日本夜景 | 日本絕對係大家旅遊必去嘅地方，返鄉下除咗必定要Shopping之外，絕對唔可以錯過日本壯麗嘅夜景，更有唔少景點更被評為日本新三大夜景，絕對要去睇睇！
資料來源：各官方網站 | 撰文：Hedy
日本夜景 | 1. 皿倉山
皿倉山被評為日本新三大夜景之一，只需要乘搭登山纜車或單軌纜車，就可以登上622m高嘅皿倉山山頂展望台。喺山頂俯瞰落去，就可以將號稱價值100億美金嘅夜景盡收眼底，絕對係北九州最灸手可熱嘅觀景熱點，可以望晒成個北九州嘅景色！同情侶一齊嚟嘅話，就絕對要選擇日落時分，金黃色嘅日落映入眼中，相對浪漫，亦都係超適合情侶約會。
【INFO】 《皿倉山》 地址：北九州市八幡東區大字尾倉 1481-1 纜車時間：4至10月 10:00至22:00；11至3月 10:00至20:00 費用：成人約港幣$61 兒童約港幣$31 （纜車與爬坡車） 官方網站：https://bit.ly/3x1uWK1
日本夜景 | 2. 藻岩山夜景
鄰近札幌市區嘅藻岩山，同樣亦係日本新三大夜景之一。只要乘坐索道及纜車，登上海拔531公尺嘅山頂展望台後，就可以360度環顧全景，廣闊嘅城市景色一覽無遺～藻岩山山頂更設有「幸福之鐘」，無論係情侶定係夫妻都可以一齊前往敲響幸福嘅鐘聲，或者坐喺觀景餐廳享用法式餐點都超享受！
【INFO】 《藻岩山》 地址：北海道札幌市中央区伏見5-3-7 纜車時間：4至11月 10:30至22:00；12至3月 11:00至22:00 費用：https://bit.ly/4cgML6u 官方網站：https://bit.ly/4ci5y1x
日本夜景 | 3. 稻佐山夜景
長崎稻佐山夜景，擁有被譽為價值千萬美金嘅夜景，亦都曾經喺2012年同香港以及摩納哥，一齊被評為「世界新三大夜景」。山頂更設有大型展望台，畀大家企喺位於海拔333米高嘅稻佐山，360度欣賞壯麗嘅景觀，當天氣好嘅時候更可以遠眺雲仙、天草、五島列島等。無論係搭巴士、纜車或自駕都可以輕易到達。
【INFO】 《稻佐山》 地址：長崎県長崎市稲佐町 纜車費用：大人約港幣$62、學生約港幣$47、小學生約港幣$31 官方網站：https://bit.ly/4ebbQBT
日本夜景 | 4. 摩耶山掬星台
以「日本三大夜景」聞名嘅掬星台，位於海拔700米處，可以眺望到大阪灣、紀伊半島以及四國嘅景色。掬星台更設有40米以螢光材料鋪設而成嘅道路，喺藍色燈光照射下，呈現出夢幻氛圍，彷彿就如伸出手就可以掂到閃爍嘅星星一樣～
【INFO】 《摩耶山掬星台》 地址：神戸市灘区摩耶山町2-2 纜車費用：大人港幣約$40、小童港幣約$12 官方網站：https://bit.ly/3Vm9Wp8
日本夜景 | 5. 函館山夜景
函館山喺一年四季都會有唔同嘅模樣，就好似打開耀眼奪目嘅珠寶盒一樣，璀璨又迷人。大家可以選擇乘搭索道纜車、巴士或者的士上函館山，絕對要預時間睇日落後30分鐘迷人暮色，為城市中函館歷史建築增添瑰麗色調，無論係日間定係晚間嘅景色都絕對會令你讚嘆不已！
【INFO】
《函館山》
地址：函館市元町19-7
纜車費用：成人約港幣$90 小童約港幣$45
官方網站：北海道函館市元町19-7函館山ロープウェイ山麓駅
日本夜景 | 6. 湯西川溫泉雪屋祭
每年1月至2月下旬，大家都一定要去日本嘅雪祭，位於栃木縣嘅湯西川溫泉雪祭絕對係一生人必去嘅景點，現已獲列入為「日本夜景遺產」之一。喺「平家之里」以及「澤口河川敷」2大會場入面，逾1,000個小雪洞亮起溫暖嘅燭光，就好似喺地上組成如銀河般夢幻嘅景象，就好似置身於夢幻嘅童話場景入面一樣，難怪會被選為「死前也要來觀賞的絕景」之一！
【INFO】 《湯西川溫泉雪屋祭》 日期：每年1月下旬至3月上旬（詳情可到官網） 地址：櫪木縣日光市湯西川1042 官方網站：https://bit.ly/3Via7Sv
