奧蘭多環球影城 | 各位麻瓜們必去！美國奧蘭多環球影城最新嘅「哈利波特魔法世界：魔法部」主題園區將會喺出年開幕，園方最近亦都公開咗內部最新嘅相，即刻搶先睇最新園區入面有咩玩啦！
圖片來源：官方圖片 | 撰文：Hedy
Universal Epic Universe為奧蘭多環球影城度假區入面第5個區域，當中包括「哈利波特魔法世界：魔法部」主題園區、超級任天堂世界、馴龍高手、闇黑宇宙、天上公園等主題世界，相信大家最期待嘅當然係哈利波特最新嘅主題園區！
「哈利波特魔法世界：魔法部」入面，呼嚕地鐵將會帶大家由1920年嘅巴黎街頭，穿越到1990年代嘅英國魔法部，再現《怪獸與牠們的產地》以及《哈利波特》電影中嘅魔法世界，將會為大家帶嚟獨特嘅餐飲、購物以及娛樂體驗！進入魔法部後，大家將會經過接待處、Dolores Umbridge嘅粉紅色辦公室，並與她曾經嘅家庭小精靈Higgledy相遇，種種嘅場景都完美還原電影入面一幕～
哈利波特魔法世界 | 《哈利波特與魔法部之戰》
《哈利波特與魔法部之戰》故事發生喺佛地魔被打敗後，Dolores Umbridge因危害魔法世界嘅罪行而即將進行審判，佢試圖逃走，大家將會搭乘升降機同哈利、榮恩以及妙麗一齊喺驚險刺激嘅旅程入面追捕佢。旅程途中大家更要避開食死人以及暴走嘅奇獸等危險生物嘅襲擊！
哈利波特魔法世界 | 神秘馬戲團表演 Le Cirque Arcanus
馬戲團團長 Skender 為咗可以令 Le Cirque Arcanus 重現昔日榮光，所以就偷走咗Newt Scamander嘅行李箱，一打開卻發現入面充滿咗嚟自世界各地嘅動物，例如幻影猿以及拜月獸等，馬戲團員工為咗拯救呢啲動物，將會打造出超精彩嘅室內表演，當中包括空中表演、木偶和特效等。
哈利波特魔法世界 | 互動魔杖體驗
進入魔法世界，自然要用魔杖同大家一齊互動啦～大家都可以隨便喺街道上面以魔杖互動施展魔法，仲可以同玻璃獸以及幻影猿等奇獸互動，超得意嘅體驗！
哈利波特魔法世界 | 購買頂級魔杖
大家只要行入Cosme Acajor Baguettes Magique，就會睇多好多巴黎精湛工藝嘅魔杖，每一款都係相當精美，魔杖更係由受人尊敬嘅魔杖工匠 Cosme Acajor設計，粉絲們必入手！
奧蘭多環球影城 | 享受法式風味美食
想喺正宗嘅法國魔法咖啡館用餐，就絕對唔可以錯過Café L’air De La Sirène！無論係法式烘焙食品、三明治、甜品定係啤酒都應有盡有，各種法式風味嘅美食都享受得到～
【INFO】
《奧蘭多環球影城「哈利波特魔法世界：魔法部」》
開幕日期：2025年5月22日
地址：6000 Universal Boulevard Orlando, FL 32819
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
