去沖繩點可以唔玩水？沖繩清澈無污染加特殊地形嘅海洋令佢成為一個熱門玩水地點，無論係浮潛定潛水都咁受歡迎！不過個個海都咁靚，究竟要點揀？新手又可唔可以玩？邊個地方有埋專業教練？今日就等小編同大家盤點5個必去嘅潛水景點！
圖片來源：網絡圖片、Tabirai Japan、Expedia、永安旅遊、kkday｜撰文：Claudia
沖繩必去 潛水景點 1 – 青之洞窟
提到喺沖繩浮潛，青之洞窟絕對係人氣之選！青之洞窟位於沖繩本島恩納村嘅真榮田岬，因喺洞窟裏面可以睇到神秘嘅青藍色光線而得此盛名，洞窟經海水侵蝕，深度有成40M！最推薦嘅潛水時間係朝早清晨至中午，當清晨嘅陽光透過海水灑進洞窟，通過海底嘅白沙反射，閃閃發光嘅海水令人沉醉。
如果你係潛水新水都去得㗎，可以參加當地嘅浮潛行程，全程有專業教練陪伴，5歳以上嘅小朋友同唔識游水嘅朋友都可以參加，教練仲會幫手影相，咁就唔怕捕捉唔到難忘回憶啦！
【INFO】
青之洞窟
地址：沖繩縣國頭郡恩納村真榮田469-1
交通方法：從那霸市市區開車約1小時/從那霸巴士總站搭乘巴士約1小時30分鐘
沖繩必去 潛水景點 2 – Adan海灘
Adan海灘被稱為係最偏僻而且無人造訪嘅隱藏版海灘！Adan海灘位於沖繩最北邊嘅國頭村，呢到出名海水透明度極高，可以睇到天然珊瑚同眾多色彩鮮豔的熱帶魚，大大片嘅白色沙灘，浮潛又得，曬日光浴又得。不過要注意嘅係Adan海灘係冇救生員看管，雖然呢到海流相對平穩，但仍要小心被離岸流捲走，隨時注意自身安全同要穿著救生衣啊！
【INFO】
Adan海灘
地址：沖繩縣國頭郡國頭村楚洲48
交通方法：從那霸市中心開車約2小時30分鐘
(圖片來源：kkday)
沖繩必去 潛水景點 3 – 慶良間群島
世界各地潛水愛好者都讚譽有佳嘅慶良間群島，係日本最熱門嘅潛水地點，海水清澈透明，如水晶一般閃閃發光，稱為「慶良間藍」，真係絕對唔可以錯過！推薦參加當地嘅一日行程，那霸搭船可以當天來回，不過注意嘅係，位置十分搶手，記得要事先預約啊！
【INFO】
慶良間群島
地址：沖繩縣島尻郡座間味村
交通方法：從那霸搭高速船，一日出發兩次
沖繩必去 潛水景點 4 – 宜野灣Tropical海灘
位於宜野灣海濱公園入面嘅「宜野灣Tropical海灘」絕對係熱門嘅潛水景點，呢到珊瑚種類豐富，簡直係珊瑚花園啊！加上色彩繽紛嘅珊瑚礁魚，簡直係色彩盛宴，仲要由港灣碼頭行到去潛水嘅地方唔使10分鐘，不過建議事前預約，而且海灘附近就係宜野灣海濱公園，除咗玩水之餘仲可以玩埋陸上活動，最適合一家大細去玩！
【INFO】
宜野灣海濱公園
地址：沖繩縣宜野灣市真志喜4-2-1
交通方法：從那霸市中心開車約20分鐘
沖繩必去 潛水景點 5 – SUP直立板衝浪
除咗潛水同浮潛，鐘意大海嘅你仲有多個選擇，呢到可以玩埋SUP直立板衝浪（Stand Up Paddle），睇截然不同嘅海面景色！SUP嘅浮板浮力大，就算係初學新手都可以好快上手，係依家好熱門嘅水上活動。企喺SUP板上面，向住日落方向划過去，諗下都覺得好美好！
【INFO】
地址：沖繩縣國頭郡恩納村恩納地區
交通方法：從那霸市市中心開車約40分鐘／從那霸巴士總站搭乘巴士約1小時20分鐘
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
