就快踏入春季，相信好多人已經計劃定去日本賞櫻，日前日本氣象株式會社發放咗今年嘅櫻花花期預測，最早於3月底就可以觀賞櫻花！小編為大家整合12大日本賞櫻好去處，包含多個日本地區，例如東京、京都、函館等等，即睇以下日本賞櫻好去處推介啦！
圖片來源：日本氣象株式會社、日本觀光局、小紅書 @海盐芝士麻薯、小紅書 @冷酸柠智取王世昌、Instagram @goryokaku_tower、北海道神宮、福岡縣觀光聯盟 | 撰文：Icy
日本氣象株式會社預測花期
日本氣象株式會社已於2月初公佈2025年日本各地櫻花嘅花期預測，東京、大阪、京都、福岡等熱門旅遊地區，一般由3月底開始開花。
而網站亦於2月6日更新開花儀表，顯示櫻花目前嘅開花進展，讓遊人把握櫻花盛開嘅時刻！
資料來源：日本氣象株式會社
日本賞櫻好去處 | 1. 目黑川
位於東京嘅目黑川全長8公里，而今年目黑川嘅櫻花花期大概喺3月底至4月初之間，屆時河岸兩旁會有近800棵櫻花樹齊放，形成唯美嘅櫻花樹林蔭道。大家可以於河岸步道上漫步，與親朋好友享受一場櫻花樹下嘅野餐。至於入夜後會舉辦夜櫻點燈慶典，並設有美食及紀念品攤檔，別有一番風情！
【INFO】 目黑川 地址：東京都目黑區中目黑2丁目（從東急東橫線「中目黑車站」出發，步行約1分鐘） 預計花期：3月底至4月初
日本賞櫻好去處 | 2. 中野通櫻花大道
位於東京都嘅中野通，有一條連接中野站北口至哲學堂公園嘅街道，長約2公里，沿途種滿粉嫩嘅櫻花樹，因此被稱為「櫻花大道」。間中更會有疾駛而過嘅電車，配上漫天紛飛嘅櫻花，景色猶如電影《秒速5厘米》入面嘅優美場景！
【INFO】 中野通櫻花大道 地址：東京都中野站北口至哲學堂公園一帶（從西武鐵道新宿線「新井藥師前站」出發，步行約5分鐘） 預計花期：3月中至4月初
日本賞櫻好去處 | 3. 姫路城
位於兵庫縣姫路市嘅姫路城已有達400年歷史，而每年3月底至4月中，姫路城都會搖身一變成為賞櫻名城，盛放約1000株染井吉野櫻及枝垂櫻，純白色嘅城堡配上粉嫩櫻花，形成古色古香嘅庭園美景。
【INFO】 姫路城 地址：兵庫縣姫路市本町68（從JR「姬路站」出發，步行約15分鐘） 開放時間：09:00-17:00 預計花期：3月底至4月中
日本賞櫻好去處 | 4. 嵐山渡月橋
位於京都嘅嵐山渡月橋以檜木製成，擁有多年歷史，橫跨河水，景色充滿詩意。而每年3月底到4月初，渡月橋附近將會開滿約1500株吉野櫻及枝垂櫻。大家更可以加上嵯峨野小火車、天龍寺、嵐山公園等景點，嚟個嵐山一日遊！
【INFO】 嵐山渡月橋 地址：京都市右京區嵯峨天龍寺造路町（從京都JR車「嵯峨嵐山站」出發，步行約10分鐘/從京福電車「嵐山站」出發，步行約2分鐘） 預計花期：3月底到4月初
日本賞櫻好去處 | 5. 萬博紀念公園
位於大阪吹田市嘅萬博紀念公園，佔地面積達260公頃，而每年3月中至4月初櫻花季，公園內將會盛放逾5000株櫻花樹，多達12個品種，例如染井吉野櫻、彼岸櫻、寒緋櫻等，令人目不暇給，難怪被選為「日本櫻花名所100選」！
【INFO】 萬博紀念公園 地址：吹田市大阪府565-0826（從大阪單軌電車線「萬博記念公園站」出發，步行約5 分鐘） 開放時間：09:30-17:00（逢星期三休息） 預計花期：3月中至4月初
日本賞櫻好去處 | 6. 千光寺公園
位於尾道市、海拔144.2公尺嘅千光寺公園，亦被評選為「日本櫻花名所100選」之一，園內栽種約1500株不同品種嘅櫻花樹，包括垂枝櫻、染井吉野櫻、八重櫻等，並掛上日本傳統燈紙罩燭燈，寫有以春天為主題嘅俳句。大家更可於山丘頂展望台俯瞰瀨戶內海嘅島嶼風光！
【INFO】 千光寺公園 地址：廣島縣尾道市西土堂町19-1（從JR山陽本線「尾道站」出發，乘搭巴士至「長江口站」，並於纜車「山麓站」轉乘千光寺山纜車） 開放時間：24小時營業 預計花期：3月底至4月初
日本賞櫻好去處 | 7. 山崎川四季之道
位於愛知縣嘅山崎川四季之道，同樣入選「日本櫻花名所100選」。河岸長約2.5 公里，兩旁種植達600株櫻花樹，沿著清澈嘅河流連綿不斷。鼎橋上亦會舉辦夜櫻點燈活動，為河岸夜景增添特色。
【INFO】 山崎川四季之道 地址：愛知縣名古屋市大殿町4丁目1（從地鐵櫻通線「瑞穂區役所站」出發，步行約13分鐘） 預計花期：3月底至4月初
日本賞櫻好去處 | 8. 五稜郭公園
位於函館市嘅五稜郭公園，地形非常特別，從展望台上可俯瞰地面嘅巨大星形城郭。而每年4月中至5月初，公園內將會綻放達1500株櫻花樹，以染井吉野櫻為主。大家可一邊乘搭手划小船，一邊觀賞護城河附近嘅櫻花美景！
【INFO】 五稜郭公園 地址：函館市五稜郭町44（從市營電鐵「五稜郭公園前站」出發，步行約15分鐘） 開放時間：05:00–19:00 預計花期：4月中至5月初
日本賞櫻好去處 | 9. 二十間道路櫻花街
每年大約5月初，位於北海道嘅二十間道路櫻花街都會盛放2000株櫻花樹，遊人可於7公里嘅步道上漫步，走到鄰近二十間道路東向嘅終點處，仲可以參觀櫻花祭期間限定開放、超過百年歷史嘅凌雲閣，傳統日式嘅建築風格非常典雅！
【INFO】 二十間道路櫻花街 地址：056-0144北海道日高郡新日高町静内田原（從JR「靜內站」出發，乘搭至「櫻丘小學校前」，步行約15分鐘） 預計花期：5月初
日本賞櫻好去處 | 10. 北海道神宮
北海道神宮主要祭祀四位守護神，環境充滿莊嚴古典氣息。而神宮區域內亦種有達株1400棵櫻花樹，品種包括染井吉野櫻、八重櫻、蝦夷山櫻等，每年櫻花季都會設置攤販售賣特產，例如梅花酒、櫻花湯茶、烤餅等，充滿節慶氣氛。
【INFO】
北海道神宮
地址：北海道札幌市中央區宮ケ丘474（從地鐵東西線「円山公園站」出發，步行約18分鐘）
預計花期：4月中至5月初
日本賞櫻好去處 | 11. 西公園
西公園為福岡歷史最悠久嘅公園，而每年3月底開始，呢度都會化身成賞櫻勝地，盛開達1300株櫻花樹，遊人可於草地上野餐，細心欣賞滿天落櫻嘅美景。另外，大家仲可於公園觀景台上，俯瞰福岡、博多灣及港灣島嶼一帶嘅風景！
【INFO】 西公園 地址：810-0061福岡市中央區西公園（從地鐵機場線「大濠公園站」出發，沿著陡坡步行約15分鐘） 預計花期：3月底
日本賞櫻好去處 | 12. 舞鶴公園
舞鶴公園係另一個福岡市內嘅賞櫻勝地，呢度為福岡城舊址，城堡設有觀景平台，讓遊人將福岡市全景一覽無遺。而每年三月底至四月初，城內都會盛開數百株櫻花樹，吸引無數遊客慕名而來，配上歷史悠久嘅城堡遺跡，形成獨特嘅風光！
【INFO】 舞鶴公園 地址：福岡市中央區城内（從「天神站」出發，往西步行約20分鐘） 預計花期：三月底至四月初 ——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
