香港人最喜愛嘅旅行國家一定非日本莫屬，而每次去東京玩，都唔少得去世界遺產之一嘅富士山朝聖。雖然去旅行未必有時間同體力挑戰登頂，但周邊有好多方便易遊覽嘅富士山景點同溫泉旅館，等你可以望住富士山來一個療癒之旅。想知道有咩富士山景點同人氣旅館，就快啲將以下行程同交通方法mark入旅行清單啦！
圖片來源：Instagram @whitegirl077、山中湖花之都公園、日本旅遊局、The Garden、Frame View Mt.Fuji -west-、富士急高原樂園渡假飯店、MYSTAYS富士山展望溫泉酒店 | 撰文：Icy
8大富士山景點｜1. LAWSON河口湖駅前店
大家只要由「河口湖站」出發，步行大概10分鐘，就會到達LAWSON河口湖駅前店。唔好以為呢度淨係可以食野醫肚，其實呢間便利店鄰近富士山，附近環境空曠，天晴時從店舖正面停車場拍攝，藍白色嘅店面設計同背後雪白嘅富士山相映成趣，感覺清新療癒！
【INFO】 LAWSON河口湖駅前店 地址：山梨縣南都留郡富士河口湖町船津3495-2 交通方法：由「河口湖站」出發，步行大概10分鐘
8大富士山景點｜2. 本町二丁目商店街
富士急行線嘅「下吉田站」同「河口湖站」只有4個站之隔，當中本町二丁目商店街店舖設計古色古香，有和風洋食店、時計店等等，保留住多個舊招牌，充滿懷舊昭和風格。而街道嘅盡頭就係大大個富士山，小編建議大家清晨去參觀，影出嚟嘅富士山無咁容易被雲遮擋，天空亦會更清澈！不過影相時記得注意安全，唔好騷擾附近商戶啊！
【INFO】 本町二丁目商店街 地址：山梨県富士吉田市下吉田２丁目1-31 交通方法：由富士急行線「下吉田站」出發，步行大概10分鐘
8大富士山景點｜3. 山中湖花之都公園
山中湖係距離富士山最近嘅湖泊，當中花之都公園座落係海拔1000公尺高地上，空間寬廣，一年四季都綻放住唔同種類嘅鮮花，例如向日葵、鬱金香、波斯菊等等。係晴朗無雲嘅日子下，蔚藍嘅天空無任何遮擋，咁就可以影低豔麗花海與富士山同框嘅靚相！
【INFO】 山中湖花之都公園 地址：山梨縣南都留郡山中湖村山中1650 交通方法：由富士急行線富士山站出發，乘搭周遊巴士「富士湖號」，大概30分鐘後於「花都公園入口站」落車 官方網站：山中湖花之都公園
8大富士山景點｜4. 忍野八海
忍野八海呢個名聽落好有詩意，「八海」其實係指八個池塘，多數池塘係富士山融化雪水嘅湧泉池，水源天然清澈，屬於日本國家級嘅天然紀念物。除咗可以欣賞流水小橋，品嚐地道小食，天氣晴朗嘅時候仲能夠遠眺富士山，藍天白雲配上優美嘅自然景觀，簡直好似一幅畫咁！加上忍野八海有好多傳統茅草屋，置身於此就好似瞬間穿越回到江戶時代一樣。
【INFO】 忍野八海 地址：忍野村南都留郡山梨縣401-0511 交通方法：由「河口湖站」出發，乘搭富士急公車到忍野八海，步行大概8分鐘
8大富士山景點｜5. The Garden
大家除咗可以係街道或公園搵到靚靚富士山影相位，最輕鬆嘅方法就當然係直接book一間可以睇到富士山靚景嘅住宿！位於河口湖嘅The Garden以純白色簡約風格設計，地理位置十分方便，距離「河口湖站」只有8分鐘路程。酒店共有17間房，全部房間均設有落地玻璃，一起身就可以隨時眺望富士山景緻！
【INFO】 The Garden 地址：日本山梨縣富士河口湖町 交通方法：由「河口湖站」出發，步行大概8分鐘 價錢：最平大約$2,211連税項 訂購連結：The Garden
8大富士山景點｜6. Frame View Mt.Fuji -west-
另一間要介紹嘅Frame View Mt.Fuji -west-，地理位置同樣好便利，距離「河口湖站」只有8分鐘路程。民宿以簡約木系風格設計，一幢有兩層，大家可透過客廳嘅落地窗，吹住涼風，欣賞外面嘅富士山。重點係呢間民宿最平每晚只需大約$2,196連税項，可供4位人入住，人均$549就可以住靚景大屋，性價比好高！
【INFO】 Frame View Mt.Fuji -west- 地址：山梨県南都留郡富士河口湖町船津3563-8 交通方法：由「河口湖站」出發，步行大概8分鐘 價錢：最平大約$2,196連税項 訂購連結：Frame View Mt.Fuji -west-
8大富士山景點｜7. 富士急高原樂園渡假飯店
去日本旅行其中一件必做事情當然就係浸溫泉，而富士急高原樂園渡假飯店座落係富士急樂園旁邊，住客唔單止可以無阻礙欣賞巍峨聳立嘅富士山美景，仲可以體驗刺激嘅遊樂設施同室內礦物溫泉，一次過擁有多重享受。現時房價最平大概$2000內，可免費享用酒店早餐以及參觀富士博物館！
【INFO】 富士急高原樂園渡假飯店 地址：山梨縣富士吉田市新西原5-6-1 交通方法：由新宿站出發，乘坐高速巴士，車程約100分鐘，於富士急樂園公車站下車 價錢：最平大約$2,000內連税項 訂購連結：富士急高原樂園渡假飯店
8大富士山景點｜8. MYSTAYS富士山展望溫泉酒店
另一間性價比高嘅MYSTAYS富士山展望溫泉酒店，同樣位於富士急樂園附近，地理位置絕佳，除咗可享用遊樂園設施，仲可以體驗日本比較少見嘅硫酸鹽泉大浴場，具有保濕皮膚同促進血液循環嘅作用。而酒店內客房及開放式空間均可欣賞壯麗嘅富士山景觀，係度浸住溫泉睇靚景，簡直療癒身心疲勞！
【INFO】 MYSTAYS富士山展望溫泉酒店 地址：403-0011 山梨縣富士吉田市新倉2654 交通方法：由「河口湖站」出發，步行大概16分鐘 價錢：最平大約$2,000內連税項 訂購連結：MYSTAYS富士山展望溫泉酒店
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
