韓國楓葉2025｜踏入秋天，唔少人都會去韓國賞楓葉，感受浪漫嘅秋季氣氛。小編藉此精選以下10大韓國首爾賞楓景點，交通方便又超好影相，快啲plan定行程啦！
圖片來源：小紅書@大妹Damei、@Jinny、@Senneebb、@紅鯉魚與綠鯉魚與驢V、@李十七、@小手冰冰凉R、@BB小餅留學版、@一顆桃子椰、@小紅薯630E77C2、韓國觀光公社 | 撰文：Icy
最近韓國觀光公社公布咗2025年最佳賞楓時間，楓葉由初紅到最美高峰期通常係約兩星期後，而全韓國嘅最佳賞楓期大致集中喺10月中旬至11月上旬。
首爾賞楓景點 | 1. 龍山家族公園
位於龍山區嘅龍山家族公園原本為駐韓美軍基地，隨住美軍基地遷移，逐步改建成國家公園，但周圍嘅紅磚屋仍然保留至今。每年11月左右，中央草坪附近都會染上鮮紅秋色，特別喺黃昏時分，夕陽映照配上復古紅磚屋，營造出異國小鎮嘅氛圍。
【INFO】 龍山家族公園 地址：韓國首爾龍山區西冰庫路185 開放時間：星期二至日09:00-17:30 前往方法：乘搭首爾地鐵京義中央線，於「西冰庫站」下車，從1號出口步行約2分鐘
首爾賞楓景點 | 2. 國立古宮博物館
位於景福宮旁邊嘅國立古宮博物館，展示昔日宮廷生活嘅歷史文化，散發住王朝年代嘅莊嚴氣息。博物館外種有一棵高大嘅銀杏樹，每年大約10月中旬至11月上旬，金黃嘅銀杏樹搭配古宮屋簷同石牆，更添古典詩意！
【INFO】 國立古宮博物館 地址：韓國首爾鐘路區孝子路12 開放時間：星期二至日10:00-18:00 前往方法：乘搭首爾地鐵3號線，於「景福宮站」下車，從5號出口步行約2分鐘
首爾賞楓景點 | 3. 德壽宮石牆路
位於世宗大路嘅德壽宮石牆路係韓劇《鬼怪》拍攝地之一，沿途古老石牆與傳統建築相映成趣，散發古樸嘅歷史風情，所以被譽為韓國最美散步街道。每年楓葉季節，兩旁銀杏樹染上金黃，樹影灑落於石牆上，令整條小路都充滿浪漫秋色！
【INFO】 德壽宮石牆路 地址：韓國首爾中區世宗大路99 開放時間：每日24小時開放 前往方法：乘搭首爾地鐵1號線或2號線，於「市廳站」下車，從1號或2號出口步行約10分鐘
首爾賞楓景點 | 4. 成均館明倫堂
位於成均館大學內嘅明倫堂，矗立住一棵擁有逾五百年樹齡嘅銀杏，粗壯嘅樹幹與枝葉極為壯觀。每到楓葉季節，滿樹金黃嘅銀杏都會成為校園裏最具代表性嘅景色。好多人都會從宮殿方向取景，將古老銀杏與周圍嘅朝鮮時代建築一同收入鏡頭，充滿古典韻味～
【INFO】 成均館明倫堂 地址：韓國首爾鍾路區成均館路25-1 開放時間：每日09:00-18:00 前往方法：乘搭首爾地鐵4號線，於「惠化站」下車，從4號出口步行約10分鐘
首爾賞楓景點 | 5. 昌德宮秘苑
位於昌德宮北面嘅秘苑，原本係為朝鮮王室而設嘅休憩花園，至今仍保留古木參天嘅自然景致，因此被列入韓國文化遺產。每年10月中旬至11月上旬期間，秘苑內池畔及古亭周圍嘅楓葉都會紛紛轉紅，景色如畫。遊客必需預先上網登記，購買導賞團門票方可入園賞楓～
【INFO】 昌德宮秘苑 地址：韓國首爾鐘路區栗谷路99 開放時間：星期二至日10:00-17:00（入場截止時間為15:30） 門票價錢：成人5,000₩、青少年（7至18歲）2,500₩、兒童（6歲以下）及長者（65歲以上）免費 前往方法：乘搭首爾地鐵3號線，於「安國站」下車，從3號出口步行約3分鐘 官方網站：https://bitly.cx/MtLv
首爾賞楓景點 | 6. 梨花女子大學
位於西大門區嘅梨花女子大學，一向以典雅歐式建築及浪漫校園景致聞名。每到10月中旬至下旬，校園大道兩旁嘅楓樹及銀杏樹紅黃交錯，配上哥德式建築，猶如置身於歐洲古城般。大學附近更有雲集各式服飾店、咖啡店等嘅商圈，賞楓之後就可以去行街購物～
【INFO】 梨花女子大學 地址：韓國首爾西大門區大峴洞11-1 開放時間：每日24小時開放 前往方法：乘搭首爾地鐵2號線，於「梨大站」下車，從3號出口步行約5分鐘
首爾賞楓景點 | 7. 三清洞街道
位於鐘路區嘅三清洞街道，沿路佈滿咖啡店、畫廊及文創小店，配上傳統韓屋建築及石牆，營造出古典又時尚嘅氛圍。每到10月中旬至11月上旬，街道兩旁嘅楓樹及銀杏樹金黃交織，為整條街道添上迷人嘅秋色～
【INFO】 三清洞街道 地址：韓國首爾鐘路區三清洞 開放時間：每日24小時開放 前往方法：乘搭首爾地鐵3號線，於「安國站」下車，從1號出口步行約10分鐘
首爾賞楓景點 | 8. 首爾林
位於城東區嘅首爾林，鄰近深受年輕人歡迎嘅聖水洞商圈，周圍滿佈特色咖啡店及設計師小店。而每到秋季，公園內嘅銀杏林同水杉林都會陸續轉成金黃色，大自然與城市景觀交融，吸引唔少遊客於林間漫步、踩單車或野餐，感受濃濃秋季氣息～
【INFO】 首爾林 地址：韓國首爾城東區纛島路273 開放時間：每日24小時開放 前往方法：乘搭首爾地鐵盆唐線，於「首爾林站」下車，從4號出口步行約5分鐘
首爾賞楓景點 | 9. 慶熙大學
位於東大門區嘅慶熙大學，以宏偉嘅哥德式宮殿建築聞名，當中以本館旁嘅和平教堂最具代表性，散發濃厚古典氣息。每到10月中旬至11月上旬，校園大道兩旁嘅楓樹與銀杏紛紛轉紅變黃，紅葉配上石造建築，成為校園內一大人氣打卡點～
【INFO】 慶熙大學 地址：韓國首爾東大門區回基洞1號 開放時間：每日24小時開放 前往方法：乘搭首爾地鐵1號線，於「回基站」下車，從1號出口步行約10分鐘
首爾賞楓景點 | 10. 南山公園
位於首爾市中心嘅南山公園，環繞著名地標南山首爾塔，係市內人氣極高嘅賞楓熱點。每到10月下旬至11月初，園內山坡與步道兩旁嘅楓葉漸漸染紅，當中以南山北側循環路最為壯麗。大家可以沿住林蔭小徑慢行，靜心欣賞滿山秋色～
【INFO】 南山公園 地址：首爾中區三一大路231號 開放時間：每日24小時開放 前往方法：乘搭首爾地鐵4號線，於「明洞站」下車，從4號出口步行約15分鐘至南山纜車站
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
