【 Instagram 2023新功能 】基本上依家人人都會玩Instagram，隨住功能越嚟越多，你哋又有冇好好善用呢？為咗貼近使用者嘅需要，最近Instagram推出多個新功能，想知道有邊6大新功能就繼續碌落內文睇更多啦！
圖片來源：SAUCE、Twitter@alex193a、Twitter@prettyni_｜撰文：Sharon
Instagram 2023新功能1：為主頁連結命名
好多人都會喺個人檔案嘅介紹一欄加入連結，但通常大家都只可以睇到網址連結名稱，連結內容有啲咩就未必可以知道！Instagram更新功能，大家可以看行為連結改名，點選「編輯個人檔案」，喺「連結」一欄更改你想要嘅標題就完成！
Instagram 2023新功能2：文字模式
喺Instagram要發佈帖文通常都要配加一張相先可以成功，但今年Instagram開發文字模式（Text Mode），功能同Facebook嘅文字貼文差唔多，用家可以選擇只用文字出Post，唔需要附上照片！IG嘅文字模式仲可以自訂背景顏色，最終帖文會以照片嘅形式發佈。
Instagram 2023新功能3：IG便利貼
IG便利貼出現喺DM位置，喺聊天室嘅上方就會見到自己同已追蹤對象嘅頭像，只要點擊大頭照右上角嘅「+」，就可以編寫你想寫嘅便利貼，並分享至你選擇嘅對象，成功後頭像嘅右上角會有短短嘅一句。不過IG便利貼只會保留24小時，同限時動態一樣，而且字數方面都有限制！目前只有手機版嘅Instagram先可以使用呢個功能～
Instagram 2023新功能4：放大頭像
有冇人會同小編一樣，有時會好好奇其他Instagram用家嘅頭像？如果係嘅呢個功能一定好適合你，依家新放大頭像功能，只要撳實頭像位置2秒，就可以將用家嘅頭像放大，咁就可以更清楚睇到啦！
Instagram 2023新功能5：限時動態剪輯
平時發佈限時動態影片，都唔可以剪輯，只有Reels先具備剪輯功能，但依家唔同喇！Instagram研發喺限時動態上載超過60秒嘅短片中，提供剪輯功能，大家可以直接剪輯短片想要嘅秒數同長短，相信呢個功能唔少人都會覺得方便實用！
Instagram 2023新功能6：GIF圖留言
同Facebook功能相若，用家依家可以喺Instagram留言區使用「GIF動態貼圖回覆」功能！以後大家除咗用文字，仲多一咗一個留言方式，你哋又會唔會用呢？
以上呢啲功能仍然測試階段，Instagram一向測試新功能會係隨機派送畀用家，有幸使用以上功能嘅幸運兒又覺得新功能如何呢？如果未用到新功能嘅朋友耐心等候，相信好快就會全面開放大家使用！
相關文章：【6大 IG隱藏功能｜訊息睇完不已讀 隱藏限時動態 特別版Story貼圖！】
相關文章：【超實用！WhatsApp隱藏功能！一定要知嘅15個功能！】
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
