反斗奇兵30週年展覽 | 鍾意《反斗奇兵》嘅朋友就記得趁復活節假期去啦～由即日起到10月31日，胡迪、巴斯光年與一眾老友登陸澳門新濠影滙，齊齊慶祝《反斗奇兵》30週年！活動更重現安仔嘅巨型睡房，仲有6米高嘅胡迪同3米高勞蘇等緊大家一齊嚟打卡～即刻入內文睇詳情啦！
圖片來源：小紅書@阿薯爬爬走、DJI哈蘇（澳門新濠影滙店）、RINGO💭、卡卡、hgvhuennso、怡宝eilan | 撰文：Hedy
《反斗奇兵》入面嘅一眾角色，包括胡迪、巴斯光年、三眼仔、勞蘇以及牧羊女等都出現喺澳門新濠影滙同大家見面，活動期間特設大型打卡裝置、主題美食、主題摩天輪包廂等豐富活動，比各位Pixar迷免費參加～而喺4月18至20日期間，仲有開幕限定活動，除咗有臉部彩繪之外，亦有角色粉絲見面會！只要身穿Toy Story服飾就可以喺4月18日免費坐8字形摩天輪，記得趁假期去玩吓啦！
反斗奇兵30週年澳門展覽 | 1. 玩具打卡站——6米高巨型胡迪！
一行到去酒店附近就會被6米高巨型胡迪吸引住，再加埋呢個經典造型，真係夠晒霸氣！而一行入去玩具打卡站，更精心重現《反斗奇兵》電影中嘅經典場景，100%還原安仔睡房，仲有巴斯光年同玩具老友記聯手拯救胡迪嘅震撼場景都睇到，超驚喜！
反斗奇兵30週年澳門展覽 | 2. 反轉摩天輪
5款主題摩天輪包廂，包括胡迪、巴斯光年、勞蘇、三眼仔及火腿，陪你一齊坐。無論係家人定朋友，都可以享受充滿歡樂嘅奇妙體驗。同場亦有主題包廂以及下午茶，價錢分別為澳門幣738以及澳門幣1,488。
反斗奇兵30週年澳門展覽 | 3. 反斗奇兵嘉年華
除咗有得打卡之外，展覽入面更有遊樂場，等大家都可以玩唔同嘅攤位遊戲贏取獎品，當中包括小叉及杜克公爵嘅主題遊戲。
反斗奇兵30週年澳門展覽 | 4. 3大主題餐廳
《反斗奇兵》嘅玩具老友記主題裝置驚喜降臨多間餐廳！巴斯光年、小叉、火腿同三眼仔將會喺「載運美式餐室」、「意滙 ‧ 手工薄餅」及「瀛菊拉麵」與你共度美味時光，而3米高嘅勞蘇更喺「羅浮餅廊及輕食」為你獻上可愛又療癒嘅甜點。
反斗奇兵30週年澳門展覽 | 5. 快閃精品店
《反斗奇兵》30週年特別推出限量版精品系列 —— 多款玩具精品輪番登場，更有獨家嘅主題商品，每一件都係不容錯過嘅珍藏！
【INFO】
《反斗奇兵》快閃精品店
日期：即日起至2025年10月31日
地點：一樓時代廣場
時間：11:00至21:00
反斗奇兵30週年澳門展覽 | 6. 免費攞遊戲幣/限量版禮品
一場嚟到澳門打卡，都要記得喺現場攞「章」賞護照，集齊指定主題打卡區印章，即可免費獲得：遊戲幣1個 / 限量版禮品*/主題餐廳85折優惠券/「新濠風尚」會員於指定商戶消費滿澳門幣1,000或以上即可獲取額外限量版禮品*。
【INFO】 推廣期：4月18日至8月31日 護照領取地點：一樓時代廣場·禮品兌換處 兌換地點：一樓時代廣場·禮品兌換處 兌換時間：13:00至21:00 *受條款及細則約束 *數量有限，送完即止
反斗奇兵30週年澳門展覽 | 7.「反斗奇兵」指南地圖
【INFO】 《反斗奇兵滙聚新濠影滙》 日期：即日起至2025年10月31日 地址：澳門新濠影滙
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
