深圳好去處 | 近年來深圳新開多個大型室內遊樂場，為大人細路提供多元化嘅遊樂設施，大部份都係一票全日無限時任玩，啱晒假日同一家大細齊齊去放電～小編就為大家介紹7個深圳室內遊樂場，無論刺激嘅運動及高空項目，定係兒童遊玩設施，都一應俱全，即睇以下深圳室內遊樂場嘅介紹啦！
圖片來源：小紅書 @我是陈老湿、@深圳导航NANA酱、@⚜️R🅾️Y⚜️、@吃遍深圳美食、@COCO、@昕宝日记📔、@花生玩樂好去處、kkday | 撰文：Icy
深圳室內遊樂場 | 1. 玩美攻略Wonder Meet
位於福田嘅大型室內電玩遊樂場「玩美攻略Wonder Meet」，佔地近10,000平方米，總共有三層，內有約100項遊戲。遊戲種類非常多元化，一個價錢就可以全日無限時任玩，可自由進出遊樂場，仲設有夜間票，等大家食飽晚飯先去玩都得！
1樓主要係各款經典街頭遊戲機，例如VR幻影星空暗黑戰車、跳舞格仔、射擊、賽馬、極速飛車、頭文字D等等。2樓為運動類型項目，包括溜冰場、保齡球、射箭、麻將，仲有比較文靜嘅活動，例如陶藝、油畫、DIY珠串等等。一大班朋友嚟嘅話就可以一齊玩PS5、SWITCH，仲有小型唱K房。至於3樓就有碰碰車、奧運射擊、實彈射擊、飛鏢、投籃機等等。
【INFO】 玩美攻略Wonder Meet 地址：深圳市福田區深南中路3018號世紀匯廣場 營業時間：每日10:00-22:00 票價：成人平日￥268、假日￥298 / 小童￥168 / 夜間票￥168（19:00-22:00) 預約方法：需即場購票
深圳室內遊樂場 | 2. KL Sport潮玩運動
位於坂田嘅「KL Sport潮玩運動」，於今年9月正式開業，佔地約3,000平方米，一票就可以全日任玩！場內嘅運動設施多元化，包括卡丁車、方格大戰、飛標、射箭、桌球、保齡球、實彈射擊、射籃、拳擊等等，仲有比較靜態嘅夾公仔機、按摩椅等等。另外亦設有飛行影院、PS5遊戲區、電音房、4K立體聲唱K房，啱晒一大班朋友一起玩！玩到肚餓嘅話，仲可以去大門位置嘅小賣部醫吓肚，真係喺度慢慢玩足全日都無問題！
【INFO】 KL Sport潮玩運動 地址：深圳市龍華區布龍路萬科萬致天地 L4-51號鋪 營業時間：每日10:00-00:00 票價：單人平日￥219、假日￥259 / 親子平日￥309、假日￥349 預約方法：需即場購票
深圳室內遊樂場 | 3. Party Day
位於深圳龍崗區嘅「Party Day」，於2023年開業，佔地逾10,000平方米，場內提供逾50項運動遊樂設施，買全日票就可以無限時任玩～玩樂設施包括真雪溜冰、保齡球、蹦床高空區、蹦床海綿池、空中索道、攀岩、碰碰車、哥爾夫球、冰壺、War Game等等，大人細路都適合。另外仲設有餐飲區及Live house，玩到攰就可以去醫吓肚、聽吓歌！
【INFO】 Party Day 地址：深圳市龍崗區平湖街道華南二道萬達廣場6f-A 營業時間：星期一至日10:00-23:00 票價：單人平日￥268、假日￥298 / 親子平日￥368、假日￥398 預約方法：https://bitly.cx/ZaxG
深圳室內遊樂場 | 4. 心跳頑家超級運動世界
位於深圳龍華區嘅「心跳頑家超級運動世界」，佔地約8,000平方米，總共有三層，提供超過50個遊玩設施。1樓主要為刺激嘅高空項目，例如10米高笨豬跳高台、90°魔鬼滑梯、高空攀岩、360°自行車等等，啱晒同朋友一齊去挑戰膽量～而2樓及3樓主要為老少咸宜嘅玩樂項目，包括PS5遊戲機、超級彈床、保齡球、碰碰車、射箭、賽車、螺旋滑梯等等，一票就可以全日無限時任玩～
【INFO】 心跳頑家超級運動世界 地址：深圳華旺路51號 營業時間：星期一至五 11:00-22:00 / 星期六日 09:00-22:00 價錢：單人平日￥238、假日￥268 / 親子平日￥328、假日￥368 預約方法：https://bitly.cx/7rO6ae
深圳室內遊樂場 | 5. Meland Club
位於萬象天地嘅「Meland Club」，集主題樂園、親子玩樂及運動科技於一身，為小朋友提供廣闊安全嘅玩樂空間。樂園裝潢充滿夢幻童話色彩，內有約100種遊樂設施，一票就可以玩足全日，包括滑梯玩樂區、公主城堡、海洋波波池、模擬職業體驗區、超級迷宮、卡通動漫區、運動挑戰區等。另外設有科學實驗、音樂表演、魔幻舞台等親子活動，讓小朋友從玩樂中學習。玩到肚餓，仲可以去場內嘅親子餐廳享用美食，非常方便，帶小朋友嚟放足全日電都無問題！
【INFO】 Meland Club 地址：深圳市南山區粵海街道大沖社區深南大道9668號萬象天地F3 營業時間：星期一 10:00-20:00、星期二至日 10:00-21:00 票價：成人￥118 / 親子￥446 預約方法：https://bitly.cx/I0Wzlx
深圳室內遊樂場 | 6. 木育森林
位於深圳南山區嘅「木育森林」，以大自然森林為主題，室內裝潢以永續森林木材製造，為小朋友提供安全舒適嘅玩樂環境。場內分為5大互動遊樂區域，包括「玩競技」、「玩科學」、「玩體能」、「玩闖關」及「玩益智」，旨在讓小朋友寓學習於娛樂，訓練專注力及想像力。當中有多個刺激驚險嘅遊樂設施，例如空中飛人、搖擺平衡木、星際迷航、木槍射擊場、海盜保齡球等等，大人細路都啱玩～
【INFO】 木育森林 地址：深圳市南山區蛇口街道海上世界環船廣場BC區第1層C106-109商鋪 營業時間：星期日至四 10:00-22:00 / 星期五及六 10:00-22:30 票價：單人平日￥73、假日￥116 / 親子平日￥127、假日￥206 預約方法：https://bitly.cx/gHOhF
深圳室內遊樂場 | 7. Lollypet萌寵樂園
鍾意小動物嘅朋友，就不容錯過位於筍崗站嘅「Lollypet萌寵樂園」。場內空氣流通，衛生整潔，確保小動物有舒適嘅生活環境。小動物嘅種類繁多，包括山羊、袋鼠、兔仔、貓貓、小馬、小浣熊、水豚、迷你豬、刺蝟、豚鼠、松鼠等，仲有比較特別嘅梅花鹿、孔雀、虎皮鸚鵡、鬃獅蜥。大家唔止可以同小動物近距離接觸，仲能夠親自喂食。職員會為大家介紹小動物嘅名字及個性，等大家了解小動物嘅生活習性，學習與小動物和平相處～
【INFO】 Lollypet萌寵樂園 地址：深圳市羅湖區梅園路105號華潤萬象食家第4層L418B 營業時間：每日10:00-22:00 票價：單人平日￥89、假日￥92 / 親子平日￥149、假日￥152 預約方法：https://bitly.cx/zJGKL
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
