年尾咁多長假期，相信好多人都會報復式旅行，而韓國係就香港人嘅熱門旅遊地方之一。除咗比較出名嘅弘大同明洞等購物區，韓國近郊亦有好多值得去嘅地方。今次小編為大家介紹江原道江陵地區一日遊，除咗唯美海景之外，仲可以朝聖BTS車站同韓劇「鬼怪」拍攝地，品嚐江陵特色豆腐鍋，各位韓迷要bookmark定啦！
圖片來源：韓國觀光公社、鬼怪劇照、Instagram @icy.tso、@rosy__coffee｜撰文：Icy
前往交通方法
由於江陵比較偏遠，所以由首爾出發嘅話，車程都會比較長。小編為大家介紹兩個最常見嘅前往交通方法，建議大家預先喺市區地鐵站嘅售票處或者網上買定車票，咁就唔怕錯過班次！
- KTX
由首爾火車站乘搭KTX出發至江陵，需時約2小時，車程比較快，而且座位亦比較舒適，不過車費就會貴啲，成人單程為₩27,600。由於座位有限，所以建議大家係網上預訂車票，提早計劃行程。
訂票：KTX官網
- 巴士
乘搭直通巴士前往江陵嘅價錢較相宜，成人單程為₩22,300，不過車程需時約3小時或更多。大家需要到首爾地鐵2號線江邊站嘅「東首爾巴士客運站」購買車票，或者預早係網上預訂車票。
江原道江陵一日遊｜行程1：BTS車站 – BTS專輯拍攝地
相信韓迷們對於呢個海邊車站唔會陌生，呢度並唔係一個真嘅車站，而係人氣韓國男團BTS嘅專輯拍攝地。由江陵市區出發，需要乘搭300或302號公車，於注文津站落車。
（圖片來源：韓國觀光公社）
公車站牌後面就係白沙灘同一望無際嘅大海，好多韓國人都會趁假期去海灘度假，所以附近一帶嘅人流都幾旺。車站附近好貼心咁設置手機座，方便遊客自拍，唔怪得吸引咁多韓迷特意前往打卡啦！
萬里無雲嘅藍天真係點影都咁好睇（圖片來源：Instagram @icy.tso）
【INFO】
地址：江原道江陵市注文津邑香湖里
交通：由江陵KTX站乘搭300或302號公車前往注文津，車程約1小時
由江陵市區乘搭的士前往注文津，車程約30分鐘
江原道江陵一日遊｜行程2：注文津港 – 《鬼怪》拍攝地
另一個要介紹嘅韓迷必去景點就係注文津港，呢度嘅防波堤係韓劇《鬼怪》嘅拍攝地之一。雖然話就話同樣係注文津，但由BTS車站步行過去都需時1小時，所以建議大家乘搭的士。
（圖片來源：韓國觀光公社）
海岸旁邊就係一個大沙灘，蔚藍嘅海景完全冇被建築物遮擋，大家可以係度吹住海風散下步。如果想還原金高恩召喚鬼怪嘅經典場景，就記得帶埋腳架去打卡喇！
（圖片來源：鬼怪劇照）
【INFO】
地址：江原道江陵市注文津邑海岸路1609
江原道江陵一日遊｜行程3：安木咖啡街
安木海邊有一條咖啡街，全部都係面向海岸嘅咖啡店，如果行到攰，想輕輕鬆鬆欣賞海景，就一定要朝聖呢度嘅咖啡店。小編特意推介Rosy Coffee，樓高三層，另外亦有頂層天台位置，視野更加開揚。
（圖片來源：韓國觀光公社）
Rosy Coffee裝潢以純白同木系作主調，空間好廣闊，座位與座位之間唔會太密集，仲會設置寬敞嘅沙發區，感覺休閒舒適。
（圖片來源：Sauce Media、Instagram @rosy__coffee）
Rosy Coffee主要供應各種特色蛋糕同飲品，其中牛乳忌廉戚風蛋糕口感香濃幼滑，甜而不膩。大玻璃窗透入自然光，面對住無敵大海景，嘆返杯香醇咖啡，實在太寫意啦！
（圖片來源：Instagram @rosy__coffee）
【INFO】
地址：江原道江陵市滄海路14號街52
營業時間：星期一至五 09:00-22:00／星期五、六 09:00-00:00
交通：由江陵KTX站乘搭的士至安木咖啡街，車程約10分鐘
江原道江陵一日遊｜行程4：草堂豆腐村
草堂豆腐村以嫩豆腐而聞名，江陵嘅豆腐同我地一般食到嘅豆腐並唔一樣，餐廳會將研磨好嘅豆腐進行多工序加工，製作過程中會加入東海岸嘅海水，冷卻凝固而成，所以帶有微微海水鹹味，口感有啲似布丁，特別鮮嫩。
就算唔點任何醬汁，都可以品嚐到豆腐嘅海水鮮味！（圖片來源：韓國觀光公社）
村莊內聚集咗多間以豆腐料理聞名嘅餐廳，所以隨意走入一間餐廳都可以品嚐到正宗江陵豆腐。有啲餐廳門口仲會設置即場製作豆腐嘅工作區，確保豆腐新鮮！
（圖片來源：韓國觀光公社）
【INFO】
地址：江原道江陵市草堂嫩豆腐街99
交通：由江陵KTX站乘搭的士前往，車程約10分鐘
江原道江陵一日遊｜行程5：江陵中央市場
最後必定要遊覽江陵中央市場，品嚐傳統韓國美食。呢個市場係江陵市最具代表性嘅傳統市場，設立於1980年，每日都會營業。由於距離江陵站尚算近，所以大家逛完市場後，就可以乘搭回程車返回首爾市區。
（圖片來源：韓國觀光公社）
中央市場貨品種類包羅萬有，匯聚300多間商店，琳琅滿目：地下為水產市場；1樓主要售賣電子產品、服飾、乾貨食材等等；而2樓主要係餐廳同咖啡廳。另外大家一定要試試各種路邊攤小食，例如煎餅、黑糖餅、炸雞、炸蝦等等，即叫即整，新鮮滾熱辣，充滿地道風味。
（圖片來源：韓國觀光公社）
【INFO】
地址：江原道江陵市金城路21
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
