泰山樹屋重開 | 近期將會去香港迪士尼樂園嘅朋友要留意喇！除咗一定要去魔雪奇緣園區之外，大家期待已久嘅泰山樹屋終於都重開喇，呢個仲要係香港獨有！即睇當中5大必訪景點，快啲去參觀呢個充滿神秘感嘅樹屋啦！
圖片來源：香港迪士尼樂園官方網站| 撰文：Hedy
香港迪士尼樂園獨有「泰山樹屋」
全球本來擁有2個「泰山樹屋」，由於原本位於美國加州迪士尼嘅樹屋，經過重新粉飾並換上新故事，改成「探險世界樹屋」，向1962年電影Swiss Family Inspired致敬。所以香港迪士尼樂園嘅「泰山樹屋」就成為全球獨有嘅遊樂設施。由於近年嚟樹屋長期關閉，今次宣布重開，大家都一定會把握機會參觀下，記得到訪迪士尼之前，要預約咗先，咁就唔怕買咗飛入唔到去玩。
「泰山樹屋」背後故事藍本
「泰山樹屋」以迪士尼大熱動畫《泰山》為藍本，將泰山嘅森林故事帶到現實中，令你親身探索泰山驚奇嘅生活環境！迪士尼1999年嘅動畫《泰山》，呢部廣受歡迎嘅電影改編自Edgar Rice Burroughs喺1914年出版嘅小說《人猿泰山》，講述一個男仔被猩猩撫養長大後，被深入叢林探險嘅現代人所發現嘅故事！
泰山樹屋重開 5大必訪景點
-
泰山樹屋之木筏
呢座位於探險河中央嘅泰山樹屋有18.9米高，喺呢度更有3隻充滿探險感嘅木筏等緊你去坐，可以來往碼頭同泰山小島以及泰山樹屋。大家由今日(18日)起就可以再次登上木筏，嚟到泰山小島親身探索泰山嘅生活環境，咁就可以了解同認識佢嘅成長故事。當你爬完157級階梯上去之後，就可以到達樹屋頂層飽覽成個探險世界、明日世界星戰極速穿梭同灰熊山谷嘅壯觀景色！
-
花豹突襲場景
當你一踏入家居小屋，可以見到殘破竹架、滿地嘅破瓦殘礫同埋爪印，仲可以聽到花豹嘅吼叫聲同BB泰山嘅喊聲，細緻咁重現花豹突襲泰山一家人觸目驚心嘅一幕！
-
卡娜鏡前懷抱泰山
善良嘅猩猩卡娜由花豹魔爪之中救出泰山，並將佢撫養成人。佢抱住泰山坐喺鏡前，鏡內就反映出一幕幕泰山嘅成長片段，絕對係大家不能錯過嘅感動瞬間！
-
泰山與珍妮的書房
喺度可以見到珍妮正喺度為英姿颯颯嘅泰山繪畫素描，當中包括泰山點樣被救出嘅情況、被善良嘅猩猩卡娜扶養成人以及同珍妮墮入愛河嘅瞬間。當中房間內更有一個航用輪胎，配合小艇用嚟升降物品，將種種故事及細節生動呈現泰山日常。
-
探索樹屋營地
樹屋營地內嘅實驗室擺放住珍妮珍藏嘅科學儀器，大家仲可以試玩神燈，觀賞多幕泰山生活嘅精彩場景！而喺戶外廚房，大家更可敲擊各種茶具器皿同木琴，為營地演奏出美妙音樂！
體驗蒸汽火車
除咗要到訪泰山樹屋之外，仲可以體驗埋香港迪士尼樂園嘅蒸汽火車，大家可以選擇喺小鎮大街火車站或幻想世界火車站乘搭懷舊蒸汽火車。歷時20分鐘嘅旅程，可能會令你喺途中觀察到不同嘅驚喜同景色！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
