iPhone 15消息 ｜蘋果Apple每年都會喺9月嘅發佈會推出新一代iPhone，今年亦都唔例外。坊間預計蘋果將會於今年9月推出全新iPhone 15，網上亦有唔少關於新系列嘅消息傳言，今次就為大家整合一吓iPhone 15嘅最新相關消息。想知更多 iPhone 15消息 ，包括新機有咩新顏色、新功能及硬件提升，就要睇埋落去啦！
圖片來源：Phone Arena、9to5Mac、網上圖片｜撰文：Athena
蘋果Apple每年都會喺9月推出新一代iPhone，預計會於2023年9月推出全新iPhone 15。隨着發表日子越嚟越近，坊間亦傳出唔少有關iPhone 15嘅消息，而外媒《Phone Arena》及《9to5Mac》最近亦根據傳言製作出一系列嘅iPhone 15渲染圖。
iPhone 15 新顏色
外媒《Phone Arena》推測iPhone 15將會推出5種唔同嘅顏色，當中包括兩種新顏色為桃紅色及淺天藍色，令人聯想起泡泡糖嘅顏色，預計色號為#CE3B6C及#0DB1E2。兩種新色採用高飽和度設計，用色較為亮麗及大膽，設計傾向年輕化，有少許Y2K風格。其餘為黑色、星光白及紅色。
預計iPhone 15 Pro將會推出4種顏色，當中亦有一種之所未有嘅新顏色為酒紅色「Deep Red」，預計色號為#410D0D，用色較為沉實及低調。其餘顏色為過去使用過嘅太空灰、銀色及金色。
iPhone 15 硬件提升
iPhone 15全系列都會將以往用開嘅lightning接頭，換成USB-C接頭。如果係真嘅話，呢一個改動，將會係蘋果由2012年於iPhone 5轉用lightning接頭後，再度改為其他充電接頭。另外亦有消息指，蘋果將會於新機嘅USB-C插槽內加入MFi作為認證功能，到時擁有USB-C插槽嘅蘋果產品，就唔能夠同Android產品嘅USB-C線共用啦。
iPhone 15嘅外觀對比iPhone 14預計唔會有太大改變，iPhone 15及Pro都會有動態島功能，正式告別瀏海螢幕年代。
外媒《9to5Mac》早前取得據說係嚟自中國內地生產線嘅CAD圖則，入面詳細記載咗有關iPhone 15 Pro各部份嘅數據。佢哋根據CAD圖則，製作出iPhone 15 Pro嘅3D模型。
由以上嘅iPhone 15 Pro 3D模型可見，新機機身背殼嘅邊位較以往圓滑，屏幕嘅邊框亦對比上一代再要窄啲，機身變得更加細，使用起嚟嘅時候應該會更方便，手感更好。
iPhone 15 新功能
相機規格
由iPhone 15 Pro 3D模型可見，新機鏡頭部分對比上一代更厚，能夠預示到蘋果將會為iPhone 15 Pro加入更加厲害嘅拍攝硬件。
根據外媒《Phone Arena》報導，iPhone 15 Pro Max將會有一共3個鏡頭，分別係有4800萬像素嘅後置主鏡頭、1200萬像素嘅超廣角，同埋1200萬像素嘅潛望式長焦鏡。iPhone 15 Pro Max將會成為蘋果有史以嚟，擁有最高級相機規格嘅手機。
當中嘅後置主鏡頭質素同上一代一樣，擁有4800萬像素，感測器為1/1.3英吋，而1200萬像素嘅潛望式長焦鏡，則升級至支援6倍光學變焦。Apple咁多年嚟一直研究緊加入潛望鏡鏡頭技術，如果成功推出，今次嘅iPhone 15 Pro Max可以話係為蘋果揭開新一頁。
記憶體
iPhone 15 Pro嘅記憶體（RAM）將提高至8GB，相比現時嘅6GB高少少，有可能係為咗支援潛望式長焦鏡頭技術等等嘅新功能。
LiDAR系統
預計iPhone 15 Pro Max將會具備LiDAR（Light Identification Detection And Ranging）系統，即係光學雷達，佢可以透過向目標發射雷射光束，根據佢嘅返回時間嚟探測同埋判斷距離。當iPhone 15 Pro Max加入LiDAR感測器後，佢就可以精準咁掃描物體嘅位置和形狀，亦可於手機中還原物體嘅3D容貌，為用家帶嚟更加逼真嘅沉浸性AR體驗。順帶一提，呢一項技術已經被廣泛應用喺自動駕駛、地形及建築測量、環境監測等領域上。
固態觸覺按鈕
郭明錤作為地表最強嘅蘋果分析師，表示蘋果可能會為即將推出嘅iPhone 15 Pro及iPhone 15 Pro Max，將以往側邊嘅物理按鈕，轉為固態觸覺按鈕，包括機身嘅開關及音量控制按鈕。情況就好似將以前舊式嘅iPhone下方嘅home鍵，轉為現時直接於螢幕按一樣。改用固態觸覺按鈕可以話係現時嘅新趨勢，對用家最大嘅好處，就係令產品有更好嘅防水功能，防止喺邊位入水，可以延長手機嘅使用壽命。
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
