【宜蘭 台北好去處2023 】台灣通返關之後,唔知你哋係咪都同小編一樣即刻買張機票想過去行個圈呢!今次小編去完台灣返嚟就發現各式各樣嘅餐廳小食,仲有唔同文青小區同打卡位介紹!想知小編去咗宜蘭台北邊到玩同有咩手信一定要買返香港食就記得睇內文喇!

圖片來源:SAUCE、網上圖片、joyaijia.tw、Airbnb、餐廳官方圖片|撰文:Debbie

台北好去處2023|宜蘭打卡民宿推薦 – Airbnb 海之子

去宜蘭最好就係自駕遊,因為大部分民宿都會提供免費泊車位,而且區與區可能都有一段距離所以最好就揸車過嚟玩喇!宜蘭嘅行程我哋放咗喺頭兩日,由桃園機場揸去宜蘭嘅民宿大約1個半小時!大部分人去宜蘭都會選擇去埋浸溫泉,而今次我就只係想搵間望到海嘅民宿打卡放鬆一下,如果你哋都鍾意海景民宿我就推薦呢一到!

選擇住頭城都有幾個原因,頭城屬於宜蘭較外圍嘅地方~對於我哋Stay兩日嘅遊客嚟講算方便,就算沿路返台北個車程都唔會太長。咁啱我哋Book嘅靚靚海景民宿行幾分鐘就有一兩間人氣打卡Cafe, 對於鍾意影相嘅女仔就更加要住呢到喇!

價錢都只係HKD1000/晚(圖片來源:Airbnb)
房間入面仲有好大嘅廚房(圖片來源:Airbnb)
旅館主人仲好鼓勵大家開窗起身睇日落(圖片來源:Airbnb)
成個行程都掛住拍片,所以呢個鏡位就只有呢幅自拍 (圖片來源:SAUCE)
中間呢個部分影相一流呀!(圖片來源:Airbnb)
+4

喺Airbnb預約完之後,房東會問你大約幾時會到民宿然後過去接待你~如果想Book就要預早啲因為呢間係搶手房型嚟㗎!

【INFO】
《海之子-Moon》
每晚價錢約HKD1000
房間預約:https://bit.ly/3MJmKS6

台北好去處2023|宜蘭頭城打卡Cafe推薦 – 滿山望海

喺我哋嘅民宿行過去只係5分鐘,放眼望去除咗有大海就係人氣滿滿嘅打卡Cafe啦!Cafe採預約制,可以7日前於網上訂座~小編最後雖然冇食呢間但係都想同大家介紹吓。呢間超正宜蘭Cafe,玻璃窗外就是龜山島美景。簡約白色主調同玻璃屋概念建造,就好似融入咗天空同大海嘅感覺咁~慵懶舒適嘅環境,非常適合過嚟放鬆呀!

兩層高望海白色Cafe(圖片來源:滿山望海)
好多女仔包括小編都畀呢條沿海小路迷到呀!(圖片來源:滿山望海)
Cafe有輕食、咖啡、意粉、甜品等供應,每人設最低消費。(圖片來源:滿山望海)
空間闊落加上落地大玻璃,難怪成日都咁Full啦!(圖片來源:滿山望海)
(圖片來源:滿山望海)
+2
【INFO】
《滿山望海》
地址:宜蘭縣頭城鄉大坑路211號
營業時間:10:30 - 18:00
預約鏈結:https://bit.ly/3C1pjtZ

台北好去處2023|宜蘭頭城打卡Cafe推薦 – 川岩咖啡館

上一間Cafe再行前小小就會見到呢間川岩Cafe!同樣係望海不過呢到就冇訂位服務,直接Walkin就可以內用!上年11月先開始營運嘅Cafe,同樣有兩層,不過風格上呢到就較為隨性,先點餐付錢再享用餐點。小編今次就去試咗呢間Cafe嘅咖啡同蛋糕,超高質!鍾意望住海景食巴斯克蛋糕一定唔可以錯過呀!

川岩店面(圖片來源:川岩官方圖片)
個抹茶巴斯克同芝麻乳酪蛋糕超好食!(圖片來源:SAUCE)
【INFO】
《川岩 River Stone Coffee》
地址: 261台灣宜蘭縣頭城鎮協天路636巷36-2號
營業時間:11:00 - 18:00

台北好去處2023|宜蘭夜市推薦 – 羅東夜市

宜蘭呢個地方雖然唔算大,不過夜市都有成5個咁多,但每個夜市嘅營業時間都唔同,有啲只係開週日、有啲只係開週三~但羅東夜市就會開足7日而且係當中最大嘅夜市,所以我嘅晚餐就嚟咗呢到掃街喇。頭城區過去羅東夜市都要揸半個鐘頭車,所以自駕去宜蘭真係方便好多㗎!

去夜市一定要食大腸包小腸(圖片來源:SAUCE)
黑山豬肉腸真係見到幅圖都諗起嗰陣香味!(圖片來源:SAUCE)
除咗外帶美食之外,呢到仲有多檔內用小炒(圖片來源:SAUCE)
多間小食檔(圖片來源:SAUCE)
去到夜市點都要去玩下夾公仔嘅(圖片來源:SAUCE)
+1
【INFO】
《羅東夜市》
地址:台灣宜蘭縣羅東鎮興東路與民權路口
營業時間:15:00 - 00:00

台北好去處2023|台北打卡推薦 – 打卡彩虹漁港

第二日Check out之後我哋就揸車返去台北向基隆進發!由於旅行日數只有5日,所以要爭取時間去唔同地方影相!而呢個彩色漁港亦都係我嘅必去清單之一!正濱漁港係面向海港嘅一排多層樓住宅,有唔同顏色外牆,係熱門嘅打卡景點。

正濱漁港彩色屋(圖片來源:基隆市中正區公所)

去到完全冇色差,同上圖一樣冇分別(係當日個天比較多雲)!如果同小編一樣都係彩色控,鍾意搵一啲色彩繽紛嘅打卡點咁就唔可以唔嚟啦!唔好以為呢到只係有得影相咁簡單,其實每棟有顏色嘅地方都有店舖嘅,當中有幾間都係Coffee Shop,如果行程唔算太緊湊就可以影完再入去坐底休息吓。

小編到此一遊(圖片來源:SAUCE)

【INFO】

《基隆正濱漁港彩色屋》

地址:台灣基隆市中正區正濱路72號

前往方法:搭乘基隆市公車101號於「正濱路口站」下車即可抵達或103104號(經中正路)於「中正區衛生所站」下車,即可抵達


台北好去處2023|中山區 赤峰街商圏

跟住落嚟就係台北市中心一啲我食過嘅餐廳同小食介紹!其實疫情前都已經好少去台北旅行,主要係呢到同香港都好相似所以嚟親台灣都會以中部或者南部旅行~不過咁耐冇去都想睇吓呢到有冇同之前唔同。原來依家台灣年青人都鐘意去中山站附近行街,呢到都算係文青一條街,由 Cafe到小店、小資女服飾店到雜貨店都一應俱全,如果想搵好食又多自家品牌嘅地方就可以行吓赤峰街,連影菲林相都有Feel啲。

赤峰街(圖片來源:台北旅遊網)
菲林相機影赤峰街(圖片來源:SAUCE)
多間特色餐廳外牆都好打able!(圖片來源:SAUCE)
充滿復古味嘅一條商店街(圖片來源:SAUCE)
菲林相機影赤峰街(圖片來源:SAUCE)

台北好去處2023|赤峰街美食推薦 – Wakuwaku Pasta 赤峰店

呢間餐廳喺台北有多間分店,但每間分店嘅菜單同裝潢都唔一樣而且赤峰店呢到只可以Walk in,係區內一間幾高人氣嘅Cafe嚟㗎!餐廳外形簡單樸實,以日系風格為主。餐廳入面就以木系作主調,有依家流行嘅昭和風元素!呢度有其他分店冇得食嘅厚鬆餅,所以長期都好多人排隊朝聖。

口感實在的厚鬆餅,淨係牛油同楓糖都已經好好食。(圖片來源:SAUCE)
意粉掛汁超Creamy,而且份量好多~兩個人都夠食(圖片來源:SAUCE)
餐廳門牌(圖片來源:SAUCE)
銀座焙茶巴斯克乳酪蛋糕,一定要食!(圖片來源:SAUCE)
【INFO】
《Wakuwaku Pasta 赤峰店》
地址:台北市大同區赤峰街8巷4號
營業時間:11:00~21:30

台北好去處2023|赤峰街美食推薦 – 灑白甜鮮奶麻糬舖

令我最倍感驚喜就係試到呢間手工鮮奶麻糬!上年3月先開始有實體穩固嘅店舖,之前一直都係以小攤營式運作~短短一年已經成為區內超人氣小食店!Q彈嘅口感加上文青日系嘅簡單店面,就已經好夠吸引去買嚟食!而且單賣鮮奶麻糬嘅店其實唔多,所以亦吸引咗好多人去幫襯!連小編都失守買咗兩盒食~

門市(圖片來源:灑白甜鮮奶麻糬舖)
小編大推黑芝麻口味(圖片來源:灑白甜鮮奶麻糬舖)
有包餡同冇包餡都有得選擇(圖片來源:灑白甜鮮奶麻糬舖)
多款口味任你選擇(圖片來源:灑白甜鮮奶麻糬舖)
即埸制作,保證新鮮!(圖片來源:灑白甜鮮奶麻糬舖)
+1
【INFO】
《灑白甜鮮奶麻糬舖》
地址:台北市大同區南京西路25巷38號之2號
營業時間:星期二至日 11:00–14:00, 16:00–20:00

台北好去處2023|手信伴手禮推薦 – 阿仁 手工牛軋餅

發現呢間超好食又唔甜嘅手工牛軋餅真係緣份,基於小編唔係一個鍾意亂買手信嘅人所以會想專登搵一啲香港買唔到嘅零食送畀人!咁啱西門站出口就有「阿仁手工牛軋餅」嘅快閃Pop-up,買完就後悔點解買咁少~因為真係好好食呀!多款口味任你選擇,就連OREO、抹茶味都有。有興趣嘅讀者可以上佢個官網或者FB睇,睇吓下次快閃店會喺邊到出沒,有時會喺捷運站,有時就會喺商埸。

(圖片來源:官方圖片)
(圖片來源:官方圖片)
(圖片來源:官方圖片)
(圖片來源:官方圖片)
(圖片來源:官方圖片)
【INFO】
《阿仁 手工牛軋餅》
官方網站:https://bit.ly/439Ykby

台北好去處2023|手信伴手禮推薦 – 如邑堂太陽餅

呢間太陽餅雖然有網店,滿額仲會直送香港,但係喺台灣嘅實體店買就會平好多,所以都鼓勵大家買手信嘅時候試吓呢間呀!以全國冠軍太陽餅做賣點嘅「如邑堂」,其實唔單只售賣太陽餅,仲有賣多款糕餅,好似有檸檬餅、土鳳梨酥、蛋黃酥、大甲芋頭酥等。 而太陽餅作為招牌,都出咗多達4款口味畀大家選擇,例如鐵觀音、特濃抹茶、芝士、蜂蜜及原味等!小編就最推薦鐵觀音味太陽餅喇!

【INFO】
《如邑堂太陽餅》
台北門市:台北開封店 台北市萬華區開封街二段22號(近西門町)
官方網站:https://bit.ly/3WCvuy9

————————————————————
Follow 我哋睇更多最新情報!
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/