迪士尼探險號 | 鍾意迪士尼嘅粉絲絕對唔可以錯過2025年喺新加坡啟航嘅迪士尼探險號，當中更有7大主題區，仲有Toy story水上樂園以及Marvel過山車等，即刻睇吓有咩咁值得去！有興趣嘅朋友記得要喺呢個時間預訂！
圖片來源：官方圖片 | 撰文：Hedy
迪士尼遊輪旗下嘅迪士尼探險號，首次喺東南亞地區設立航線，將於2025年喺新加坡盛大登場，以新加坡為母港5年。遊輪總重達20萬8,000噸，載客量約6,700人。旅程將會為大家提供3晚或4晚嘅新加坡公海遊，由於航線唔會停泊任何港口，所以既係旅程都係目的地！大家準備好同迪士尼朋友見面未呢～根據迪士尼遊輪最新發佈嘅概念圖，迪士尼探險號將會打造成7大主題區域，除咗有全球最長250米Marvel海上過山車之外，亦有Toy Story水上樂園！即刻睇睇呢7大區域：
迪士尼探險號主題區域 | 1. Disney Imagination Garden
迪士尼探險號入面嘅戶外露天花園，以剪紙風格嘅園林景觀，再加上唔同植物嘅配搭，打造出一個景色怡人嘅花園，猶如行入去迪士尼立體故事書一樣。Disney Imagination Garden設有劇場舞台、2間快餐店、1間酒吧以及花園景觀客房。
迪士尼探險號主題區域 | 2. Disney Discovery Reef
呢度將以海洋故事為主題，當中包括《小魚仙》、《海底奇兵》、《星際寶貝》及《盛夏友晴天》，為家庭提供玩樂、購物和餐飲嘅一個休閒場所。
迪士尼探險號主題區域 | 3. San Fransokyo Street
受華特迪士尼動畫工作室 (Walt Disney Animation Studios) 所製作嘅《大英雄聯盟》動畫啟發，將以舊金山和東京嘅元素融合，打造出獨具匠心嘅家庭娛樂區域。當中大家更會喺度見到Hiro訓練區，四人一組喺高科技遊戲地板上奔跑、躲避和阻擋，測試大家嘅靈活程度！
迪士尼探險號主題區域 | 4. Wayfinder Bay
喺迪士尼探險號上面，最適合就係坐喺度欣賞藍天白雲與海洋～而Wayfinder Bay入面精緻休閒嘅池畔空間映照迪士尼動畫《魔海奇緣》中嘅太平洋島嶼畫風，等大家都可以喺度寫意地休息！
迪士尼探險號主題區域 | 5. Town Square
Town Square橫跨三層甲板，大家除咗可以喺度向星星許願之外，亦有唔少嘅商店、休息室、咖啡廳、餐廳、Salon、酒廊以及娛樂場所等，無論大人定小朋友都可以喺度享受～
迪士尼探險號主題區域 | 6. Marvel Landing
鍾意Marvel嘅朋友絕對唔可以錯過！因為喺迪士尼遊輪上面，將會有全球海上最長嘅過山車 Ironcycle Test Run，長達250米！同時大家更可以喺Pym’s Quantum Racers駕駛由以蟻俠科技改裝嘅迷你車，喺賽道上面馳騁。而Groot Galaxy Spin就可以畀大家跟著節奏明快嘅音樂享受高空飛行！
迪士尼探險號主題區域 | 7. Toy Story Place
帶小朋友去Toy Story嘅水上樂園玩就最啱，除咗有大型家庭游泳池之外，亦有多個漩渦池以及水滑梯等，玩到肚餓更有唔同嘅主題餐飲畀大家填飽個肚！
迪士尼探險號 | 特設大人與小朋友專區
除咗以上7個主題區之外，當然唔少得唔同嘅娛樂表演，當中包括全新舞台劇「Remember」、百老匯風格音樂劇、電影播放、私人卡啦OK房以及與迪士尼朋友見面同互動！大人如果想好好放鬆下，遊輪上面亦設有托兒嘅地方，可以放低小朋友！而大人更可專享酒吧、水療以及按摩等活動，盡情放鬆身心！
迪士尼探險號 | 餐廳美食
迪士尼遊輪以其多元化嘅餐飲選擇聞名，船票為全包式，已包全日早、午、晚餐及小食等。迪士尼遊輪公布兩大主題餐廳，當中包括迪士尼 X 印度Fusion 菜嘅「Mowgli’s Eatery」以及以魔海奇緣為主題設計嘅「Gramma Tala’s Kitchen」等，大家隨時都會見到迪士尼朋友現身！
迪士尼探險號 | 住宿房間
遊輪上面有唔少主題嘅房間畀大家選擇，其靈感源自於《阿拉丁》、《冰雪奇緣》、《小美人魚》和《復仇者聯盟》等電影主題，有內艙、海景艙、陽台艙等不同房型及配置滿足各種需求嘅人士～
迪士尼探險號 | 迪士尼探險號開賣日期及價錢
相信睇咗咁多資料，大家都好想知究竟迪士尼探險號旅程嘅價錢同埋幾時開賣～官方就表示有關航行嘅日期同價錢詳情就會喺11月14日公布，而迪士尼探險號將於2024年12月10日開始接受預訂，有興趣嘅朋友就要留意啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
