每逢踏入冬季，被列為世界遺產之一嘅白川鄉點燈活動都極受矚目。2024年第38屆白川鄉冬季點燈活動已於9月開始接受預約，無事先申請並中選嘅遊客係唔能夠參加點燈活動㗎！如果你想去參與呢件盛事，就要睇白川鄉點燈攻略，想知道2024年白川鄉點燈日期、前往交通、預約方法、旅館推介等一系列行程懶人包，就睇下文啦。
圖片來源：白川鄉觀光協會、孫右エ門、白川鄉之湯、御宿結之莊、Klook、X@MeitetubZ | 撰文：Icy
白川鄉點燈日期
白川鄉合掌村以自然恬靜嘅風光聞名，每年冬季嘅白川鄉點燈活動，合掌式建築村落嘅木屋都會被白茫茫嘅厚雪覆蓋，映照一點點閃爍嘅光芒，非常夢幻而且充滿傳統色彩，所以吸引唔少外地遊客朝聖。為控制人流，白川鄉觀光協會早於2019年開始實施活動預約制，以保障當地居民嘅生活。2024年白川鄉點燈活動共會舉行6日，分別為1月14日、1月21日、1月28日、2月4日、2月12日、以及2月18日，時間為當地時間17:30至19:30。
【INFO】 《白川鄉點燈2024》 日期：1月14日、1月21日、1月28日、2月4日、2月12日、2月18日 地點：白川村荻町地區 點燈時間：17:30 - 19:30
白川鄉點燈活動預約方法 | 1 – 旅行團
活動共有4種預約制度，分別為停車場預約、高速巴士預約、旅行團以及村內留宿。想睇點燈最直接嘅方法就係參加旅行團，日本本地或市面上有多款旅行團，例如Klook就推出兩日一夜連住宿套餐，仲會包高山遊覽同玩雪遊戲活動，可以品嚐當地美食同製作手工藝品，適合一家大小跑行程！
【INFO】 Klook【2日1夜】白川鄉2024亮燈活動 & 高山遊覽 & 玩雪遊戲 出發日期：2024年1月28日、2月4日、2月12日 價錢：每人約港幣$2720起 預訂詳情：Klook
白川鄉點燈活動預約方法 | 2 – 停車場預約
如果想自駕遊，就需要預約停車場車位，以便即日來回白川鄉。車位只接受包括司機在內嘅1至10人普通私家車預約，於活動當天下午3點起進入白川街道河對岸嘅寺尾停車場，並於晚上8點前離開。參加者亦將會於登記處收到與人數對應嘅入場券。第一輪預約已經完結，下一輪預約會於11月1日13:00開始，先到先得，大家要記實以下預約日期啦！
【INFO】 預約日期1：2023年11月1日 13:00開始 收費：每輛車¥5,500
【INFO】 預約日期2：2023年12月1日 13:00開始 收費：每輛車¥6,000 預約網址：白川鄉觀光協會
白川鄉點燈活動預約方法 | 3 – 高速巴士預約
大家可預約點燈活動專用巴士，今次活動將與3間巴士公司合作，包括加越能巴士、濃飛巴士以及富士地鐵巴士。若果只乘坐定期巴士係唔會獲得入場券㗎，所以大家必須預訂專為點燈活動而設嘅特別巴士來回服務，車票已於10月4日起售賣。
另外大家要注意出發地點，以便好好規劃行程，加越能巴士會由富山縣高岡市出發，濃飛巴士會由高山市出發，而富士地鐵巴士就會由富山市出發。部份班次仲會包括展望台門票，可從最佳角度欣賞點燈過程，但就需要步行上落山。
【INFO】 加越能巴士 基本車票收費：成人¥7,800、小童¥6,800 車票連展望台門票收費：成人¥9,800、小童¥8,800 預約網址：加越能巴士 【INFO】 濃飛巴士 基本車票收費：成人¥8,000、小童¥7,000 車票連展望台門票收費：成人¥10,000、小童¥9,000 預約網址：濃飛巴士 【INFO】 富士地鐵巴士 基本車票收費：成人¥8,000、小童¥7,000 車票連展望台門票收費：成人¥10,000、小童¥9,000 預約網址：富士地鐵巴士（只能透過電話預約）
白川鄉點燈活動預約方法 | 4 – 村內留宿
如果想喺村內留宿，感受當地風土民情，就要喺10月31日或之前，透過email將抽籤申請發送到 luroom@shirakawa-go.gr.jp。抽籤結果會於11月10日公布，中籤後會收到訂房連結，再到白川鄉觀光協會網站進行預約。
由於每人只可以遞交一份申請，所以小編提醒大家email標題需要註明住宿日期同埋白川鄉住宿設施名稱，而內文必須清楚列明以下資料，咁先會萬無一失！
1. 申請人姓名
2. 電話號碼及聯絡電郵地址
3. 住宿日期
4. 希望入住的白川鄉住宿設施
5. 住宿人數及房間種類
於2024年白川鄉點燈活動期間營業嘅旅館共有大概十幾間，大部份位於活動會場附近嘅荻町，非常方便，以下小編就為大家介紹幾間必去白川鄉旅館啦！
【INFO】 申請抽籤日期：2023年10月31日23:59或之前 預約網址：白川鄉觀光協會
白川鄉旅館推介 | 1 – 孫右エ門
孫右エ門於點燈期間嘅6日都會開放，地理位置優越，只需由白川鄉巴士總站出發步行6分鐘就會到達。旅館係擁有300年歷史，帶有圍爐嘅合掌式民宿，建於莊川河沿岸。呢間旅館以傳統和風木系設計，共有6間客房，一望出去就可以欣賞莊川秀麗嘅自然風光。
【INFO】 地址：岐阜県大野郡白川村荻町360 前往方法：由白川鄉巴士總站出發步行6分鐘 客房數目：6間 價錢：每人約¥24,200連稅 旅館詳情：孫右エ門
白川鄉旅館推介 | 2 – 白川鄉之湯
如果想嘆埋地道溫泉，就可以選擇白川鄉之湯，只需由白川鄉巴士總站出發步行1分鐘就會到達。旅館共有11間客房，以大地色系茶室設計，大窗戶可透入明亮自然光，欣賞白山海岸線以及感受大自然嘅氣息。溫泉主要成分為氯化鈉礦物，對療癒肌肉疼痛、關節痛等各種疾病都好有效。
【INFO】 地址：岐阜県大野郡白川村荻町337 前往方法：由白川鄉巴士總站出發步行1分鐘 客房數目：11間 價錢：每人約¥26,500連稅 旅館詳情：白川鄉之湯
白川鄉旅館推介 | 3 – 御宿結之莊
雖然御宿結之莊距離白川鄉巴士總站比較遠，需步行約24分鐘，但若果由飯島站出發就只需步行約1分鐘，交通便利。呢間旅館好新淨，於2019年落成，共有66間客房，並提供多項高質素服務，例如住客可享用免費溫泉浴池、拉麵夜宵，以及清酒、濁米酒、現磨咖啡等飲料。旅館內仲有遊戲中心，讓旅客體驗同了解傳統日本遊戲，娛樂設施一應俱全。
【INFO】 地址：岐阜県大野郡白川村飯島908-2 前往方法：由飯島站出發步行約1分鐘 客房數目：66間 價錢：每人約¥45,000連稅 旅館詳情：御宿結之莊
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
