張國榮Cafe | 相信哥哥張國榮仍然係香港人心中有著相當重要嘅地位，至今仍然對佢念念不忘。而韓國就有哥哥嘅歌迷，開設咗一間以哥哥張國榮為主題嘅咖啡店，店入面有唔少嘅珍藏，下次去韓國嘅時候記得去飲杯咖啡參觀吓啦～
圖片來源：Instagram@cafe_leslie | 撰文：Hedy
哥哥張國榮除咗深受香港人敬重之外，原來哥哥都喺唔少韓國人心目中有著不可撼動嘅地位，於80年代憑電影《英雄本色》喺韓國大受歡迎，相信大家永遠都冇辦法淡忘對哥哥嘅思念同記憶。而韓國就有一位喜愛哥哥超過30年嘅歌迷，開設咗一間以張國榮英文名「Leslie」所命名嘅咖啡店，將歷年來嘅收藏公開，當中包括黑膠、CD、明信片、錄影帶以及海報等等，將唔同國家以及地區嘅張國榮歌迷聚埋一齊深入交流～
張國榮Cafe | 張國榮Cafe地址
喺柔和嘅裝潢氣氛之下，同一眾哥哥嘅粉絲交流之餘，仲可以邊嘆咖啡同甜品，超寫意～而店長更會喺值得紀念嘅日子，例如喺每年嘅4月1日，都會重播唔同嘅電影，當中包括《霸王別姬》、《阿飛正傳》以及《春光乍洩》等等，分享關於哥哥嘅瑣碎事。而且呢度嘅佈置每隔一段時間都會更新，等大家每次去韓國嘅時候都可以紀念低呢個美好嘅時刻。而店內亦有售賣印有Leslie名字嘅布袋以及杯碟設計，買返香港紀念都係一個唔錯嘅選擇！
【INFO】 《Cafe Leslie》 營業時間：9:30至18:00 地址：114, Sindo 2-gil, Deogyang-gu, Goyang-si, Gyeonggi-do, Republic of Korea
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
