Threads懶人包 | 如果想緊貼潮流，大家絕對要知道Z世代興啲咩～除咗有玩Instagram之外，大部分人都有玩Threads，兩者究竟又有啲咩分別？新手又可以點學習呢？小編已經幫大家整合咗15大懶人包，等大家都可以輕鬆上手！
圖片來源：官方圖片 | 撰文：Hedy
Threads介紹 | 1. 認識Threads
Threads為Meta旗下嘅社群平台，其操作類似X（Twitter），大家都可以喺度發佈文字、圖片以及影片等，當透過演算法後，大家嘅帖文唔單只會畀本來喺Instagram上嘅朋友見到，其他唔認識你嘅用戶亦都可以見到該帖文，甚至可能會成為熱門帖文，瀏覽數變得相當高！Threads已經推出一年，大家又有冇用過呢？如果大家本身有追星，小編就相當推薦大家用，香港亦有唔少歌手及演員等都係活躍「脆友」，例如林家謙、Tyson Yoshi、吳肇軒以及吳保錡等，令你可以同一眾明星有更多交流～
Threads介紹 | 2. Threads又稱「脆」/「跪」
一開始用嘅時候有部分台灣人都覺得Threads讀起上嚟好難發音，甚至有人會讀錯成「Tread」，所以久而久之就會變成諧音「脆」。而香港亦有唔少用戶將「脆」睇錯為「跪」，所以就會同時存在「脆」或「跪」。而喺Threads上面互相認識嘅用戶就會互相稱為「脆友」或「跪友」。
Threads介紹 | 3. Threads與Instagram互相連結
大家一定要註冊咗IG之後，先可以連結IG嘅帳戶再開啟Threads，而你亦可以選擇追蹤本身Instagram上面嘅好友。而連結完成之後大家都會喺Instagram自介上面見到自己嘅Threads帳戶，如果想取消喺個人頁面上顯示嘅話，就可以揀選「編輯個人檔案」、睇到「顯示 Threads 徽章」之後再關閉，咁就唔會再畀其他人睇到～
Threads介紹 | 4. 出第一個Post有通知！
好開心咁下載完Threads後，當然要第一時間試用，不過大家記得發佈第一則帖文嘅時候，都會有通知。所以大家出第一個Post嘅時候就要留意下啦～同時大家都可以喺你個人頁面睇到「第一則串文」！
Threads介紹 | 5. 可以上傳文字帖文
Threads同Instagram相當唔同，Threads除咗可以畀你上傳文字帖文之外，就連圖片都可以上傳橫倒同直倒嘅相，畀起Instagram更為方便！不過每則帖文最多只可以有500個文字，如果篇幅太長就可以擺落Comment位置或者再開新帖文～
Threads介紹 | 6. 帖文編輯只有5分鐘！
只要揀選畫面下方嘅「+號」就可以寫自己想發佈嘅嘢，發佈後先發現自己打錯字，就有5分鐘嘅編輯時間，過咗5分鐘後大家就冇得再改，所以大家打之前就要記得檢查清楚。
Threads介紹 | 7. 睇留言可撳空白位置
相信有唔少人開Threads都未必會自己發佈文章，反而喺會上Threads睇其他人嘅文章同留言。如果大家想睇其他用戶嘅留言，其實只需要撳帖文空白位置，就可以睇到完整留言！
Threads介紹 | 8. 學識引用/轉發/傳送功能
喺Threads上面可以睇到基本嘅讚好同留言功能之外，更可以學埋引用以及轉發兩大唔同嘅功能。如果大家揀轉發嘅話就會直接將帖文分享出去，但如果大家想喺轉發之餘又加入自己嘅文字，就可以揀用引用功能。當大家見到有趣嘅帖文想分享畀朋友，就可以撳傳送功能，再揀自己想分享畀邊位Instagram上面嘅朋友。
Threads介紹 | 9. 向左滑向右滑都有功能！
除咗以上嘅功能之外，其實向左同向右滑都分別有唔同功能，向右滑就會幫你讚好該帖文，而向左就表示自己對帖文冇興趣，可以幫你隱藏。
Threads介紹 | 10. 記得設定公開
大家如果想喺有興趣嘅文章上面留言，就記得要公開個人檔案，如果唔係對方就會睇唔到你嘅留言。如果想自己嘅文章可以有更多人睇或者留言，就一定要設定公開啦！只要去Threads個人檔案上面，再揀右上角嘅設定，選擇「私隱設定」，見到第一個「不公開個人檔案」後就可以熄咗佢～
Threads介紹 | 11. 儲存帖文
Threads上面周不時都會有人分享唔同嘅資訊，例如係美妝好物、護膚品以及香港餐廳推薦等，當你想Save低呢啲實用資訊，等之後再睇返嘅話，就可以選擇帖文上方嘅3點，跟住再揀「儲存」～記得要去個人頁面入面選擇「我的收藏」就可以再睇返！
Threads介紹 | 12. 開啟通知
如果鍾意嘅明星都有玩Threads，不妨開埋鐘仔，咁對方一有任何動態嘅時候例如留言等，都會收到通知，追星最適合不過～
Threads介紹 | 13. 關閉推薦內容
就算大家冇玩開Threads，大家可能用Facebook或者Instagram嘅時候都可能會見到推薦Threads嘅相關內容，隨時自己嘅Post都會畀朋友或者家長見到！如果唔想被推薦，就記得要相個人頁面點選右上方，揀「其他應用程式上的建議帖子」，再熄咗Facebook同Instagram就完成。
Threads介紹 | 14. 冇廣告
平時如果有用開Facebook同Instagram嘅時候，相信有時睇唔同人限時動態嘅時候，都會有唔同嘅廣告穿插於其中，而Threads暫時都仲係未有廣告，等大家可以用Threads嘅時候都可以唔受干擾，不過之後有冇廣告就未知啦！
Threads介紹 | 15. Threads用語「imagine」/「一啖」/ 「老best」/「sdlpt」
有用開Threads嘅朋友成日都會睇到「imagine」呢個詞語，除咗表達試想像呢個意思之外，通常都係表達緊真人真事嘅經歷。除咗Imagine之外，大家都會見到「老best」意思其實就係代表老友以及好朋友等。當Threads有人分享美食照嘅時候，亦會有唔同用家喺下面留言「一啖」，有分享美食嘅意思。相信大家玩Threads都會見到唔少歌手以及明星，當中林家謙亦都建立出唔同嘅用語，例如sldpk（少年的拼勁）以及sdlpt（笑到流鼻涕），唔知大家又識唔識呢！仲有近期最熱門嘅sldpk又係咪真係代表成龍打保錡呢？但其實真實意思係「笑X到X街」！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
