用開iPhone嘅朋友仔，平時都一定會聽歌、上網同打機等，但iPhone仲有唔少功能大家可能未必知，點先可以喺冇YouTube Premium嘅情況下都可以鎖定畫面聽歌？有冇人每次輸入自己嘅電郵地址都覺得好麻煩，但用呢個方法居然可以一撳就得，慳咗好多時間！小編為大家搜羅 iPhone五大隱藏功能 ，想知有咩功能啱用就繼續碌落內文睇更多啦！

圖片來源：SAUCE｜撰文：Sharon

1. iPhone長截圖免安裝

有時想整個頁面截圖，逐張Cap都係一件幾麻煩嘅事，用咗呢個方法，就可以整個頁面一併儲存，仲慳好多時間添！

第一步：去到你想截圖嘅頁面。

第二步：同平時一樣，按下「螢幕截圖」鍵。

第三步：按下右上角「整頁」，就可以睇到整篇文章嘅截圖。

第四步：按「完成」就可以完整地儲存整個網頁，但要留意截圖後會經PDF儲存至iPhone嘅「檔案」位置，如果想儲存喺「相片」嘅朋友就未必啱用了！

2. 「備忘錄」中掃描文件

大家會唔會同小編一樣，如果想喺手機掃描文件，但又唔想專登下載多個應用程式，佔據手機嘅內置空間？如果係嘅話，呢個iPhone功能就十分適合你！

第一步：喺備忘錄中按下相機圖案，並選擇「掃描文件」。

第二步：好似平時影相一樣，將你要掃描嘅文件影低。

第三步：手機會自動將你要嘅文件拍下，並儲存至備忘錄上，咁就完成了！

3. 免YouTube Premium鎖機聽歌

相信大家平時都鍾意喺YouTube上聽歌，但如果想鎖定畫面音樂就會自動停播！除咗可以支付月費開通YouTube Premium之外，大家可以用Safari播歌，咁鎖定畫面聽歌都無問題啦！

第一步：喺Safari開啟YouTube頁面，並輸入你想聽嘅歌曲。

第二步：將影片變成全螢幕模式。

第三步：喺「控制中心」點擊右上角嘅播放键。

第四步：鎖定畫面後，就可以聽歌啦！

4. 快捷輸入文字（電郵）

每次喺手機上輸入自己嘅名同電郵覺得好麻煩？如果建立咗屬於自己嘅快捷輸入文字，以後一按就可以！小編只需要打上「SAUCE」字眼，就會直接出現電郵地址，大大節省唔少時間啊！

第一步：點擊「鍵盤設定」。

第二步：再點選「文字替代」。

第三步：喺「文字替代」中，按下右上角「+」。

第四步：輸入你想要快速打出嚟嘅字詞，並輸入你想要嘅輸入碼。之後只要輸入代碼，就會自動列出字詞畀你選擇！

第五步：只要喺鍵盤上打「SAUCE」，就會出現你想快速打出嚟嘅字詞「marketing@saucemedia.net」！

5. 計數機

用計數機計數最怕就係打錯一個數字就要由頭打過，只要打錯數字想刪除時，只要喺螢幕向左或向右滑動，就可以刪除最後一個數字，咁就唔需要每次都將全組數字刪除。

【相關文章：超實用！WHATSAPP隱藏功能！一定要知嘅15個功能！】

【相關文章：6大 IG隱藏功能｜訊息睇完不已讀 隱藏限時動態 特別版STORY貼圖！】

——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/