極光攻略 | 睇極光絕對係大家人生清單入面必做嘅事！近日地球受到超過20年最強嘅太陽風暴影響，喺英國、加拿大以及澳洲等地都見到極光～唔知香港又有冇咁嘅機會見到呢？如果大家真係想睇到極光嘅話，小編就幫大家整合咗7個旅遊好地方，仲有埋觀賞極光攻略，即刻睇睇啦！
圖片來源：Santa Claus Village、Aurora Reykjavik、get your guide、永安旅遊、visit greenland、explore FAIRBANKS ALASKA、Abisko guesthouse | 撰文：Hedy
相信最近大家都會見到唔少朋友喺社交媒體上面分享超靚嘅極光相，天空染成紫色同紅色，好夢幻。不過根據早前外國嘅預測，香港睇到極光嘅機會非常低。不過咁都唔緊要，以下呢7個地方最容易觀賞到極光，有機會一定要去旅行！
極光攻略 | 為何會出現極光？
地球上嘅極光係嚟自磁層同太陽風帶電嘅高能粒子，被地磁場導引帶進地球大氣層，同高層大氣中嘅原子，所碰撞造成嘅發光現象。咁就會形成南極光或者北極光，大家經常都會見到綠色嘅極光，但其實亦有紅色、紫色以及橙色等顏色。
極光攻略 | 最佳觀賞日期
極光通常都會出現喺緯度66至69度嘅地帶，北半球嘅極光被稱為「北極光」，通常每年嘅9月至3月都係觀賞極光嘅最佳時機！南半球嘅極光則被稱為「南極光」，最佳觀賞月份係每年嘅6月至9月，不過由於南半球四周環海，海洋嘅地方多過陸地，所以難度較高！
極光攻略 | 欣賞極光條件
想順利咁觀賞到極光一定有3大條件，包括氣候、光害以及極光指數（Kp-index）。要睇到極光除咗要喺黑夜，亦都要去一啲光害比較低嘅地方，同時冇雲層遮擋，先可以清楚咁睇到極光。而極光指數分為十級，當指數越高，極光嘅活躍程度亦都相對較高，表示可以睇到極光嘅地方都會更多。
極光欣賞最佳地 | 1. 芬蘭 Lapland
相信一講起睇極光都有唔少人第一時間會諗起芬蘭，除咗可以睇北極光之餘又可以到訪玻璃屋，再欣賞埋聖誕老人村，體驗濃厚嘅聖誕氣氛，絕對係一生人必去一次！只要喺9月到下一年嘅3月呢個時間去，都係最有可能睇到極光嘅地方！一天黑嘅時候就有機會出現極光，如果幸運嘅話仲可以喺玻璃屋入面睇到極光，超浪漫！
極光欣賞最佳地 | 2. 冰島
冰島曾被CNN票選為全球8大最佳極光觀賞景點，一個全國都可以睇到極光嘅國家。怕凍又想睇極光嘅朋友仔都唔使擔心，冰島嘅氣溫亦較為溫暖，適合大家～再加上冰島有好多自然景觀，例如瀑布、冰河湖以及火山等，就算冇緣睇到極光都可以令你大開眼界！想去冰島嘅大家就要把握每年9月頭至4月中嘅機會啦～
極光欣賞最佳地 | 3. 挪威 Tromso
Tromso係挪威北部最出名嘅城市，亦都係著名嘅「北極光之城」，曾被美國CNN評選為世界最佳北極光觀察地～只要喺每年嘅11月到出年嘅2月就有可能喺夜空入面觀賞到神秘嘅極光～據聞呢度觀賞北極光機會率都比較高，大家可以去碰碰運氣！
極光欣賞最佳地 | 4. 加拿大 Yellowknife
加拿大黃刀鎮比起其他地區擁有更多晴朗嘅夜空，每年有成240個夜晚都可以睇到極光，黃金時間為8月至4月只要住宿最少3日觀賞到北極光嘅機會更高達98%，所以有唔少嘅旅客都特登過嚟睇極光～除咗夜晚可以欣賞極光至於，日頭都可以體驗到冰上釣魚以及雪地摩托等活動，新奇又有趣！
極光欣賞最佳地 | 5. 格陵蘭
格陵蘭係世界上面積最大嘅島嶼，全島80%都被冰雪覆蓋，就好似置身於冰雪世界。由於全國都處於北極圈內，每年更有長達300日以上嘅好天氣，只需要抬頭就可以成功睇到極光，9月底開始為最佳旅行時間。格陵蘭更有世界上最大嘅自然公園格陵蘭國家公園，需要有特殊許可證先可以入內參觀。
極光欣賞最佳地 | 6. 阿拉斯加 Fairbanks
阿拉斯加 Fairbanks一年大概會有243日出現極光，以北緯64.68度最接近北極圈北緯66.33度而成為全世界觀賞極光機率最高嘅地點。大概有三分之二嘅日子，大家都可以見到極光！入住埋180°全景玻璃屋欣賞極光，絕對係一大享受！你亦可以體驗阿拉斯加極光列車，欣賞途上夢幻嘅仙境。記得要喺極光最佳觀賞時間，每年嘅9月至翌年嘅3月！
極光欣賞最佳地 | 7. 瑞典Abisko
睇極光要去北歐唔同嘅國家，倒不如去瑞典Abisko，因為呢度相對係世界上最少光害嘅地方，較為容易睇到極光，再加上機票嘅價錢亦相對平，所以相對推薦大家考慮！追光嘅時候更可以乘坐摩托雪橇穿越Abisko國家公園，可以更清楚咁見到極光現象，推薦大家喺9月至翌年3月到訪！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
