今年聖誕沙田真係大搞作!新城市廣場由11月25號起,喺商場入面起咗全港首個大型兩層式水晶宮殿「New Town Crystal Palace星願水晶殿」,仲將戶外燈飾一路延伸出沙田社區,日頭同夜晚都勁好影!
圖片來源:官方圖片|撰文:Sharon
今次成個佈置以19世紀英國經典「水晶宮」做靈感,重現當年世界博覽會「匯聚世界」嘅華麗氣派。除咗有Swarovski打造嘅夢幻藝術空間之外,商場仲聯同多個國際知名品牌喺水晶宮殿入面整咗唔同特色嘅聖誕櫥窗同節慶Pop-up,由美妝、時尚配飾、家居精品到佳節餐飲都有齊,行街買禮物同打卡可以一次過搞掂!
必打卡位逐個捉:
室內重點:15萬顆Swarovski水晶星海
成座水晶宮殿用咗超過15萬顆施華洛世奇水晶裝飾,仲巧妙結合埋商場天幕建築,Bling Bling到爆!行上水晶殿一樓仲可以近距離打卡沉浸式水晶星海,指定日子地下仲會變身聖誕老人屋,可以同聖誕老人影相許願!


戶外必睇:Sky Garden金光水上殿堂+燭光音樂會
行出1期7樓佔地4萬呎嘅Sky Garden,戶外音樂噴泉會化身成金光閃閃嘅「空中之城」!夜晚除咗有聖誕特別版音樂噴泉光影匯演,重現沙田人集體回憶之外,指定日子仲有「燭光音樂會」,管弦樂團會喺過萬支搖曳燭光下現場演奏多首經典同流行金曲,氣氛浪漫到暈!


浪漫延伸:Chill Park流星雨瀑布+沙田正街城堡
1期3樓Chill Park會有超唯美黃色燈幔由5樓傾瀉落草坪,變身氣勢十足嘅「流星雨瀑布」;連出面沙田正街5樓橋頂都裝咗聖誕城堡燈飾,遠睇好似懸浮喺半空嘅童話城堡咁,成個沙田市中心都充滿節日氣氛!

現場仲有Merry Berry聖誕市集、聖誕工作坊、報佳音、Busking同慈善許願池,同場仲有「星空許願樹」摘星之旅,可以解鎖唔同商戶嘅專屬禮遇,買聖誕禮物一流!
【INFO】 《New Town Crystal Palace星願水晶殿》 地點:沙田新城市廣場(室內中庭、1期7樓Sky Garden、1期3樓Chill Park及沙田正街) 日期:2026年11月25日 – 2027年1月3日
——————————————————
Follow 我哋睇更多最新情報!
Facebook – SAUCE – 為生活加一點味道
Instagram – @sauce.media.hk
YouTube – @saucemediahk




