票連結：https://bit.ly/4dhbeK4
深圳好去處推薦 | 7. 阿奇拉湯泉
香港人工作壓力大，就連收工都要趕返屋企照顧小朋友，放假嘅時候就絕對要北上放鬆下。只需要一張浴票，就可以享受足療、中式按摩、泰式按摩以及SPA護理等，令你嘅身心靈都可以放鬆。就算肚餓都有唔同嘅飲品、水果以及雪糕供應畀，仲有PS5、SWITCH遊戲以及跳舞機等畀大家玩，喺度好好享受一個休閒嘅下午，短暫忘記壓力！
【INFO】 《阿奇拉湯泉》 營業時間：00:00至23:59 地址：南山區桃園路田夏金牛廣場AB樓2-3層 價錢：港幣$249起 購票連結：https://bit.ly/3YFgPVS
深圳好去處推薦 | 8. Topstage
TOPSTAGE為大型娛樂遊戲體驗館，佔地20,000平方呎，當中有保齡球場、滾軸溜冰場、沙壺球，踩格仔機以及Mario賽車多遊戲，絕對適合小朋友一次過體驗多種運動，簡直就係小朋友嘅放電好去處！小編就推薦大家一定要試試踩格仔機，考驗大家嘅眼界以及反應力！玩到攰就可以喺度食埋嘢，補充體力！
【INFO】 《Topstage》 營業時間：10:00至22:00（星期日至星期四）；10:00至22:30（星期五及星期六） 地址：深圳市寶安區得豐圓方購物中心2樓 價錢：港幣$182起
深圳好去處推薦 | 9. 海昌·樂漫冰雪王國
想打卡靚之餘，又想帶小朋友滑雪？嚟海昌·樂漫冰雪王國就絕對啱晒你，樂園佔地40,000呎，樓底約10米高，亦都係以東歐風格為主題嘅冰雪樂園，打卡超靚。當中更分為5大部份，嘉年華派對、霧凇森林、冰川山脈、極地大陸和冰雪城堡，大家都可以喺度任玩！如果一個玩更可以喺夜場享用優惠價$90遊玩！
【INFO】 《海昌·樂漫冰雪王國》 營業時間：10:00至22:00 地址：深圳市寶安區新安湖社區建安一路99號海雅廣場4層L430號商鋪 價錢：港幣$90起 購票連結：https://bit.ly/3yDchou
深圳好去處推薦 | 10. 梅拉尼亞小鎮
去深圳都可以輕鬆影靚相打卡，最近更加新開咗一個歐陸小鎮「梅拉尼亞小鎮」，當中更有7大打卡位，包括如復古車站、歐式教堂、布拉格天文鐘等，更可以免費入場打卡！瞬間就好似去咗歐洲一樣，入面更有文創店、禮品店等可以行，地方唔大但勝在打卡一流！
【INFO】 《梅拉尼亞小鎮》 營業時間：9:00至21:00 地址：深圳南山區梅拉尼亞小鎮 價錢：免費入場
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
